TSINZIKHUULO 1 - IBIBILIA INDAKATIFU DC

Eshibeela shia Yerusalemu

¹ Lolekhwo litookho liali nilietsulamwo abandu, leelo litoonyile likhaya. Litookho liali niliahelesibwa oluyali, leelo lili butswa shinga omukhasi omulekhwa. Litookho liali likhulundu mumatookho koosi, leelo liikholile lisumba liamahanga kandi.

² Likhuula obululu eshilo tulu, amasika kachetulukha khu tsiseya tsialio. Abulaho khubatia balio owokhulilemia omwoyo. Abeetsa balio boosi balikhobile, khandi bakwile abasuku balio.

³ Aboluyia lwa Yuda bayililwe mubuhambe, khulwokhusandibwa nende okhukhola emilimo emisiro. Bulano bamenyile mumahanga kandi, shibalikhwo nende habundu hokhuhuluushila tawe. Abasuku babwe babahulile, nibali hakari wokhunyakhana khwabwe.

⁴ Emihanda chiokhutsia mwitookho lia Zayuni chiikhuula, okhuba abulaho ouchendangakhwo natsia mumasabo amakhulundu. Habiliibwa habakofu bekhalanga hasikala ebikhaya, nabo abesaaliisi balio babindanga. Abakhaana balio abashisila bali mushibeela, nalio litookho liene linyakhananga muno.

⁵ Abasuku balio bulano nibo abalirukanga, khandi barabaalanga. OMWAMI Nyasaye yalikhola okhunyakhana, khulwa obunji bwobumayanu bwalio. Abaana balio bayililwe mubuhambe, ne bayililwe mubuhambe ehale.

⁶ Oluyali lwabandu ba Yerusalemu lurulileho lwosi. Abakhulundu balio bali shinga tsimbongo etsibula obwayilo, beelukha tsimbilo nibabula amaani, okhurula khu abo ababatafinjia.

⁷ Yerusalemu nilili mubusandibwi nende mubutinyu, liitsulilanga tsinyanga tsialio tsiakhale tsioluyali. Olwa Yerusalemu liakwa mumakhono kabasuku balio, abulaho owaliho okhulihabina. Abasuku balio batseshelela okhukwa khwalio.

⁸ Yerusalemu liakhola obwonooni obunji, kho likwiile limayanu. Abali nibalihelesia oluyali, bulano balichaaya, okhuba baluutsi eshiechenye shialio. Bulano abeene bashenyanga nibeefisa obweni bwabwe khulweshifwimbwa murwe, khulwa okhubisa eshifimbwa murwe shiabwe.

⁹ Eshifwabi shialio shialolekha habulafu mutsingubo tsialio, khandi shiliateeba eshindu khu akobulamu bwalio bwolunyuma tawe; Okhukwa khwalio khwali okhubi muno, ne abulaho owa okhulileemia omwoyo. Kho lihaba niliboola liri, “Iwe OMWAMI Nyasaye, lolakhwo amatinyu kanje, omusuku wanje amalile okhuuhula”.

¹⁰ Abasuku balio babambuule emikhono, kho mbu babukule biolukoosi bialio biosi. Lialuutsi kata abamahanga nibenjila muhekalu, abandu aba OMWAMI Nyasaye yaloba mbu balasangakhwo halala nende aba omukandakwe tawe.

¹¹ Abandu ba Yerusalemu boosi bashenyanga, olwa bakhaaba ebiokhulia, bakulaasinjia ebindu biabwe ebiolukoosi khulwa okhunyoola ebiokhulia, nende khulwa okhunyoola amaani. Likhuula niliboola liri, “Iwe OMWAMI Nyasaye, lolakhwo shinga olwa enjaaywa mushialo”.

¹² Lihaaba niliboolela ababiri liri, “Inywe ababiri, shimuteebakhwo eshindu ta? Alikhwoho ouli neshibeela shinga eshia OMWAMI Nyasaye yandereera, khunyangaye ya lirumalie lilulu?

¹³ Yaruma omulilo okhurula ikulu, omulilo okwasamba okhuula mumakumba kanje; Yareka omureko mubilenje bianje, niyangalusia inyuma. Mana niyandekha nefwile omwoyo, ne nimba omuteshele eshiteere shiosi.

¹⁴ Yabala obwonooni bwanje bwosi, mana nabwiboha halala obutinyu, ne nabwira mwikosi lianje shinga likokolo, obusiro obwa likokolo elio nibumala amaani kanje. OMWAMI yandekha mumakhono kabandu, aba ndalanyala okhwitika okhulwana ninabo ta.

¹⁵ OMWAMI Nyasaye yafuubile ehale abalindi banje abamaani, yaruma abelihebe okhusasia abaraaka abanindanga. Khandi naraho ebise biokhumbelesia eshinyasio, ebise biokhumulula abaraaka banje abanindanga. OMWAMI yasenachiile hasi abandu banje ba Yuda, shinga ousenachila tsinzabibu mushitiinyilo shieidivai.

¹⁶ Khulweshio ndikhuula nendila, amasika kachetulukha okhurula mu tsimooni tsianje, embula owokhuleemia omwoyo, embula owokhumeeta amaani. Abaana banje baleshilwe ababisandu, okhuba omusuku wanje yahulile.

¹⁷ Ebambula amakhono kanje, nebutswa abulaho owokhuleemia omwoyo. OMWAMI Nyasaye yalachilisiye abamenyani banje okhuba abasuku banje. Isie Yerusalemu ndakwiile butswa shinga eshindu shieshisinyo imbeli wabwe.

¹⁸ Nebutswa OMWAMI Nyasaye ali habwene okhumbelesia eshinyasio, okhuba ndakhaya okhuhulila lilakolie. Recheresie inywe abandu boosi, lole amanyakhano kanje. Abaana banje abaraaka, abaana banje abasiani nende abakhaana bayililwe mubuhambe.

¹⁹ Ndahabila abaheelwa banje, nebutswa bangaatia butswa, Abesaaliisi banje nende abakhulundu banje bafwilile mwitookho nibakhaabanga ebiokhulia ebiokhubameeta amaani.

²⁰ OMWAMI Nyasaye, lola shinga olwa endi mumatinyu, omwoyo kwanje kunyakhana khulwa obusalili, omwoyo kwanje kufwile, okhuba ndakhukholile obwonooni obubi. Elwanyi khumihanda olukanga nilwo oluliyo, namwo munzu mukari olufu lwitsulemwo.

²¹ Recheresia okhushenya khwanje, shiendi nende owokhunemia omwoyo ta. Abasuku banje boosi bahuliile akamanyakhano kanje; nabo basangalile shichila okholile kano. Oleere inyanga yeinduukho ya walaka, mana obakhole banyakhanekhwo boosi shinga olwa enyakhananga.

²² Reera obwonooni bwabwe bwosi imbeliwo, bahelesie eshinyasio shinga eshia wambelesia isie khulwa obumayanu bwanje bwosi. Eshenyanga muno khulwa obutsunwi, khandi omwoyo kwanje nomuteshele.”