Luk 1 - Ŋwaale Feyin; Kelek Kefɛɛ

Ɛychakte

¹ Babɛy Teofilus; ghel se ɛydio lu nɛ ɛ́ mommen se nyak kum əbnəə wɛ əb nè ganenmen ɛ ghɛsene məm.

² Ghene nè nyak kɛn ghɛɛ-ghɛɛ ka ghel ghɛ ɛ́ nè yɛnen əbnəə wɛ́ tene se kenkɛɛte nè fekten se ghene, me se lu ghel ghɛ ɛ́ fekten nduun nɛ̀ əbnəə nɛ̂ vine.

³ Ke lu Babɛy, nɛ mɛɛ mɛ sɛ̂y lootemen biinen əbnəə nɛ̂ vin naa əbjim se ka əb nè kɛɛten, è me yɛn ge jofe ge mɛ loote siyse əbghene è nyak se wɛ̀.

⁴ Mɛ nyake lɛ ka wɛ̀ me yɛ loote ke əbluuy kum əbnəə wɛ ɛ́ nè dinten se wɛ̀.

Ɛ́ Fekte ɛybii ə Joon Nfoo Moo

⁵ Nè lu əbliy wɛ əbfon wɛ Helod nè saken ɛylake Judea, nɛ wele ntaŋle əblee lu nɛ ɛ́ toŋte ge Zakalia. Əb nè lu ɛ kenon ə ghele ntaŋle kɛ Abija. Əb nè ki əbvii nɛ ɛ́ toŋte ge Elizabet, nɛ lu wán ə Aalon.

⁶ Zakalia ghene Elizabet nè lu ghel ɛjuŋe ɛyshiɛ nə Feyine, yionen se Feyine, lɛme tesak ə Feyin naa tejim, gese ki wiy jas.

⁷ Dî nɛ ghene nè báà se ki ghon bek ka Elizabet nè báà se bii, nɛ ghene gesemen ngɛsen naa se ŋaŋ.

⁸ Naa se lu ɛ kechii kelee əbwɛy wɛ kenon ə Zakalia nè fɛ́len ɛ ndaa-ɛykokse Feyin, Zakalia se siyse ntaŋle,

⁹ ka ɛ́ nè kɛŋenmen ɛ ndee nə ghɛ́ ntaŋlee è chok wen ge əb lii è nyok kelɛy ɛ ndaa-ɛykokse.

¹⁰ Əbliye kwɛn, ngose wel yɛ ɛy nè luun fo baate se əbchio ndaa-ɛykokse, è se jeme; Zakalia me lii è se nyoke kelɛy.

¹¹ È loo sasen nɛ nchiy-ndaa-Feyin tiy ɛ ɛybee əbkoy əbtaa se ketatan kɛ əb nè nyoken kelɛy ɛ ten.

¹² Keləme gwɛl Zakalia, əb me se fane naa se ŋaŋ.

¹³ Dî nchiy-ndaa-Feyin yi me suuy ge: Zakalia! Ghàà yɛ fan. Feyine yiomen ɛyjem ə yiɛ, nɛ Elizabet wɛ wiy ə viɛ nɛ̂y bii wán əbluumen, é wɛ̀ chio ɛyghel ə wen ge Joon.

¹⁴ Ɛ́ nɛ̂y bii wán nɛ̂ vin é wɛ̀ yɛ saŋle naa se ŋaŋ, nɛ ghel se ɛydio ləke;

¹⁵ bek ka əb nɛ̂y yɛ ki fekɛɛy fengaŋtene ɛyshiɛ nə Feyine. Əb jia náà kum əmnduk əmtaa se wen əbchio naa se nkan. Keyioy Kelanene nɛ̂y lun se wen ɛytem è yɛ dine jii se wen nɛ əb bo bɛɛy kɛn ɛ no ə wen əblɛɛ.

¹⁶ Əb náà kuy è fekte kenəə ə Feyin se ghele Islaele, é ghel se ɛydio kubsen tetem ə ghen, è kase fiile se Báàba Feyin nə ghen.

¹⁷ Feyine náà fo kediak se wen kɛn ghɛɛ-ghɛɛ ka fe nè foon se wele ntum nə wen wɛ Elija se əmməən, ge əb yɛ ndu ɛ Feyine mbiy, è bense teteme ɛbàá, ɛ́ yɛ koŋe ghon ə ghen, è bense ghel ghɛ ɛ́ yionen wiy se Feyine é ghene keele Feyin, è yɛ lu ghel ɛtofene, è gese siyse ghel ghɛ ɛ́ báà beeme Feyin é ghene beeme, è yɛ lu kebaaten se fiisene wen.

