3 Yohane 1 - Ono

Yohaneŋo Kibi Atak Karewe Qeke

¹ Na doku tautau eŋane ŋetne mama, Noŋo kima maepne Gaius geŋane kibi iwa qe ginmaile, na welekakatne wet maep okanganmaile.

² Kima maepne, na detmaile, ge Asurop mayakatne gemaine, yeye kine kine okanmaine yewa maine geŋano payake, so solaŋone zoma kubet, wikile wakikle midaine mayakatne, maine gekenane meŋenkamaile.

³ Ge don welekatne yewa mage more tewek okanmaine. Eya wane don kisiŋone kima natne edo sari nolatpi detpe paki wetne zok peseke. Na detmaile, ge naso baŋem don welekatne rara, eya wane kotino gemaine.

⁴ Gipon borasokopne eŋe don welekatne rara, eya wane kotino gemami, don kisi yale detpe paki wetne zok pese okanmaike, kine kine natne eyawane wet pesek yewaŋo iwa wane wet pesek yewa mi yuwankayake.

Gaius Eŋe Urata Mayakatne Make

⁵ O, kima maepne, ge urata korop ma more ŋei kima maulukone qesiŋone okanmaine, so mat osop ŋineka mida, matene abaran ŋine ŋei lobo weneŋ qesiŋone okanmaine.

⁶ Ŋei eŋe iwa lewa lewago ge doku tau tau magu wet maep okanon okanmaine, eyawane qem mawa okangangoi, ŋei sariu, ge Kaisale wane ŋeiŋo qesiŋone biraonnom, eŋe numaene takotke ariu, Kaisaleŋo detki menageyake.

⁷ Eŋe Kristo wane donkisi rau suwa ariyakane kepe matene qeligeu paki kisi maep qelit arimami, eŋe qelaŋ doku tau tau magu mi okane gemami, ŋei eŋano ŋine lewine mane mi ma okanmami wane qesiŋonikene.

⁸ Ŋene doku tau tau maguŋo ŋei iwa qesiŋonikene, yale okanŋem paki, eŋerop urata mamaze weku okanŋem paki, ma togole nagu more, don welekatne eyawane urataine maine mapitonikene.

Diotrepes Eŋe Masi Qotkoine Okange

⁹ Na doku tau tau magu eŋane kibi mane bamgo qe ebongole, ŋo Diotrepes eŋe eŋane suwaineene geyakane ra okan maike, ŋo eŋe ŋenane don mi det okan maike.

¹⁰ Eya wane na ŋinano sarikale naso yewao eŋe masi kine kine okange yewa korop peike sarikale. Kine kine mi oka okane yewa ŋenane ra okanmageyake, so isi don edan okan maike! Ŋo yewaŋo eŋane rokop mi okanmaike, ŋei kima sariu ebu matino mi biraongi wau ŋara ebon okan maike, so ŋei natne edo ŋei kima sariu ebu mateno biraonbi waikei wane okanbi doku tau tau magu eŋanoŋine kitat one esop ongi saket ari okanmami!

Demitriusiŋo Masi Maine Okange

¹¹ Kima maepne, ge ŋei borikinane qelit qeu, ge eŋe misuk mogat onikene. Ŋo mainane qelit qeu eyaka mogat onikene, mane eŋe masi tanik maine okane geyake eŋe Kaisale wane medep geyake. Ŋo mane eŋe masi tanik qotkoine okane gemaike, eŋe Kaisale mi kake.

¹² Ŋei korop eŋe Demitrius wane detpi menangi mawa kamami, Kaisale wane don welekatne yewaŋo yalewaka eŋane bakom kitomaike, pakimo ŋene eŋano takotke bakom kitomaine, yewa ge detmaine, ŋene don iwa ramaine yemo welekatne.

Don Qoiqoine

¹³ Na don loutne qe ŋibonikalane wetkemaile, ŋo siluŋ peda so tideŋo qekalane mi detmaile.

¹⁴ Na geŋano mo ikopka ukalane ramaile, u lotkewe gerop don aukete.

¹⁵ Peyamŋo gerop payake, kimakopŋone iwa korop eŋe geŋane kaiwe maine ra ŋibonmami, ŋine yalewaka ŋenane ra more kima kopze gerop gemami, korop eŋe kaiwe maine ra ebonikene.