Aanlyn Bybel

Jn 1 - Ŋwaale Feyin; Kelek Kefɛɛ

Giɛ yɛ ɛy fóon ɛychii

¹ Nè lu ɛ kenkɛɛte nɛ Giɛ lu, ɛy nè lu ghene Feyine. Giɛ nɛ̂ yin nè lu Feyin.

² Əb nè lu ghene Feyine se kenkɛɛte.

³ Feyine nè bom əbfua əbjim nɛ lu nɛ̀ Giɛ nɛ̂ yin. Kefaa wiy kɛ Feyine nè bomen nɛ wiy nɛ̀ Giɛ yin.

⁴ Ɛychii nè lòò se wen, nɛ ɛychii nɛ̂ yine lu kekaaken se wele-mesoŋ.

⁵ Kekaaken kine bane ɛ məme nfiine, nɛ lòó nfiine jia limse.

⁶ Wel əblee nè lô se lu wɛ Feyine nè tumen nɛ ɛ́ toŋte ge Joon.

⁷ Əb nè gwiy se fekte kum ɛyban nɛ̂ yi ka ghele keele, è fo ɛytem se ɛyghene.

⁸ Joon se wene ngeŋ nè báà se lu ɛybane yɛ́ tene, dî è gwiy se fekte se ghele kum ɛyghene.

⁹ Ɛyban nɛ̂ yine lu nkante kekaaken kɛ ke gwiyen ɛ mbi è se foo ɛyban se wel əbjim.

¹⁰ Əb nè lu ɛ mbi, nɛ Feyine nè bom əbfua əbjim nɛ̀ wen, dî mbi jia keele wen.

¹¹ Əb nè gwiy ɛ wene kelik, dî ghele wene jia fiisen wen.

¹² Ghel ɛlee fiisen wen, əb me fo əbtaawe se ghene ge ghene yɛ lu ghon ə Feyin, dii ghel ghɛ ɛ́ nè foon ɛytem se wen.

¹³ Ghene nè báà se lu ghon ə Feyin ge ɛ́ bii əblam nə wele-mesoŋ, jia semte wel se bii ghene, jia kwaate wel, nè lu ɛykwaate ə Feyin.

¹⁴ Giɛ nɛ̂ yin nè gwiy è sɛɛ se wele-mesoŋ, è se chii ɛ ghɛsene məm. Ghɛsen se yɛne əbfon ə wen, nɛ lu əbfon wɛ əb nè kiin ka wán ə Feyin wɛ əbmok. Əb nè chame ɛysene ghel naa se ŋaŋ gese lu wel əbluuy.

¹⁵ Joon nè lô suŋnen se ghele kum wen. Əb nè suuy ge: Lu wen nɛ̂ vi wɛ mɛ nè suuyen ge: Wel əblee gwiye ɛ mɛ ɛybam, dî nɛ əb ngaŋte è chia mɛ, bek ge ɛ́ nè bii mɛ nɛ əb nè shi.

¹⁶ Se lu bek ka əb chammen ɛysene yɛ́sen naa se ŋaŋ, wɛ əb fóon ɛybose se ghɛsen, toke nɛ̀ ɛybosee.

¹⁷ Moses nè gwiy nɛ̀ nchil se ghele ka Feyine nè tumen. Jesus Christ gwiy kɛ́ wene nɛ lu nɛ̀ ɛycham ɛysen nə Feyine gese nɛ̀ əbluuye.

¹⁸ Wel nè bɛɛy ghàà yɛn Feyin, buu kɛn wán ə wen wɛ əbmok wɛ əb luun ɛ Bay ɛybee. Lu wen wɛ əb nɛ́ɛ́yen nɛ ghele keele Bay.

Joon tun ge yi wiy vi wɛ ɛ́ nè yiosen
( Mat 3.1-12 ; Mak 1.1-8 ; Luk 3.1-18 )

¹⁹ Ghɛ́ mbiy nə ghele Juuse tum ghɛ́ ntaŋlee ɛlee ghene ghel ɛlee ghɛ ɛ́ nè fɛ́len ɛ ndaa-ɛykokse ɛ Jolesalem ge ghene ndu è bif se Joon ge sɛ lu wen ndɛ-a?

²⁰ Ghene ndu, Joon jia tɛn se suŋnen, dî è suŋnen kelaanen ge: Mɛ báà se lu Vi wɛ Feyine nè Yiosen.

²¹ Ghene me bif ge: Wɛ̀ lu ndɛ? Wɛ̀ lu Elija-a? Joon fise ge: Ɛngaŋ! Mɛ báà se lu wen. Ghene gese bif ge: Wɛ̀ lu wele ntum nə Feyine wɛ ɛ́ chiyten-a? Əb tûn!

