LUKA 1 - IBIBILIA INDAKATIFU DC

Akaranjilila

¹ Yule khu owoluyali Tseofilo. Abandu abanji bateema aka banyala koosi okhuhandika amakhuwa kekholekha mwifwe.

² Bahandika khu aka khwahulila okhurula khu abakalola nikekholekha okhurula mukhuchaaka khwako mana khandi nibakayaala.

³ Khulweshio, okhuba isie omwene ndarunilisiye obulayi amakhuwa ako koosi okhurula mukhuchaaka khwako, ne lindoleshela siesi khandi nilili lilayi mbu, ekhuhandichile obulayi iwe owoluyali Tseofilo, nekhwinoosia shinga olwa kekholekha.

⁴ Ekholanga endio kho mbu iwe omanyile elala obwatieli bwamakhuwa kawechesibwa.

Omumalaika Gaburieli arumbula akokhwibulwa khwa Yohana Omubatiisi

⁵ Mutsinyanga tsia Herode yali omuruchi weshialo shia Yuda, yaliho omwisaaliisi owalangwa mbu Zakaria, owomulwibulo lwobwisaaliisi lwa Abiya. Omukhasiwe yalangwa mbu Elisabeti, owomulwibulo lwa Haroni.

⁶ Boosi bali abalunjishi imbeli wa Nyasaye, khandi bamenyanga okhulondana nende amalako nende amechesio aka OMWAMI Nyasaye nibalalikhwo neshikha shiosi shiosi tawe.

⁷ Habula shibalikhwo nende omwana ta, okhuba Elisabeti yali omukumba khandi boosi bali abakofu muno.

⁸ Olundi, olwa inyanga ya Zakaria, eyokhukhalabana muhekalu emilimochie chiobwisaaliisi yola,

⁹ Zakaria yalobolwa munjila yokhukhupa ikha, okhutsia muhekalu eya OMWAMI Nyasaye okhusamba obubane khushimalilo shiemisango, shinga olwa eshiima shiobwisaaliisi shialinji.

¹⁰ Olwa obubane bwali nibusabungwa, abandu abanji bali elwanyi nibasaayanga.

¹¹ Omumalaika owa OMWAMI Nyasaye, owali nasinjiile khulubeka lwomukhono musaatsa kweshimalilo shiemisango shiobubane, yaloleshela Zakaria.

¹² Ne olwa Zakaria yamulola, yesundukha muno, mana oburi nibumutiila.

¹³ Nebutswa omumalaika oyo yamuboolela ari, “Shiolaria ta, Zakaria! Nyasaye ahuliile amasaayoko, ne omukhasiwo Elisabeti nakhwibulile omwana omusiani. Nawe nomukulishe eliira mbu, Yohana.

¹⁴ Niwikhoye notsaatsahala, khandi abandu bandi abanji nibekhoye lwomwana oyo nabe niyebuulwe.

¹⁵ Okhuba Yohana aliba omundu omukhongo mumoni etsia OMWAMI Nyasaye. Shiyakhanywekhwo idivai, kata eshiokhunywa shindi shiosi shiosi eshiokhumeesia tawe. Khandi niyetsulemwo Roho Omutakatifu kata nashili munda mwa nyinamwana.

¹⁶ Ne nakhole abandu ba Isiraeli abanji okhumukalushila OMWAMI Nyasaye wabwe.

¹⁷ Ne niyetsuulemwo Roho Omutakatifu nende obunyali shinga bwomulakusi Eliya yali nabwo, naranjilile okhutsia okhusaasania abasamwana abaana nende abaana babwe halala nende okhukalusia abakhayi, nabakhola okhuyililisia akobulunjishi, Yesu mwene nashili okhwitsa. Ne alirecheshela Omwami Yesu abandu, Yesu mwene nashili okhwitsa.”

¹⁸ Mana Zakaria nareeba omumalaika oyo ari, “Nishiina eshilachila emanye mbu amakhuwa ako nakobwatoto? Okhuba isie endi omukofu, ne khandi omukhasi wanje nomushiele muno.”

¹⁹ Omumalaika oyo namukalusia naboola ari, “Nisie Gaburieli, ousinjilanga imbeli wa Nyasaye. Isie erumilwe okhuboola ninawe nende okhukhureerera amakhuwa amalayi ako.

²⁰ Ne okhuba shiokasuubililiile ta, lola, olulimilwo lulahanda ne khandi shiolanyalilwa okhuboola ta, okhuula olwa amakhuwa kanje kekhubooleele ako, kakhoosibwe ebise biako nibiakhoola.”

²¹ Abandu abali nibali elwanyi weihekalu, nibashilindililanga Zakaria bahuka muno shichila yali nashindile muhekalu.

²² Ne olwa yarulamwo, shiyali ounyala okhuboola ninabo ta, ne nibamanya mbu, amanyibwe lilolelo muhekalu. Yabachelela butswa amakhuwa namakhonoke, okhuba shiyali ounyala okhuboola tawe.

