FILEMONA 1 - IBIBILIA INDAKATIFU DC

¹ Eyirula khwisie Paulo, omubohe khulwa Kristo Yesu khandi eyirula khu musiani wefwe Timotseyo. Yule khu Filemona omwitsa khandi omukholi washiefwe mu Kristo.

² Yulile khahdi abeikanisa abakhung'anilanga munzumwo, nende khu Apofia Omukhaana wefwe khandi khu Arikipo oukhalabananga obutinyu halala ninefwe.

³ Nyasaye Sefwe nende Omwami wefwe Yesu Kristo bamuhelesia obukoosia nende omulembe.

Obuheeli bwa Filemona nende obusuubilibwe

⁴ Owefwe Filemona ekhupilanga Nyasaye orio buli nyanga nekhwitsulila mumasaayo kanje.

⁵ Eshichilanga nekhupila Nyasaye orio, embulilanga amakhuwa kobuheeli kokholelanga abasuubili boosi nende obusuubili bwoli ninabwo mu Omwami Yesu halala nende abasuubili boosi.

⁶ Ne khandi esaayanga mbu obusanjilani bwefwe ninawe shinga abasuubili, bukhoya bwakhurerera obumanyilisi obwiyinikhu bwetsikhabi tsiosi etsiakhuli ninatsio mubulamu bwefwe mu Kristo.

⁷ Omwana wefwe omuheelwa, obuheelibwo bwanderere omwikhoyo omukhongo nende okhundinyilisia muno, shichila emioyo echiabasuubili boosi chianyolile obutsubi obukali okhurula khwiwe.

Paulo asabila Onesimo tsimbabasi

⁸ Amakhuwa amalayi kokholanga kano niko akachila nimba nende itswoni okhukhulaka shinga omwana wenywe mu Kristo aka okhoyeele okhukhola.

⁹ Nebutswa khulwa okhubela mbu ndakhuheela ekhusaaya busaaya isie Paulo omurumwa wa Kristo Yesu, khandi nendi omubohe khulwa okhurumbula amakhuwa ka Kristo.

¹⁰ Kho ekhusayanga mushilenje shia Onesimo owekholile omwana wanje mu Kristo; okhuba nindi mumbohe ndekholile samwana owa amakhuwa aka roho shichila ndamuyaalile Injiili niyekalukhasia.

¹¹ Khale shiyali owobukhoonyi khwiwe tawe. Nebutswa bulano nowobukhonyi khwisie khandi owobukhonyi khwiwe.

¹² Bulano emurumanga mbu yetse khwiwe khandi omanye mbu ndamuheela nomwoyo kwanje kwosi.

¹³ Ndakhasangalile okhutong'a ninaye hano, olwa eshili mumbohe khulwa okhuyaala Injiili, mbu yakhalabanile mushilenjeshio.

¹⁴ Nebutswa enduutsi shiendong'a ninaye neshili okhukhureebakhwo tawe; kho mbu obulayi obwo khwisie buleshe okhuba obwokhunichilisia nebutswa bube oburula khukhuchamakhwo omwene.

¹⁵ Aundi kanyala okhuba mbu Onesimo yelukha nakhurulakhwo eshise eshitutu mana akhukalushile okhuba omukhalabaniwo buli lwosi.

¹⁶ Bulano Onesimo shiashili butswa omusumbawo ta, habula ashilaho. Nomwana wefwe mu Kristo. Nomuheelwa khwisie muno. Ne khandi alaba obukhoonyi muno khwiwe shinga omubone khandi shinga omusiani wenywe mu Omwami.

¹⁷ Kho niundolangakhwo shinga owobusanjilani bulala ninawe mu Omwami omwinjisie butswa nobuyanzi shinga olwa wakhanzinjisiye isie.

¹⁸ Naba niyakhukholelakhwo libi liosi noho naba nalikhwo nelikofilio liosi wumbanze isie omwene.

¹⁹ Esie Paulo ehandikanga amakhuwa kano nomukhono kwanje omwene: mbu ndakhakhurunje. Toto shikakhoyele mbu nasi ekhwitsusie akandakhukholela tawe okhuba nisie owachila noba Omukristo.

²⁰ Kho mwana wefwe chama ukholele amakhuwa kano khulwa Omwami; kho shinga omuheelwa wanje mu Kristo chama osangasie omwoyo kwanje.

²¹ Emanyile elala mbu, shinga olwa ehandikanga amakhuwa kano, olakhola shinga olwa ekhureebile. Ne khandi emanyile mbu witsa okhukhola akashila aka ekhureebile.

²² Ne halala nende akene ako ekhusayanga mbu ungasiliekhwo habundu hokhwiyalisia; shichila enaayanga mbu, Nyasaye alahulila amasaayo kenywe mwesi mana alafuchilila okhukalukha khwinywe khandi.

Amashesio akahelelesia

²³ Epafura, ouli omubohe halala ninasi khulwa Kristo Yesu, akhushesiye.

²⁴ Khandi kata abakhalabani bashianje Mariko, Arisitariko, Demasi nende Luka boosi bakhushesiye.

²⁵ Obukoosia obwa Omwami wefwe Yesu Kristo bubetsenje khwinywe mwesi pe.