2 Yohane 1 - Ono

Yohaneŋo Kibi Atak Etke Qeke

¹ Na doku tautau magu eŋane ŋetneŋo ŋerep waom ge so gipon borasokopŋone doku tautau magu ŋinane kibi iwa qemaile, na welekatneka wet maep okan ŋun okan maile. So weku noŋoka mida, don welekatne detmami, eŋe weneŋ koropŋo wet maep okanŋun okan mami.

² Onokawane, Kaisale wane don welekatne, yewaŋo ŋenane kotozo metmaike so, yale ŋenerop baŋ papatogon pa ariyake.

³ Kaisale Magak so Yesu Kristo, Magak wane Gipole, eto mosop, qom borik so peyam maine ŋebonikeik, don welekatne so wet maep ŋo maine ŋenane okangeik.

Ŋene Wetzeŋo Wet Maep Okannagukenane Don

⁴ Gipon borasokopŋone natne eŋe Magakŋo pidonine ŋedange yewa teweke more don welekatne maine malipka gemami, na kineŋine yale detpe paki wetne pesemaike.

⁵ Eso eya wane ŋerep waom, na yale golatmaile, ŋene kimakopze korop wet maep okan onikene. Iwamo pidon musele mi qe ŋibon maile, iwa pidon sogine, ŋene mo qei kiyeke ma ge sarikone yewaka qe ŋibonmaile.

⁶ Na wet maep iwa wane ramaile, yemo kine iwayale: Ŋene Kaisale wane pidon teweke more eya wane rokopko gekene. Ŋine koropŋo pidon qei kino detkoi, yemo iwa ŋine korop wet maep korop gekei.

Ŋene Kristo Wane Don Togogole Magekene

⁷ Isisi ŋei loutne wakongoi, kepe baŋem rokopke ge arimami, eŋe iwayale ra okanmami, Yesu Kristo eŋe ŋei okane mi wakonge, yale rau paki bisopke okanmami, ŋei yaline eŋe isisi ŋei so Kristo wane Ŋabakoune.

⁸ Ŋine kine kine wele maratkaikei wane urataine mamami, eya wane weleine siuke ŋiboniyakane diyam togogole maikei, paki baŋ ge mage eya wane turuŋine wele zok manerop wat watko maratkaikei.

⁹ Ŋei mane eŋe Kristo wane don togogole malipkaki paki yewarop mi geyake, eŋe yuwanka don mane wano ariyake, eŋe Kaisale ŋadekkayake. Ŋo mane eŋe Kristo wane don togole malipkaki paki yewarop geyake, eŋe Magak so Gipole ere weneŋ eretnarek eŋerop gekei.

¹⁰ Ŋo ŋei mane sari ŋinano lotkeyake, eŋe don yewa mi ma sariyake, yemo ŋine misuk don awoka more mat ŋino rau wayake. Pakiso “Peyamŋo gerop payake”, yale misuk raikei.

¹¹ Mane eŋe ŋei yaline kima okankaki paki, peyamŋo eŋerop payakane olasiyake, eŋe gege mageine qotkoine yewa qesiŋkaki eŋane kimaine okan maike.

Don Qoiqoine

¹² Na don loutne qe ŋibonikalane detmaile, Ŋo siluŋ don iwa ekapko Peda so tideŋo mi qe ŋibonikalane wetkemaile. Eya wane turuŋine yemo noŋom u ŋunbe ŋinerop don aukene, paki na so ŋine wet pesek suwaine desikene.

¹³ Qa maep ŋonane gipon borasokoune eŋe geŋane “kaiwe maine” ra more motpi geŋano umaike.