²³ Ne olwa tsinyangatsie tsiokhukhalabana muhekalu tsiali nitsihwele, Zakaria yarula natsia ingowe.

²⁴ Ne olunyuma lwetsinyanga tsindiiti, omukhasiwe Elisabeti yahela inda, mana khulwemiesi chirano nalarulakhwo elwanyi tawe. Yebisa butswa munzumwe ne naboola mumwoyokwe ari,

²⁵ “Bulano, Omwami yanzitsuliile, ne yarusiyekhwo tsisoni mubandu!”

Omumalaika Gaburieli arumbula akokhwibulwa khwa Yesu

²⁶ Mumwesi kwakhasasaba okhurula olwa Elisabeti yali nahelile inda, Nyasaye yaruma omumalaika Gaburieli mwitookho lilangwa mbu, Nazareti, mulukongo lwa Galilaya.

²⁷ Nyasaye yamuruma okhutsia khumukhaana omushisila, owali nashikhwebungwa nende omusaatsa, owalangwa mbu Yosefu, owomulwibulo lwa Daudi. Ne eliira liomukhaana omushisila oyo liali, Mariamu.

²⁸ Omumalaika oyo natsia naboolela omukhaana oyo ari, “Omulembe kube khwiwe! Omwami ali ninawe khandi akhuhelesiye tsikhabi tsinyinji!”

²⁹ Mariamu yesundukha muno khulwa amakhuwa aka omumalaika oyo yali namubooleele, okhuba shiyamanya eshisina shiamakhuwa ako tawe.

³⁰ Mana omumalaika oyo namuboolela ari, “Shiolaria ta, Mariamu, okhuba OMWAMI Nyasaye akhukoosiye.

³¹ Ne lola, olahela inda, ne olebula omwana omusiani, mana olamukulikha eliira mbu, Yesu.

³² Omwana tsana oyo yakhabe omundu woluyali khandi yakhalangwe mbu, Omwana wa Nyasaye, ouli Omukhongo Muno. OMWAMI Nyasaye Yakhamukhole okhuba Omuruchi, shinga olwa Daudi kuukanyene yali.

³³ Ne yakhabe omuruchi khubolwibulo lwa Yakobo okhuula inziayo. Khandi oburuchibwe shibwakhabekhwo neshiakamo tawe!”

³⁴ Mariamu naboolela omumalaika oyo ari, “Ako kakhanyalikha karie, olwa isie eshili omushisila?”

³⁵ Naye Omumalaika oyo namukalusia ari, “Roho Omutakatifu alakhwitsila, nabwo obunyali bwa Nyasaye ouli Omukhongo Muno bulaba khwiwe. Khulweshio, omwana oulebulwa oyo alalangwa mbu, omutakatifu, Omwana wa Nyasaye.

³⁶ Ne lola, kata omwikhowo Elisabeti mubushielebwe yesi ali inda yomwana omusiani, eyemiesi chisasaba, ne abandu bali nibamanya mbu nomukumba.

³⁷ Okhuba khu Nyasaye, buli shindu shinyalikha.”

³⁸ Mariamu naboola ari, “Esie endi omukhalabani owa OMWAMI Nyasaye, lekha kekholeshe khwisie shinga olwoboolile.” Mana omumalaika oyo narulaho natsia.

Mariamu acheniha Elisabeti

³⁹ Olunyumakhwo, Mariamu yarula natsia bwangu mwitookho liomushialo shiomubikulu, eshia Yuda.

⁴⁰ Niyenjila munzu mwa Zakaria, nashiesia Elisabeti.

⁴¹ Ne olwa Elisabeti yahulila amashiesio aka Mariamu, omwana yerunda mundamwe, mana Elisabeti niyetsulwamwo Roho Omutakatifu,

⁴² ne naboola nomwoyo omukhongo ari, “Oli oweikhabi muno mubakhasi boosi, khandi omwana owolebula noweikhabi muno!

⁴³ Ne likhuwa likhongo lino linzitsiile lirie mbu, nyinamwana Omwami wanje yetsile okhunjeniha?

⁴⁴ Okhuba lola, olwa embuliile amashiesioko, ne omwana niyerunda munda mwanje khulwa okhwikhoya.

⁴⁵ Oli oweikhabi okhuba osuubile mbu, aka Omwami yakhuboolela kaloosibwa!”

Olwimbo lwa Mariamu lwokhwitsoomia Nyasaye

⁴⁶ Mana Mariamu naboola ari, “Omwoyo kwanje kwitsoomia Omwami,

⁴⁷ khandi kwikhoyela Nyasaye, omuhonia wanje.

⁴⁸ Shichila yanzitsuliile isie omukhalabaniwe omuholo! Okhurula bulano abandu boosi balananga mbu, oweikhabi.

⁴⁹ Shichila Nyasaye owobunyali, yakholeele akamakana, eliiralie nalio nilitakatifu.

