Ɛydin 1 - Ŋwaale Feyin; Kelek Kefɛɛ

¹ Ŋwaale yine suŋnen kum əbnəə wɛ Feyine nè dinen se Jesus Christ ge əb din se ghel ɛyfɛl nə yii, nɛ lu əbnəə wɛ əb shiin se gan. Christ me tum nchiy-ndaa nə wen ɛy ndu è din əbnəə nɛ̂ vin se wel ɛyfɛl nə wene Joon.

² Se lu nɛ Joon dinmen əbnəə wɛ əb nè yɛnen nɛ̂ vin əbjim ɛ ŋwaale fɛn. Əb lu nɛ əb nyakmen sakghɛ ten wɛ Feyine nè dinen se wen gese nɛ̀ əbluuy wɛ Jesus nè dinen se wen.

³ Ke lu kejuŋ se wel wɛ əb jaŋen ŋwaale yin, gese lu kejuŋ se ghel ghɛ ɛ́ yioten kenəə kɛ ɛy suuyen, lɛme se ghene tetem bek ge əbliye se baksene wɛ əbnəə wɛ́ tene əbjime liɛ kelik.

Joon chakte əbnone ghel ɛbeemene saamba

⁴ Lu mɛ Joon nɛ mɛ nyake ŋwaale yin chakte əbnone ghel ɛbeemene wɛ saamba wɛ əb luun ɛ ɛylake Asia. Feyin Fɛ əbyioy wɛ saamba tiyen ɛ wen ɛyshiɛ ko cham ɛysene yɛn è fo əmnyiaŋ se ghɛn. Lu wen wɛ əb luun, wɛ əb nè shiin, nɛ̀ gese lu wen wɛ əb yî yɛ lu. Əbyioy wɛ saamba ko cham sɛy ɛysene yɛn.

⁵ Jesus Christ ko cham ɛysene yɛn, è fo əmnyiaŋ se ghɛn. Lu wen wɛ əb loote dinen əbnəə wɛ kum Feyin se ghɛsen, nɛ̀ gese lu wen wɛ əb saken tefon tɛ te luun ɛ ntiɛ fɛn. Ghɛsen yɛ bene wen wɛ əb nè koŋen ghɛsen è boyse se mbee nɛ̀ əmnduŋ mə wen.

⁶ Bene wen wɛ əb nɛɛyen ghɛsen se lu ɛylake ghele ntaŋle, se yɛ fɛl se Feyin wɛ Ba ə wen. Ɛykokse nɛ̀ əbtaawe yɛ lu se Jesus Christ əbliy əbjim. Amen.

⁷ Yɛn-a! Christ shi se gwiy ɛ məme mbàkse. Wel əbjim nɛ̂y yɛn wen naa nɛ ghel ghɛ ɛ́ nè yuyen wen. Ghel ɛjim ɛ ketuu ntiɛ náà toŋ bek wen. Lu ka ke yî yɛ lu. Amen.

⁸ Bay Feyin Wɛ Ba-Əbtaawe-Əbjime suuy ge: Mɛ lu kenkɛɛte, lu kenləysen, mɛ lu ɛ leenen nɛ mɛ nè shi, nɛ mɛ nɛ̂y yɛ yese lu.

Joon yɛn Jesus

⁹ Lu mɛ Joon wɛ wán-no ə wɛn wɛ ghɛsen chinten è se yɛne ngɛk chiyte ɛysake Feyin gese kule ɛytem bek ka ghɛsen nɛ̀ ghe Christ shiin se kefaa kemok. Ɛ́ nè jum mɛ mɛ diaŋ è se chii ɛylake Batmos yɛ ɛy luun ɛ fetetene jio ɛyghuy bek ka mɛ nè fekten kenəə ə Feyin gese fekte əbluuy wɛ Jesus nè dinen.

¹⁰ Nɛy loo lu ɛ kechii kɛ ɛ́ koksen Feyin ɛ ten, Keyioy ə Feyine nɛɛy mɛ yio giɛ ɛ mɛ ɛybam di-a ka ɛ́ toŋe ɛyshoŋ.

¹¹ Giɛ ten nè suuy ge: Nyake əbnəə wɛ wɛ̀ yɛnen se ŋwaale è tinse se əbnone ghel ɛbeemene wɛ saamba wɛ əb luun ɛ ntɛk sɛ Ɛfesos, nɛ̀ Smilna, nɛ̀ Belgamum, nɛ̀ Tiatila, nɛ̀ Saldis, nɛ̀ Filadelfia gese nɛ̀ Laodisea.

¹² Mɛ loo è benle se yɛn ge sɛ suŋnen ndɛ se mɛ-a è yɛn əbtiɛ saamba wɛ ɛ́ sɛɛ tom əbkaaken ɛ ten nɛ ɛ́ fɛl nɛ̀ ɛytiane.

¹³ Mɛ gese yɛn nɛ kefaa tiy ɛ feteten əbtiɛ fɛy fuosen wel nɛ əb mak ndəyse nɛ se diaf è chin ɛ wen ɛvəə, è tem kekuy ɛ kenkaŋele nɛ ɛ́ fɛl ɛ ɛytian.

¹⁴ Nəŋse ketuu nə wene nè fəfe ka ɛybvəə kene mbàkse, nɛ ɛshiɛ ə wene too ka keleeme əbvəs,

¹⁵ nɛ̀ ɛvəə ə wene njante ka ɛytian yɛ ɛ́ looten nyok, nɛ̀ giɛ ə wen buu ka ɛyfɛy ɛyghuye.

¹⁶ Əb nè ghal əmnjes saamba ɛ wene keghoo kɛ əbkoy əbtaa, fiake tebee tebaa fəy ɛ wen əbchio tofe ge, nɛ ɛykeke wene liake ka chuy.

¹⁷ Mɛ se yɛne gwiye nɛ̀ wen ɛ leghɛ, è fɛy ɛ wen ɛyshiɛ ka kenkuo kefaa, əb lɛm keghoo ə wene kɛ əbkoy əbtaa ɛ mɛ əbghun è suuy ge: Ghàà yɛ fan. Mɛ lu kenkɛɛte gese lu kenləysen.

¹⁸ Mɛ lu wel wɛ kiin wen ɛychii. Mɛ nè lô kuo, se lu nɛ ka ghɛne yɛnen, mɛ se ki ɛychii yɛ ɛy jia yî mɛy. Ki mɛ kediak se kenəə kɛ kum ɛykuo nɛ̀ gese ki mɛ kediak se kelik nə nkfəsayse.

¹⁹ Nyake əbnəə wɛ wɛ̀ yɛnen, kene lu wɛ əb ganenmen, kene lu wɛ əb bo bɛɛyen se gan.

²⁰ Lɛɛ kenlete kenəə kɛ əmnjes mɛ saamba mɛ wɛ̀ kè yɛnen ɛ mɛ keghoo kɛ əbkoy əbtaa gese nɛ̀ əbtiɛ wɛ saamba dinen. Əmnjes mɛ saamba lu nchiyse-ndaa nə Feyine sɛ se kiynen əbnchinten ghel ɛbeemene wɛ saamba, nɛ əbtiɛ əbkaaken wɛ saamba lu əbnchintene ghel ɛbeemene wɛ saamba.