OBUBALI 1 - IBIBILIA INDAKATIFU DC

Okhubalwa khwambeli okhwa Abaisiraeli

¹ Khunyanga yambeli eyomwesi kwakhabili mumuyika kwakhabili olunyuma olwa Abaisiraeli okhurula mushialo shia Misiri, OMWAMI Nyasaye yaboola nende Musa nali mwiheema litakatifu mushitsiimi shia Sinai ari,

² “Iwe nende Haroni mubale abandu ba Isiraeli mutsinzu tsiabwe nende mubilibwa biabwe, muhandiche ameera kabasaatsa boosi,

³ abali nemiyika amakhumi kabili nende okhubisiaho, abanyala okhutsia mwihe.

⁴ Muboolele omusaatsa mulala okhurula mubuli oluyia ouli omwimilisi okhumukhoonya.

⁵ Ne kano niko ameera kabasaatsa abali abemilisi abetsa okhumukhoonya omulimo kuno; Okhurula muluyia lwa Rubeni, ni Elizeri omusiani wa Shedeuri.

⁶ Muluyia lwa Simeoni, ni Shelumieli omusiani wa Zerishadayi.

⁷ Muluyia lwa Yuda ni Nashoni omusiani wa Aminadabu,

⁸ Muluyia lwa Isakari ni Netsanieli omusiani wa Zuhari.

⁹ Muluyia lwa Zebuluni ni Eliabu omusiani wa Heloni.

¹⁰ Muluyia lwa Efuraimu ni Elishama omusiani wa Amihudi, ne muluyia lwa Manase ni Gamalieli omusiani wa Pedahazuri.

¹¹ Muluyia lwa Benjamini ni Abidani omusiani wa Gideoni.

¹² Muluyia lwa Dani ni Abiezeri omusiani wa Amishadayi

¹³ Muluyia lwa Asheri ni Pagieli omusiani wa Okurani.

¹⁴ Muluyia lwa Gadi ni Elisafu omusiani wa Deuheli.

¹⁵ Ne muluyia lwa Nafutali ni Ahira omusiani wa Enani.”

¹⁶ Abo nibo abaahulwa okhurula mumukanda, abali abemilisi betsimbia nende tsikholo tsia Abaisiraeli.

¹⁷ Musa nende Haroni babukula abasaatsa abali nibaahulwe abo,

¹⁸ nikhung'asia halala abomukanda kwosi khunyanga yambeli yomwesi kwakhabili, ne nahandichisia abandu boosi okhuloondana nende oluyia nebilibwa biabwe. Ameera kabwe okhurula khubemiyika amakhumi kabili nende okhushilaho kabalwa nende okhuhandichisibwa,

¹⁹ shinga olwa OMWAMI Nyasaye yali nalachilisiye Musa. Kho Musa nabala abandu mushitsiimi shia Sinai.

²⁰ Abandu abomuluyia lwa Rubeni owambeli muluyia lwa Isiraeli; abasaatsa abali abemiyika amakhumi kabili nende okhushilaho, abali nibanyala okhutsia mwihe babalwa okhulondana nebilibwa biabwe netsinzu tsiabwe.

²¹ Aboluyia lwa Rubeni boosi bali abandu ebikhumila amakhumi kane nabisasaba nende ebikhumi birano (46,500).

²² Abandu abomuluyia lwa Simeoni abasaatsa abali abemiyika amakhumi kabili nende okhushilaho, abali nibanyala okhutsia mwihe babalwa okhuloondana nebilibwa biabwe netsinzu tsiabwe.

²³ Abandu boluyia lwa Simeoni bali abandu ebikhumila amakhumi karano nashienda nende ebikhumi bitaru. (59,300).

²⁴ Abandu aboluyia lwa Gadi abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe,

²⁵ Aboluyia lwa Gadi bali abandu ebikhumila amakhumi kane na birano nende ebikhumi bisasaba namakhumi karano. (45,650).

²⁶ Abandu aboluyia lwa Yuda abasaatsa abali abemiyika amakhumi kabili nende okhushilaho, abali nibanyala okhutsia mwihe babalwa okhuloondana nebilibwa biabwe netsinzu tsiabwe;

²⁷ Aboluyia lwa Yuda bali abandu ebikhumila amakhumi masafu na bine nende ebikhumi bisasaba. (74,600).