⁵⁰ Tsimbabasitsie tsibetsangaho khubenabo abamuriitsanga okhuula khutsinzibulo tsiosi.

⁵¹ Yakholile akamakana mubunyalibwe, nasalaasia abechinjimisi mubuyililisi bwomumioyo chiabwe.

⁵² Yayiniye abaruchi khubifumbi biabwe bioburuchi, ne niyemekha abaholo.

⁵³ Abali inzala yabekusiye nende ebindu ebilayi, nabo abayinda yabaseebuule amakhono amakhaya.

⁵⁴ Yayetsuliile obusuubisiebwe bwetsimbabasi khubakuuka befwe ne nahabina Abaisiraeli, abakhalabanibe.

⁵⁵ Yayetsuliile aketsimbabasitsie khu Aburahamu nende abolwibulolwe ebisoni nebisoni!”

⁵⁶ Mana Mariamu namenya nende Elisabeti khulwemiesi chitaru, ne nakalukha ewuwe.

Okhwibulwa khwa Yohana Omubatiisi

⁵⁷ Mana induukho ya Elisabeti okhwibula omwana niyula. Ne niyebula omwana omusiani.

⁵⁸ Abamenyanibe nende abekhobe nibahulila shinga olwa OMWAMI Nyasaye yali namuhelesiye tsikhabi tsinyinji, ne boosi nibekhoya halala ninaye.

⁵⁹ Mana khunyanga yomunane, nibetsa okhusheba omwana tsana. Ne bali nibenya okhumukulikha eliira lia samwana mbu, Zakaria.

⁶⁰ Nebutswa, nyinamwana nakaana naboola ari, “Tawe. Alalangwa mbu, Yohana.”

⁶¹ Nibamuboolela bari, “Shimulikhwo nomwikho mwinywe oweliira elo ta!”

⁶² Kho nibachelela samwana namakhono okhumureeba mbu, aboole eliira liomwana akhoyile okhukulikhwa.

⁶³ Naye Zakaria nabasaba akhabao khokhuhandikakhwo, nahandikakhwo ari, “Alalangwa mbu, Yohana.” Mana boosi nibahuka muno.

⁶⁴ Habwenaho olulimilwe nilubohololokha, nachaaka okhuboola khandi, ne niyetsoomia Nyasaye.

⁶⁵ Abamenyanibe nibaba noburi obunji, mana amakhuwa ako nikasalaana mutsingongo tsiomushialo shiomubikulu eshia Yuda eshio shiosi.

⁶⁶ Boosi abakahulilakhwo, nibakayililisia mumioyo chiabwe nibeereeba bari, “Omwana uno aliba owambia shiina?” Okhuba obunyali obwa OMWAMI Nyasaye bwali muye.

Olwimbo lwa Zakaria

⁶⁷ Roho Omutakatifu niyetsula mu Zakaria, samwana Yohana, mana niyetsoomia Nyasaye naboola ari,

⁶⁸ “Khwitsoomie OMWAMI Nyasaye, Nyasaye wa Isiraeli, okhuba yacheniihe abandube khandi nabanunula.

⁶⁹ Yakhuhelesiye omuhonia wobunyali, okhurula mulwibulo lwomukhalabaniwe Daudi.

⁷⁰ Yalachilisia khale okhubirira mubalakusibe abatakatifu mbu,

⁷¹ alikhuhonokosia okhurula mubasuku befwe, nende okhurula khubunyali bwabakhusila ifwe.

⁷² Yaboola mbu, alibeela abakuuka befwe tsimbabasi, nende okhuliinda indakanoye indakatifu.

⁷³ Okhubirira mushitsubo eshiayetsubila Aburahamu kuuka wefwe,

⁷⁴ yasuubisia mbu, alikhuhonia okhurula khubasuku befwe, mana khumukhalabanile nikhubula oburi,

⁷⁵ kho mbu, khube abatakatifu khandi khube abalunjishi imbeliwe mubulamu bwefwe bwosi.

⁷⁶ “Nawe iwe mwana wanje, olalangwa mbu, omulakusi wa Nyasaye, Omukhongo Muno. Olaranjilila okhutsia okhukaasia tsinjila etsia Omwami Yesu abirirakhwo, omwene nashili okhwitsa,

⁷⁷ okhuboolela abandube mbu, balahonibwa khulwa okhuleshelwa obwonooni bwabwe.

⁷⁸ Nyasaye wefwe nowetsimbabasi khandi nomuholo, yakhakhole obulafu obuyia bwobuhonia okhukhwashila ifwe,

⁷⁹ ne bwakhaashe okhurula mwikulu, khuboosi abamenyanga mushiilima shielifwa, nende okhukhwimilila khunjila yomulembe.”

⁸⁰ Mana omwana oyo nakhula, niyemeeta amaani mumubili nende muroho. Namenya mushitsiimi okhuula khunyanga eya yalolekha habulafu khubandu ba Isiraeli.