¹⁸ Zakalia bif se nchiy-ndaa-Feyin yi ge: Lòó mɛ keele se ghɛ, nɛ mɛ ngɛsenmen lɛ, nɛ wiy ə wom ngɛsenmen sɛ̂y?

¹⁹ Nchiy-ndaa-Feyin fise ge: Lu mɛ Gabliel, nɛ mɛ fɛle se Feyine əbliy əbjim. Lu wen wɛ əb tumen mɛ ge mɛ gwiy è fekte sakghɛ əbjuŋ vin se wɛ̀.

²⁰ Yɛn-a! Wɛ̀ yɛ lu kechichi se chin ka əbnəə vine nɛ̂y gan bek ka wɛ̀ báà beeme ntum yin yɛ mɛ gwiyen so, nɛ əbnəə tene nɛ̂y gan ɛ əbliy wɛ Feyine choken.

²¹ Ka Zakalia ghene nchiy-ndaa-Feyine suŋnen nduun se əbtəm dì, ghel ghɛ ɛ́ nè jemen ɛ əbchio ndaa-ɛykokse, chiyte ge Zakalia fəy, me se fane, kante ge əb sɛ bɛɛne moo lɛɛy lɛ-a.

²² Əb nɛy fəy è baksen ghel ghi, è loo ge yi se suŋnene ke me ghak. Əb me gok kechichi, è se feke kɛn əbnəə feken. Ghele yɛn dì è me liɛ ge kuumese Feyine di lu nɛ se koo wen ɛ ndaa-ɛykokse.

²³ Zakalia nɛy mɛyse əbwɛy ɛyfɛl nə wen, è me kase kfəəy se wen ə bɛy.

²⁴ Əbliye se keŋte nduu, Elizabet wɛ wiy ə wen me chia nɛ̀ əblɛɛ, è lete ngeŋ wen ɛ məme ndaa, è jia se fəynene ɛ ghele məm se njoŋ setan, suuye ge:

²⁵ Yibɛy! Báàba lu nɛ əb cham ɛysen ə yom, kechii kwɛn əb chakse kenghuumen se mɛ ketuu.

Ɛ́ Fekte Ɛybii ə Jesus

²⁶ Se lu ka Elizabet nè gufenmen əblɛɛ ə wen vi è chin njoŋ ntuufe, Feyine me gese tum nchiy-ndaa nə wen yɛ Gabliel se ntɛk ə Nazalet ɛ Galilee,

²⁷ ge əb ndu è teefe ntum se wándɛ ngon əblee nɛ əb bɛɛy ghàà yɛ ke əbluumen, nɛ ɛ́ toŋte wen ge Mɛɛle, nɛ ke nè shi ke keelen ge əb nɛ̂y yɛ lu wiy ə Josɛf wɛ wel ɛykfəə nə əbfon wɛ David.

²⁸ Nchiy ndaa Feyin yi ndu è lii, è chakte Mɛɛle ge: Mɛ chakte wɛ̀! Báàba toknen nɛ̀ wɛ̀, nɛ əb gesemen bose wɛ̀.

²⁹ Mɛɛle yio, ke se noo ɛytem ə wen naa se ŋaŋ, əb me se kante ge sɛ lu ɛynkii ɛychakte ɛykɛ lɛ-a?

³⁰ Nchiy-ndaa-Feyin yi me suuy se wen ge: Mɛɛle! Ghàà yɛ fan, Feyine lu nɛ Fe buk wɛ̀.

³¹ Yɛɛ ke ge wɛ̀ nɛ̂y chia nɛ̀ əblɛɛ, è bii wán əbluumen, è chio ɛyghel ə wen ge Jesus.

³² Əb nɛ̂y yɛ lu wel əbtaa, nɛ Feyin fengaŋtene toŋte wen ge: Wan ə wom, é Báàba Feyin nɛ̂y gese fo əbtaawe se wen, é əb kok ketiɛ è yɛ sak əbfon kɛn ka Ba ɛykfəə nə ghen wɛ David nè saken.

³³ Əb náà kok əbfon ə ɛykfəə nə Jakob è yɛ sak kɛn saken, nɛ ɛysak ə wene jia yî mɛy.

³⁴ Mɛɛle yio di, è me bif se nchiy-ndaa-Feyin yi ge: Lòó ke gan dî lɛɛy, nɛ mɛ bɛɛy ghàà yɛ ke əbluumen?

³⁵ Nchiy-ndaa-Feyin fise se wen ge: Keyioy Kelanene nɛ̂y gwiy se wɛ̀, é əbtaawe Feyin fengaŋtene chite wɛ̀ é wɛ̀ chia nɛ̀ əblɛɛ è bii wán. Bek kii nɛ̂ kine, ɛ́ náà yɛ toŋte wán nɛ̂ vin ge: Wán ə Feyin.