²⁸ Abandu boluyia lwa Isakari abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe.

²⁹ Aboluyia lwa Isakari bali abandu ebikhumila amakhumi karano na bine nende ebikhumi bine. (54,400).

³⁰ Abandu aboluyia lwa Zebuluni abasaatsa abali abemiyika amakhumi kabili nende okhubisiaho, bali nibanyala okhutsia mwihe babalwa okhuloondana nebilibwa biabwe netsinzu tsiabwe.

³¹ Aboluyia lwa Zebuluni bali abandu ebikhumila amakhumi karano na musafu nende ebikhumi bine. (57,400)

³² Abandu boluyia lwa Yosefu, abomuluyia lwa Efuraimu abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe.

³³ Aboluyia lwa Efuraimu bali abandu ebikhumila amakhumi kane nende ebikhumi birano (40,500).

³⁴ Abandu boluyia lwa Manase abasaatsa abali abemiyika amakhumi kabili nende okhubisiaho, abali nibanyala okhutsia mwihe babalwa okhuloondana nebilibwa biabwe netsinzu tsiabwe.

³⁵ Abandu boluyia lwa Manase bali abandu ebikhumila amakhumi kataru na babili nende ebikhumi bibili, (32,200).

³⁶ Abandu boluyia lwa Benjamini abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe.

³⁷ Aboluyia lwa Benjamini bali abandu ebikhumila amakhumi kataru na birano nende ebikhumi bine. (35,400)

³⁸ Abandu aboluyia lwa Dani abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe.

³⁹ Aboluyia lwa Dani bali abandu ebikhumila amakhumi kasasaba na bibili nende ebikhumi musafu (62,700).

⁴⁰ Abandu boluyia lwa Asheri abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe.

⁴¹ Aboluyia lwa Asheri bali abandu ebikhumila amakhumi kane na shilala nende ebikhumi birano. (41,500)

⁴² Abandu boluyia lwa Nafutali abasaatsa abali abemiyika amakhumi kabili nende okhubisiaho abali nibanyala okhutsia mwihe babalwa okhuloondana nebilibwa biabwe netsinzu tsiabwe.

⁴³ Aboluyia lwa Nafutali bali abandu ebikhumila amakhumi karano na kataru nende ebikhumi bine (53,400).

⁴⁴ Abasaatsa bano nibo aba Musa nende Haroni babala, nibakhoonywa nende abemilisi ekhumi nababili aboluyia lwa Isiraeli, shiamulala nasinjililanga abeshilibwashie.

⁴⁵ Kho boosi ababalwa mu Isiraeli abali abemiyika amakhumi kabili nende okhubisiaho abali nibanyala okhutsia mwihe,

⁴⁶ boosi halala bali abandu ebikhumila ebikhumi bisasaba na bitaru nende ebikhumi birano namakhumi karano. (603,550)

⁴⁷ Nebutswa aboluyia lwa Lawi shibabalwa halala nende Abaisiraeli bashiabwe tawe.

⁴⁸ Shichila OMWAMI Nyasaye yali niyaboolela Musa ari,

⁴⁹ “Shiolabala aboluyia lwa Lawi, kata okhukhaaba obunji bwabwe muboluyia lwa Isiraeli tawe.

⁵⁰ Nebutswa waahule Abalawi okhusinjilila amakhuwa akeliheema lianje litakatifu nende ebimanulwa bialio, nende okhulikhalabanila khandi balombakha amatili kabwe nikabotokhaane liheema elo.

⁵¹ Buli olwa muhuyia ikambi yenywe, Abalawi nibo abaleeshinjia liheema elo hasi nende okhulisinjisia khandi aha muba nimukhoma ikambi yenywe. Ne omundu undi yesi naba natsia ahambi khulio okhuula yerwe.

⁵² Abandu ba Isiraeli mumikanda chiabwe balasinjisia amaheema kabwe, buli mundu nelitililie khandi buli mundu neipenderaye.

⁵³ Nebutswa Abalawi balombakha amatili kabwe nibabotokhana liheema lianje litakatifu nibalilinda, kho mbu omundu undi yesi aleshe okhusita ahambi khulio nachila oburuma bwanje nibusambishila Abaisiraeli.”

⁵⁴ Kho abandu ba Isiraeli nibakhola buli shindu shinga olwa OMWAMI Nyasaye yali nalachile Musa.