Aposolo 1 - Ono

Yesuŋo Asu Talekaki Kesiyakane Edange

¹ O Thiopilus, na ekap alakan qe gingole, eya mo Yesuŋo urataine kiyekki paki, urata kine kine korop make, so kisi maep don kito edange, eya wane don kisiine okan gangole.

² Yesu eŋe urataine kiyeke ma ari mageki, nasoine bomileki Asu Koboboineŋo talekaki, Aposolo koune ebuke, eŋe don zonomine qoi qoine urata ŋei koune edane ebon wareke, qoeki Kaisaleŋo qeliwo ma wake, don kisi yewa korop qe gin warekole.

³ Eŋe wikile dere ari mage seukki paki koso wisikae wiye more urata ŋeikoune Aposolo, edo kineine ka more Yesu eŋe welekatne wisikae wiyeke, yale det-lukkaikei wane eŋe kaiwe 40 wakon ongi kakoi, qoekiso eŋe Kaisale wane qeli ewe zonominane kine ra qelaŋane edange.

⁴ Pakiso eŋe wekuwoka lewage metpi Yesuŋo edane rake, “Ŋine Yerusalem mat misuk qeliŋ kaikei, Magakŋo ŋinane kine kine mane biŋek qe rake, eya wane wele wakoniyake wane ŋine yewa toma gekei. Na eya wane don kisi mo ŋidanbe detkoi.

⁵ Yohane eŋe dokuka tau-ŋunge, ŋo noŋo yemo geu mi azoŋgi Asu Koboboine qe wat ŋunikale.”

Yesuŋo Qeliwo Wake

⁶ Eso naso yewa Aposolo eŋe wekuwoka lewage mere Yesu qesonka rakoi, “Waom, ge naso dango zinge more, Israel ŋei ŋene qedugu ŋone more, ŋei waom okan ŋonnom, ŋene naso yewao koso kepe wane ŋei waomzerop okanikene me?”

⁷ Raumo Yesuŋo edane rake, “Magakŋo eŋine zonominane naso so kaiwe urata mama kiroine me bamgo motke, eyamo ŋido desikei wane rokop midaka. Eyamo eŋe oŋomka ware kamaike.

⁸ Ŋo ŋine yemo baŋ Asu Koboboineŋo kutŋino ket more zonom qewatke ŋibongi ŋine naŋane don kisi ra wakonikei. Pakimo ŋine baŋ Yerusalem matko ŋine kiyeke don kisine korop ra wakone edane more Yuda kepeo so Samariya kepeo korop ra edane ari mageu kepe sotakino qoewareyake.”

⁹ Eŋe don iwa raki qoeki, dokoine eŋe ka okorau, so eŋe yewaka qeliwo kere wake, pakiso kezoŋŋo kawet kaki eŋe koso mi kakoi.

¹⁰ Yesu eŋe wa ariki, dokoine eŋe deene qeliwoka pore kalilipka okorau, yewaka ŋei etke takotetne libekaŋo eŋane osoeno wakone okorakoik.

¹¹ Paki eto edane rakoik, “Galili ŋei ŋine onoka wane deŋine qeliwoka pore okoramami? Ŋine ukude Yesu iwa kau, Kaisaleŋo qeliwo mawamaike, eŋe zinge sariyake naso yewao, eŋe ukude kau qeliwo wamaike, eŋe eya wane rokopka koso zinge sariyake.”

¹² Pakiso aposolo eŋe Oliwa Bonagaoŋine zinge ket more, koso Yerusalem matko arikoi. Oliwa bonaga eyamo Yerusalem mat wane osino, kilomita weku, sabat nasoo maine ari lotkekei eya wane rokop.

¹³ Eŋe ari Yerusalem matko lotkeu paki, mat koto waket more urum kutno weti wa mere ge okan maŋkoi, yewao wakoi. Eŋane eŋetene yem iwa yale, Petoro, Yohane, Yakop so Andreya, Pilip so Tomas, Bartolomu so Matayo, Yakop Alpaiu wane gipole, Simon Zelot so Yudas, Yakop wane gipole.

