DANIELI 1 - IBIBILIA INDAKATIFU

AMAKHUWA KA DANIELI NENDE ABETSABE ( 1:1–6:28 ) Abasiani ababuukha munzu mwa Nebukadineza

¹ Mumuyika kwakhataru Yehoyakimu nali omuruchi wa Yuda, omuruchi Nebukadineza wa Babuloni yaseera litookho lia Yerusalemu, mana niyeekalilamwo abandu.

² OMWAMI Nyasaye yakhola omuruchi Nebukadineza okhutiila omuruchi Yehoyakimu nende okhuyaaya bilala khubindi biamabiikho komuhekalu ya Nyasaye. Yabukula balala khubabohe nakalukha ninabo mu Babuloni nabara muhekalu yabanyasayebe khandi nara ebindu bia yali nayaayile mumabishilo keihekalu yabanyasayebe.

³ Nebukadineza yalaka Ashipenazi, owali omusinjilili wabakhalabanibe abalate mbu, yahule okhurula mubasumba ba Isiraeli ababuukha abomunzu yoburuchi nende abomutsinzu tsioluyali.

⁴ Yenya abasiani ababuukha ababula obulema bwosi, abelikondo lilayi, abasitsa mubuchesi bwosi, abali nobumanyisi obunji, obwechi obunji nende abanyala okhukhalabana munzu yomuruchi. Yenya khandi mbu, abasiani abo bechesibwe okhusoma nende okhuhandika olulimi olwa Abababuloni.

⁵ Omuruchi yalaka mbu buli inyanga ababuukha abo bahebungwe ebiokhulia ebilayi ebiomwene yalitsangakhwo nende idivai yomwene yanywetsangakhwo. Kali mbu bechibwe khulwemiyika chitaru mana olunyuma bareerwe imbeli womuruchi oyo.

⁶ Mu abo abaahulwa bali Danieli, Hanania, Mishaeli nende Azaria, boosi bali aboluyia lwa Yuda.

⁷ Omusinjilili wabakholi oyo yabakulikha ameera kandi, Danieli yakulikhwa Beliteshaza, Hanania namukulikha mbu Shadaraka, Mishaeli namukulikha Meshaki, naye Azaria namukulikha mbu, Abedineko.

⁸ Nebutswa Danieli yalola mbu shinobulayi yefwole khulwa okhulia ebiokhulia ebiomuruchi yalitsangakhwo nende okhunywa idivai eya yanywetsangakhwo tawe. Kho yareeba Ashipenazi amufuchilile aleshe okhwifwola munjila eyo.

⁹ Ne Nyasaye yamukhola Ashipenazi okhukoosia Danieli nende okhumulolela eshisa.

¹⁰ Nebutswa Ashipenazi yaboolela Danieli ari, “Eritsanga omwami wanje khandi omuruchi wanje, okhuba niye owalachilisia khubiokhulia nende ebiokhunywa bienywe. Ne naba nakhulola iwe nong'ayile omubili mubashio bolubakalwo, anyala okhunzira.”

¹¹ Mana Danieli naboolela omulindi wa Ashipenazi yali nareereho okhubalinda ye, Hanania, Mishaeli nende Azaria mbu,

¹² “Chama okhuteemekhwo ifwe abakhalabanibo khulwa tsinyanga ekhumi, okhuhelesinjie butswa tsifwa etsiamasafu nende amaatsi.

¹³ Mana okhuchelasie nababuukha bandi abalitsanga khubiokhulia ebiomuruchi, mana omwene okhukhalachile okhulondana nende lwoba noluutsi.”

¹⁴ Omulindi oyo nafuchilila amakhuwa ka Danieli ako, mana nabateema khulwa tsinyanga ekhumi.

¹⁵ Ne olunyuma lwetsinyanga ekhumi etsio, yabalola nibakaasile khandi emibili chiabwe nichikhomeele okhushila ababuukha bandi boosi abaliitsanga khubiokhulia ebinulu ebiomuruchi.

¹⁶ Kho omulindi oyo nabalekha batsiililile okhulia tsifwa tsiamasafu mushilenje shiokhulia ebiokhulia ebinulu nende idivai.

¹⁷ Nyasaye yahelesia ababuukha abo bane obumanyilisi nende obusitsa mumakhuwa akobusomi nende akobuchesi koosi. Khandi yahelesia Danieli obumanyilisi bwamalolelo nende amalooro.

¹⁸ Olwa emiyika chitaru chiomuruchi yali niyalaka chiali nichihwele, omusinjilili wabalate oyo yareera ababuukha boosi imbeli wa Nebukadineza.

¹⁹ Olwa omuruchi oyo yaboola ninabo boosi, shiyalolakhwo oundi yesi owali nomubili omulayi okhushila Danieli, Hanania, Mishaeli nende Azaria tawe. Kho nibafuchililwa okhukhalabanila omuruchi.

²⁰ Ne mubuli likhuwa liosi eliobuchesi noho eliobumanyilisi eliomuruchi yareebangakhwo, yanyoolanga ababuukha bane abo nibali nobumanyilisi akhandi ekhumi okhushila abafumu nende abalakusi boosi abali mwihangalie.

²¹ Danieli yatsiililila okhumenya munzu yomuruchi okhuula khumuyika kwa Koreshi yachaaka okhuruka Babuloni.