³⁶ Yɛn-a! Wele ndaa nə ghɛn wɛ Elizabet wɛ ɛ́ nè suuyen ge əb lu kekan nɛ əb gesemen ngɛsen naa se ŋaŋ, shi nɛ̀ əblɛɛ ɛ leenen se njoŋ ntuufe, nɛ əb nɛ̂y bii wán əbluumen.

³⁷ Kii nɛ̂ kine me se dine ge kenəə wiy kɛ lòó ke ghak Feyin se nɛɛy.

³⁸ Mɛɛle me fise ge: Mɛ lu wel ɛyfɛl nə Feyine. Ke ko gan san kɛn ka wɛ̀ suuyen. Nchiy-ndaa-Feyin yi me lòò.

Mɛɛle Shik ɛyghan se Elizabet

³⁹ Se lu kɛn ɛ əmchii fo, Mɛɛle me lòò è liɛ jii è kok chikiy-chikiy ɛ ntɛk ɛylee ɛylake kfənse ɛ Judea.

⁴⁰ Əb kok dî è lii ɛ Zakalia ə ndaa, è chakte Elizabet.

⁴¹ Kɛn ka Elizabet yion ɛychakte Mɛɛle ɛ leghɛ, wan me ghayle ɛ wen əblɛɛ, Keyioy Kelanene me gwiy è lii è lun se Elizabet ɛytem.

⁴² Əb suuy se Mɛɛle ɛ giɛ ɛytaa ge: Feyine bosemen wɛ̀ chia ka əb bosen əbkiy ɛjim, è gese bose sɛ̂y wán wɛ wɛ̀ nɛ̂y bii.

⁴³ Lu ɛynkii mbukma ɛykɛ yin lɛ, yɛ Feyine nɛɛyen ge No Báàba ə wom gwiy è ghan mɛ?

⁴⁴ Wɛ̀ kè lii è chakte mɛ ɛ leghɛ, wan wɛ əb luun ɛ mɛ əblɛɛ me ghayle nɛ̀ ɛysaŋlee.

⁴⁵ Ke lu kejuŋ se wɛ̀ bek ka wɛ̀ beemenmen ge Báàba Feyin lunse nkakma yɛ əb nè kaken wɛ̀ so.

Mɛɛle yem njàŋ se kokse Feyin

⁴⁶ Mɛɛle fise ge: Ɛytem ə yome kokse Báàba Feyin,

⁴⁷ nɛ mɛ yio əbjuŋ nɛ ɛytem ə yome, saŋle bek Feyin wɛ mboyse yom.

⁴⁸ Əb lu nɛ əb kuumemen mɛ, nɛ mɛ lu wel ɛyfɛl nə wene wɛ̂ nchɛk. Se lu nɛ ghel ɛjime náà yɛ toŋte mɛ ge: Wel wɛ Feyine nè bosen.

⁴⁹ Bek ka Feyin wɛ Ba əbtaawe nɛɛyenmen əbnəə əbghakene se mɛ, ɛyghel ə wene lu ɛylanen.

⁵⁰ Əb koosen ɛysen əbliy əbjim, se ghel ɛjime ghɛ ɛ́ ngvəmlen wen.

⁵¹ Əb dinmen əbtaawe ə wen, è saŋse ghel ghɛ ɛ́ kwaaten ɛ ghene tetem ge ghene lu.

⁵² Əb səksemen tefon se ghene kabase, è tom ghele ghɛ́ nchɛke se tefon.

⁵³ Əb yiɛsemen ghel ghɛ jeŋe yafen nɛ̀ əbfua əbjuŋe, è jumte ghɛ́ əmkaa ɛghoo yum.

⁵⁴ Əb lu nɛ əb kuume ɛykak yɛ əb nè foon se ɛbaa ɛbaa ghɛse, è gwiy se giamtene wel ɛyfɛl nə wene wɛ Islael.

⁵⁵ Ka əb nè kaken ge yi náà koosen ɛysen se Ablaham, ghene ɛykfəə wene əbliy əbjim nɛ ɛymɛye wiy.

⁵⁶ Mɛɛle suŋnen di è chii ghene Elizabet ka njoŋ setal, è kase fiile se wene ndaa.

Ɛybii ə Joon Nfoo Moo

⁵⁷ Əbliy wɛ Elizabete bii ɛ ten nɛy kwɛn, əb me bii wán əbluumen.

⁵⁸ Ghel ghɛ ɛ́ chiin báksen se wen gese nɛ̀ ghel ɛykfəə nə wene yio ka Feyine chamen ɛysen ə wen è fo wán se wen, è me gwiy se chɛkle ghene ghene.

