OBADIA 1 - IBIBILIA INDAKATIFU DC

OMWAMI Nyasaye alahelesia Edomu eshinyasio

¹ Kano niko amalolelo komulakusi Obadia. OMWAMI Nyasaye aboola kano khwihanga lia Edomu, ne omurume urumilwe khumahanga okuboola ari, “Buushe, chende khutsie khuseere Edomu!”

² OMWAMI Nyasaye aboolela lihanga elia Edomu ari, “Ndalakhukhola okhuba lihanga litutu mumahanga kandi; Buli omundu alakhulechelesia.

³ Okhwichinjimisiakhwo khukhukaatiiye, iwe oumenyanga mulukoba lwolwanda, iwe owa eshimenyeshio shili ikulu mubikulu. Wiboolelanga mu mwoyo mukari ori; ‘Niwiina ounyala okhungwisia hasi okhurula hekulu hano?’

⁴ Kata niwakhakaasia eshimenyeshio shibe ikulu shinga eshia indutsu, kata eshitsushio nishiakhaba mutsing'ining'ini, ndalakhwishia hasi okhurula ebweneyo. Nolwa isie OMWAMI Nyasaye emboola.

⁵ Abeebi nibamuseera, kata abanuuli nibetsa mushilo, babukulanga butswa eshia beenya. Abachesi ba tsinzabibu balekhakhwo etsindi munyuma, etsiokhuruluma? Nebutswa inywe abasuku benywe bamusasiliye elala pe.

⁶ Inywe abolwibulo olwa Esau, emiandu chienywe chibukuulwe, amabishilo kenywe koosi kayaayilwe!

⁷ Abetsa benywe boosi bamukaatiye, bamulondile nibamurusia mushialo shienywe. Abandu abamenyanga ninenywe mumulembe bamukalukhanekhwo, abetsa benywe aba mwalitsanga ninabo omukaate, bamurechile neshireko, nenyu shimumanyilekhwo eshindu ta.

⁸ Khunyanga ya ndilihaana eshinyasio khu Edomu, ndilimulula abandu babwe abachesi, ndilimulula abobumanyilisi babwe boosi.

⁹ Abalwani abalulu ba Temani balatiilwa noburi, ne buli omulwani mu Edomu aleerwa.”

Obwonooni obuchila Edomu nilinyoola Eshinyasio

¹⁰ Khulwa okhubeela amabi nende obwiiri bwa mwakholela abashienywe abolwibulo lwa Yakobo, muleerwa nende okhunyoola eshifimbwa murwe inziayo.

¹¹ Khunyanga eyo, mwasinjila ehale, olwa abasuku babwe betsa nibayaaya emiandu chiabwe, olwa benjila nibafunaka ebilibwa biabwe nibabukula emiandu chiabwe. Bakhupa ikha khulwa okhukabana emiandu chia Yerusalemu. Kho inywe muli butswa shinga abasuku abo.

¹² Shimwakhekhoyile khunyanga eyo eya abashienywe banyoola amasila ta; kata shimwakhatsaatsahale khunyanga ya abandu ba Yuda banyoola amasila ta. Shimwakheyitsialile olwa abashienywe bali nibasandibungwa ta.

¹³ Shimwakhenjiile mwitookho liabandu banje nimwikhoya, khunyanga ya amasila kabakwiila tawe; Shimwakhasanjile mukhwikhoya khulwa amatinyu ka Yuda tawe, shimwakhayaayile emiandu chiabwe khu inyanga eyo eyamasila kabwe ta.

¹⁴ Shimwakhasinjiile khumasanganjila, khulwa okhutiila abali nibehonokosinjia ta, kata okhuhaana abandu abali nibatoonyile khubasuku babwe ta.

OMWAMI Alakhalachila Amahanga Eshiina

¹⁵ Inyanga eya OMWAMI Nyasaye, eya isie okhukhalachila amahanga koosi eshiina yili ahambi. Shinga olwa mwakholela abashienywe, nolwa siesi ndalamukholela endio, mularungwa omurungo okhulondana nebikhole bienywe.

¹⁶ Okhuba shinga olwa abandu banje banywa eshikombe shieshinyasio, khushikulu shianje eshitakatifu, nolwa abandu bamahanga akarondakhane ninabo boosi balanywa bario; Balanywa bunywa nibakhamulukha.

Obuhuli Obwa Abaisiraeli

¹⁷ “Nebutswa khu eshikulu shia Zayuni, baliho abandi abalihonokokha, nashio eshikulu eshio shiakhabe eshitakatifu. Mana abolwibulo lwa Yakobo bakhabukule khandi eshialo shia bali nibanulwa.

¹⁸ Aboluyia lwa Yuda bakhabe omulilo, aboluyia lwa Isiraeli bakhabe olumemu lwomulilo, balisamba nende okhumulula aboluyia lwa Esau, abaliyia nibalala shinga amakata; shiyakhabeho kata mulala khubo owakhahonokoshe ta, okhuba nisie OMWAMI Nyasaye ouboolile.

¹⁹ Abandu aba elubeka lwa Mumbo Emulambo lwa Yuda bakhabukule eshialo shieshikulu shia Esau, nabo abamenyanga hasi webikulu bia Mumbo bakhabukule eshialo shia Abafilisiti; Bakhabukule eshia Efuraimu nende eshia Samaria, nabo abandu ba Benjamini bakhabukule eshialo shia Giliadi.

²⁰ Abaisiraeli abali mubuhambe mushialo shia Hala, bakhabukule eshialo shia Foinike okhuula Zarefatsi; Abandu ba Yerusalemu abali mubuhambe mushialo shia Sefaradi bakhabukule amatookho akali elubeka lwemulambo weshialo shia Yuda.

²¹ Abaliba nibahonokoshe balitikulukha nibatsia khu shikulu shia Zayuni mbu baruche aboluyia olwa Esau; naye OMWAMI Nyasaye omwene niye owakharuche lihanga elo.”