NUMERI 1 - Ombiimbeli Ondjapuki

Eyalulo lyAaisraeli

¹ Mesiku lyotango lyomwedhi omutiyali momumvo omutiyali Aaisraeli sho ya tembudhwa muEgipiti, Omuwa okwa lombwele Moses metsalihangano mombuga Sinai a ti:

² “Ne naAaron yaluleni Aaisraeli pamaludhi nopamagumbo gawo. Ningeni elandulathano lyomadhina gaalumentu ayehe

³ ye na omimvo omilongo mbali nenge dhi vule po, mboka ya gwana okuhinga iita.

⁴ Puleni omukuluntu mezimo kehe, e mu kwathe.”

^5-16 Aalumentu aawiliki momazimo gawo mboka ya hogololelwa oshilonga shika, oyo mbaka: Ezimo Omukuluntu Reuben Elizur lyaShedeur Simeon Shelumiel yaSurishaddai Juda Nahshon yaAminadab Issaskar Netanel yaZuar Sebulon Eliab lyaHelon Efraim Elishama lyaAmmihud Manasse Gamaliel gaPedazur Benjamin Abidan yaGidoni Dan Ahiezer yaAmmishaddai Aser Pagiel yaOkran Gad Eljasaf lyaDeuel Naftali Ahira yaEnan

Ezimo Omukuluntu

¹⁷ Kekwatho lyaalumentu mbaka omulongo nayaali, Moses naAaron

¹⁸ oya hiya egongalo alihe mesiku lyotango lyomwedhi omutiyali e taa nyola aantu pamaludhi nopamagumbo gawo. Omadhina gaalumentu ayehe yomimvo omilongo mbali nenge dhi vule po, oga nyolwa e taa yalulwa,

¹⁹ ngaashi Omuwa a lombwele Moses. Moses okwa yalula aantu mombuga Sinai.

^20-46 Aalumentu yomimvo omilongo mbali nenge dhi vule po ya gwana okuhinga iita, oya nyolwa omadhina gawo pamaludhi nopamagumbo gawo, okutameka nezimo lyaReuben, osheeli shaJakob. Omiyalu odha li, ngaashi tadhi landula: Ezimo Omwaalu Reuben 46 500 Simeon 59 300 Gad 45 650 Juda 74 600 Issaskar 54 400 Sebulon 57 400 Efraim 40 500 Manasse 32 200 Benjamin 35 400 Dan 62 700 Aser 41 500 Naftali 53 400 Kumwe 603 550

Ezimo Omwaalu

⁴⁷ Aalevi inaa yalulwa pamwe nomazimo galwe,

⁴⁸ oshoka Omuwa okwa lombwele Moses a ti:

⁴⁹ “Uuna to yalula aalumentu mboka ya gwana okuhinga iita, ino kwatelela mo ezimo lyaLevi.

⁵⁰ Tula Aalevi metonatelo lyetsalihangano niikwaniipangitho ayihe yalyo. Naye li humbate niikwaniipangitho yalyo. Oyo ayeke ye na okuyakula mo, e taa dhike ootenda dhawo dhe li kunduka.

⁵¹ Uuna to tembudha po ontanda, Aalevi naa humbate etsalihangano e taye li dhike ishewe montanda ompe. Shaa ngoka gulwe ta hedha ketsalihangano, na dhipagwe.

⁵² Aaisraeli yalwe naa yunge oontanda, ongundu nongundu, shaa ngoka nongundu ye mwene yi na epandela lyayo.

⁵³ Ihe Aalevi naa yunge ontanda ya kunduka etsalihangano ye li langele, opo pwaa kale ngoka ta hedha kulyo okupendutha ondjahi yandje, yi hwamene Aaisraeli.”

⁵⁴ Aaisraeli noya ningi ayihe, ngaashi Omuwa a lombwele Moses.