⁵⁹ Əbchii lun ɛyfaame ghele gwiyke se nɛyte wán vi, è me se kɛŋe ge ɛ́ chio ɛyghel ə wen ge Zakalia ka yɛ ba ə wene.

⁶⁰ Dî no ə wen suuy ge: Ɛngaŋ, ɛyghel ə wene lu Joon.

⁶¹ Ghele suuy se wen ge: Wɛ̀ ki wiy wel ɛykfəə wɛ ɛ́ toŋten ge Joon.

⁶² Ɛ́ me se feke nɛ̀ ɛghoo se Ba ə wan, bife se wen ge əb sɛ kɛŋe ge ɛ́ yɛ toŋte wán ə wen ge ndɛ-a?

⁶³ Zakalia fek ge ɛ́ gwiy nɛ̀ kebaŋe fekake. Ɛ́ gwiy so, əb nyak ge: Ɛyghel ə wene lu ge Joon. Ghene yɛn dî è me se lu nɛ̀ əbchíò əbyúméné.

⁶⁴ Kɛn ka əb nyaken ɛ leghɛ, əb me kase kɛ̀ɛ̀tè se yɛ suŋnen, kokse Feyin.

⁶⁵ Ghel ghɛ ɛ́ nè chiin báksen se wen yɛn əbnəə nɛ̂ vin, ɛyfane koo ghene. Əbnəə wɛ tene əbjim me saanken, ghele se fiɛle nduu so ɛylak ə kfənse ɛ Judea ɛyjim.

⁶⁶ Wel əbjim wɛ əb nè yion sakghɛ vin se kantee, bife ge wan vin sɛ náà yɛ lu ɛynkii wel əbkɛ-a? Ghele yɛn ge keghoo ə Feyine lu ɛ wene kenəə.

Kenəə kɛ Zakalia nè Suuyen

⁶⁷ Zakalia kɛɛte se suŋnen di, Keyioy Kelanene lii è lun se wen ə ɛytem, əb me se fekte kenəə ə Feyin ge;

⁶⁸ Ɛykokse lu se Bay Feyin wɛ Feyin ə ghele Islael. Əb gwiymen se giamtene ghel ə wen, se gese se tene ghene se ngɛkse.

⁶⁹ Əb tinsemen wel əbtaa wɛ əb náà yɛ lu mboyse ə yɛsen, nɛ̀ əb lòò ɛykfəə nə əbfon wɛ David wɛ wel ɛyfɛl nə wen.

⁷⁰ Lu kenəə kɛ əb nè kaken se əmməən, è chia ɛ giɛse sɛ ghele ntum nə Feyine nè fekten ge,

⁷¹ yi náà fii ghɛsen se ɛghoo nə ghel ə əbbaanese nə ghɛsene.

⁷² Əb nè suuy ge yi náà koosen ɛysen se ɛbaa ghɛse è kuume kelek ə ki kelanene.

⁷³ Əb nè lek se ba ə wɛs wɛ Ablaham ge.

⁷⁴ Yi náà fii ghɛs se ɛghoo nə ghele əbbaanese nə ghɛs, ka ghɛse yɛ fɛl se yi bo fane wiy,

⁷⁵ lu ghel ɛlanene, nɛɛye ka yi koŋen, əbchii wɛs əbjim, ke ge yi yɛne.

⁷⁶ Wán, ɛ́ náà yɛ toŋte wɛ̀ ge: Wele ntum nə Báàba Əbngaŋten, bek ge wɛ̀ nɛ̂y yɛ nduu ɛ mbiy nə Bay, siyse jii ə wen.

⁷⁷ Wɛ̀ nɛy yɛ nɛɛye nɛ ghele keele ka lòó Feyine lɛyse mbeese ə ghen, è boyse ghene,

⁷⁸ bek ge, Feyin ə Fɛsene lóó əb yɛ koosen ɛysen se ghele se ŋaŋ. Əb náà tum mboyse ɛyyio é əb gwiy se ghɛs, ka chuy yɛ ɛy tóòn ɛ bvəse bvəse,

⁷⁹ è fo ɛyban se ghele ghii dii ghɛ ɛ́ luun ɛ nfiine, chii fane ɛykuo əbliy əbjim, è gese yɛ dine jii se ghɛs ka lòó ghɛs yɛ chii ɛyzəəte.

⁸⁰ Zakalia suŋnen di, wan ə wen ko me se kuye, ki ɛytof, foo ɛytem ə wen se Feyine naa ketaan, è me ndu è se chii əbkwak se chin ka əb nè kɛɛten se yɛ fekte kenəə ə Feyin ɛ Islael.