ESRA 1 - Ombiimbeli Ondjapuki

Kores ta shunitha Aajuda

¹ Momumvo gwotango Kores sho a li omupangeli gwaPersia, Omuwa okwa tsakanitha shoka sha popilwe komuhunganeki Jeremia. Omuwa okwa hwameke ombepo yaKores, a gandje oshipango molupe lwenyolo sho shi leshwe pombanda moshilongo she ashihe:

² “Kores, omupangeli gwaPersia ota ti ngeyi: Omuwa, Kalunga komegulu, okwa ningi ndje omuleli guuyuni auhe nokwa pe ndje oshilonga shoku mu tungila otempeli muJerusalem shomuJuda.

³ Kalunga na kale nane amuhe, ne aantu ye. Indeni kuJerusalem, mu tungulule otempeli yOmuwa, Kalunga kaIsrael, Kalunga ngoka ta simanekelwa muJerusalem.

⁴ Ngele gumwe gwomaantu muupika ta pumbwa ekwatho mokushuna, aashiinda ye naye mu kwathe. Naye mu pe oshisiliveli noshingoli, omaliko niimuna, nomayambo goku ka fala motempeli yaKalunga muJerusalem.”

⁵ Nena aakuluntu yomaludhi gomazimo gaJuda naBenjamin, aayambi nAalevi naayehe mboka Kalunga a pendutha, oyi ilongekidhile okuya, ya ka tungulule otempeli yOmuwa muJerusalem.

⁶ Aashiinda yawo ayehe oye ya kwatha noku ya pa iinima oyindji: iikwaniipangitho yoshisiliveli noyoshingoli, omaliko, iimuna niinima yilwe yi na ondilo, nomayambo gomotempeli.

⁷ Kores okwe ya shunine iiyaha niitenga mbyoka omukwaniilwa Nebukadnezzar a kuthile motempeli muJerusalem e te yi tula motempeli yiikalunga ye.

⁸ Okwe yi ya pe mewiliko lyaMitredat, omukuluntu gwomaliko guuwa, ngoka e yi yalula noku yi pa Sheshbazzar, omunashikandjo gwaJuda,

^9-10 ngaashi tashi landula mpaka: iiyaha yoshingoli 30 iiyaha yoshisiliveli 1 000 iiyaha yilwe 29 uuyaha woshingoli 30 uuyaha woshisiliveli 410 iikwaniipangitho yilwe 1 000.

¹¹ Ayihe kumwe oya li iiyaha 5 400 yoshingoli noyoshisiliveli niinima iikwawo mbyoka Sheshbazzar a yi nayo, aapongekwa sho ya zi muupika waBabilon nokuya kuJerusalem.