¹⁴ Ŋei magu yewa edo wet weku okane more, meŋe meŋen urata tako rakot ma gekoi. Yale okanbi ŋerep natne, so Yesu nagaine Mariya, so Yesu ŋolekoune, eŋe weneŋ qesiŋ onbi meŋe meŋen urata ma gekoi.

Yudas Wane Tungo Matiyas Ma Wakonkakoi

¹⁵ Eso naso Yewao Petoroŋo kimakoune so ŋei ŋerep zaleene 120 eŋane keuweno wiye okora more don iwa yale edange,

¹⁶ “Kimakopne, Asu Koboineŋo Dawit wane wetne ma eweke more aŋaino don motki Yudas wane don mane mokaka rake, ekapko pamaike, don eya wane wele wakoniyakane Yudasŋo ŋaba iwenone more sikanongi, Yesu makoi.

¹⁷ Yudas eŋe alakan ŋenerop geke, eŋe ŋenane maguwo ŋine, so kisi maep urata iwa, eŋe weneŋ mayakane ra mange.”

¹⁸ Yudas eŋe siron raki Yesu makoi, paki lewine wesi mangoi, sot wesi, yewaŋo kepe mane qoleke, eŋe yewao ari more, wouineŋo alakangi mapilage ket qeki, woune quluŋgi kaine korop qake saket wareke.

¹⁹ Pakiso, Yerusalem matko ŋei ŋerep gekoi eŋe korop don kisi yewa dere more kepe eya wane eŋetine enŋene dongoka “Akeldame” orakoi, don eya wane kine yem, “Weŋem kepe.”

²⁰ “Eya wane kibi yemo Sam Eŋet ekapko Dawitŋo iwa yale qeke. ‘Eŋane mat yewa maine yaup okorayake, ŋei maneŋo yewao misuk geyake.’ Eso Sam maneo iwa yale ramaike, ‘Ŋei maneŋo eŋane tungo urata yewa mayake.’

²¹ “Eso eya wane mo ŋene ŋei mane Waom Yesu eŋe ŋenerop geki, ge okanŋem ŋabaŋonmaŋkoi, so ŋene naso baŋem eŋerop ari sari okane gekone, ŋei magu yewa ŋenze keuzo ŋine mane ma wakonka birakaŋem.

²² So alakan mo Yohaneŋo ŋei ŋerep doku tau one ge samaŋki, koso Yesuŋo doku yale waka tau more urata kiyekke. Paki ma ge sari mageki ukude kaiwe iwa okanmaike, so Kaisaleŋo Yesu ŋenano ŋine koso ma more qeliwo mawake, ŋei yaline keuzo ŋine mane kaŋem paki, ma wakonka birakaŋem, eŋe ŋene qesiŋŋongi urata ma more, Yesu seuke more wisikae wiyeke, eya wane kisi maep yewa weneŋ ŋenzarek ra qelaŋanikene.”

²³ Petoro eŋe yale rakiso eŋe ŋei etke ma wakon-otkoi. Mane Yosep, eŋe Basabas ramami, so eŋetine mane Yustus. So ŋei mane yemo Matiyas.

²⁴ Ma wakon ore more eŋe yewaka meŋenka rakoi, “O Waom, ge ŋei ŋerep eŋane kotoenane kine det luk waremaine. Ŋei etke iwa erano ŋine mane ma wesakka more ma wakonkamaine, eya sikanŋonnom kaŋem.

²⁵ Oŋo Yudas wane tungo aposolo urata iwa takotke ŋenerop mageyake. Yudas eŋe urata iwa mo qelige eŋe eŋine numaine maneo arike.”

²⁶ Eŋe yale ramore wezu qeu Matiyas wakonge. Pakiso eŋe ma wakonka birakau aposolo 11 eŋano takotkeke.