MATAYO 1 - IBIBILIA INDAKATIFU DC

Abakuukanyene Yesu Kristo

¹ Tsino nitsio tsinzibulo tsiabakuukanyene Yesu Kristo, owomulwibulo lwa Daudi, owali womulwibulo lwa Aburahamu.

² Aburahamu yali samwana Isaka, naye Isaka yali samwana Yakobo, naye Yakobo yali samwana Yuda nabaana babwe.

³ Yuda yali samwana Perezi nende Zera, ne nyinabwe yali Tamari; naye Perezi yali samwana Hezironi, Hezironi yali samwana Ramu.

⁴ Ramu yali samwana Aminadabu, naye Aminadabu yali samwana Nashoni, Nashoni yali samwana Salimoni.

⁵ Salimoni yali samwana Boazi ne nyinamwana yali Rahabu; Boazi yali samwana Obedi, ne nyinamwana yali Rutsi; Obedi yali samwana Yese.

⁶ Naye Yese yali samwana omuruchi Daudi. Naye Daudi yali samwana Solomoni, owayebula mumukhasi ousika Uria.

⁷ Solomoni yali samwana Rehoboamu; Rehoboamu yali samwana Abiya; naye Abiya yali samwana Asa.

⁸ Asa yali samwana Yehoshafati; Yehoshafati yali samwana Yoramu; Yoramu yali samwana Uzia.

⁹ Uzia yali samwana Yosamu; Yosamu yali samwana Ahazi; Ahazi yali samwana Hezekia.

¹⁰ Naye Hezekia yali samwana Manase; Manase yali samwana Amoni; Amoni yali samwana Yosia.

¹¹ Yosia yali samwana Yekonia nende abaana babwe. Etsio tsiali tsinyanga tsia Abayahudi bahuyilibwamwo nibayilwa mubuhambe Babuloni.

¹² Olunyuma lwokhurula mubuhambe Babuloni; Yekonia yebula Shialitieli; Shialitieli yali samwana Zerubabeli.

¹³ Zerubabeli niyebula Abiudi; Abiudi yali samwana Eliakimu; Eliakimu yali samwana Azori.

¹⁴ Naye Azori yali samwana Zadoki; Zadoki yali samwana Akimu; Akimu yali samwana Eliudi.

¹⁵ Eliudi yali samwana Eleazari; Eleazari yali samwana Matsani; Matsani yali samwana Yakobo.

¹⁶ Yakobo yali samwana Yosefu omusaatsa wa Mariamu, owebula Yesu oulangwa mbu Kristo.

¹⁷ Kho tsinzibulo tsiosi okhurula khu Aburahamu okhuula khu Daudi, tsiali ekhumi natsine; ne okhurula khu Daudi okhuula khu okhuhuyibwa nibayilwa mubuhambe Babuloni, tsiali tsinzibulo ekhumi natsine. Ne okhurula khu okhuhuyibwa nibayilwa Babuloni, okhuula khu okhwibulwa khwa Kristo, tsiali tsinzibulo ekhumi natsine.

Okhwibulwa khwa Yesu Kristo

¹⁸ Bulano, okhwibulwa khwa Yesu Kristo khwali khuri nanwa. Olwa Mariamu, nyinamwana Yesu yali nashikhwebungwa nende Yosefu, nibashili okhuteshiania, yanyoolekha nali inda eya Roho Omutakatifu.

¹⁹ Yosefu yali omundu omulunjishi, ne nalenya okhufimbia Mariamu omurwe habulafu ta, kho napaara okhulekhana ninaye masiliisi.

²⁰ Nebutswa olwa yali nashipaaranga ario, omumalaika owa OMWAMI Nyasaye yamuloleshela mumalooro, namuboolela ari, “Yosefu, iwe owomulwibulo lwa Daudi, olaria okhuteshia Mariamu tawe. Okhuba, inda eya ali ninayo neya Roho Omutakatifu.

²¹ Ne alebula omwana omusiani, nawe olamukulikha eliira mbu, Yesu, shichila niye owakhahonie abandube okhurula mubwonooni bwabwe.”

²² Ako koosi kekholekha khulwa okhuusia aka OMWAMI Nyasaye yali niyaboola okhubirira khumulakusi ari,

²³ “Omukhaana omushisila yakhahele inda, niyebula omwana omusiani, ne yakhakulikhwe eliira mbu, Emanueli” (eshisina mbu, “Nyasaye ali halala ninefwe.”)

²⁴ Olwa Yosefu yabuukha mundoolo, yabukula Mariamu okhuba omukhasiwe, shinga lwomumalaika owa OMWAMI Nyasaye yali namubooleele.

²⁵ Nebutswa shiyamukonakhwo ta, okhuula olwa yali niyebuule omwana omusiani. Mana Yosefu namukulikha eliira mbu, Yesu.