²² Ghene me suuy se wen ge: Fekte wel wɛ wɛ̀ luun əbghen se ghɛs. Ghɛs lu se ndu nɛ̀ ɛyfisee, se ghel ghɛ ɛ́ kè tumen ghɛs. Wɛ̀ suuy gee ghɛ kum ngeŋ ə yiɛ?

²³ Joon fise ge: Mɛ lu wel wɛ wele ntum nə Feyine wɛ Ezaya nè suuyen ge: “Giɛ wene jaŋe əbkwak ge: Ghɛn nɛyte kevəə jii se Báàba é ke yɛ nduu ɛ titiy!”

²⁴ Ghel ghii nè lòò ntum ghele kenone Falisee,

²⁵ è me bif se wen ge: Ka wɛ̀ wiyen Vi wɛ Feyine nè Yiosen, wiy Elija, wiy wele ntum nə Feyine, wɛ̀ se foo moo bek ghɛ?

²⁶ Joon fise ge: Mɛ foo nɛ lu moo, dî nɛ wel əblee lu ɛ ghɛne məm ɛ leenen, nɛ ghɛne bɛɛy ghàà keele wen.

²⁷ Əb bo gwiye ɛybam, nɛ chèmè lu kɛn nkfəəse guose ɛvəə nə wen fene mɛ báà se lu kekwɛnten ka lòó mɛ yayte.

²⁸ Əbnəə vin nè gan ɛ Betani ɛ njine jio Joldan ghàà Joon nè fóon moo.

Joon din ge Jesus lu wan-njiɛ nə Feyine

²⁹ Əbtəke yio, Joon yɛn Jesus ka əb gwiyen, è suuy ge: Dii wan-njiɛ nə Feyine, wɛ əb lɛyse mbeese mbi.

³⁰ Lu wen nɛ̂ vi wɛ mɛ nè suŋnen kum wen ge: Wele gwiye ɛybam chia mɛ, bek ge ɛ́ nè bii mɛ nɛ əb nè se shi.

³¹ Mɛ nè báà se ke wel wɛ luun wen, dî è gwiy è se foo moo se ghele se nɛɛy ge ghele Islaele keele wen.

³² Joon suuy dì, è me din ge: Mɛ nè yɛn Keyioy nɛ ke səəke ɛyyio ka kenlal è gok ɛ wen əbghun.

³³ Mɛ se mɛ ngeŋ nè báà se ke wen, dî nɛ Feyin Fɛ Fe nè tumen mɛ ge mɛ yɛ foo moo nè lô suuy se mɛ ge: Wɛ̀ nɛ̂y yɛn nɛ Keyioy səəke è guo ɛ wel əbghun, fene lu wen wɛ əb nɛ̂y yɛ foo nɛ lu Keyioy Kelanene.

³⁴ Mɛ nè yɛnmen, è me se fekte se ghɛn ge wel nɛ̂ vi lu wán ə Feyin.

Jesus kiile ghon-ɛyfɛl nə wene ghɛ́ mbiye

³⁵ Əbtəke gese yio, Joon se tiy ghene ghon-ɛyfɛl nə wen ɛlee ɛbaa.

³⁶ Jesus gese se chia, Joon gese yɛn wen è suuy ge: Dii wan-njiɛ nə Feyine.

³⁷ Ghon-ɛyfɛl nə Joon ghii yio dì è me se nduu ɛ Jesus ɛybam.

³⁸ Jesus benle è yɛn nɛ ghene gwiye ɛ wen ɛybam è bif ge: Ghɛne kɛŋe ghɛ? Ghene fise ge: Labbi (dii ge ndinte) wɛ̀ chii ghááy?

³⁹ Əb fise ge: Ghɛn gwiy è yɛn. Ghene me ndu ghene ghe Jesus è yɛn ghaa əb nè chiin, è me gok fo, əbtəke mɛyse jiɛ ghene bek ka nè shiin ɛ keleŋe nfam.

⁴⁰ Wel əblee se ghel ghɛ ɛbaa ghɛ ɛ́ nè yion ka Joon suŋnen kum Jesus è se jumte wen nè lu Andole wɛ wán-no ə Simon Bita.

⁴¹ Ka Andole yɛnen Jesus ɛ leghɛ è me kɛŋ wán-no ə wene Simon è suuy se wen ge: Ghɛs yɛnmen Mesaya (dii ge Christ) nɛ lu ge, Vi wɛ Feyin nè yiosen.

⁴² Andole me liɛ Simon è ndu so se Jesus. Jesus tuŋ ɛyshiɛ ɛ Simon əbghun è suuy se wen ge: Kéné lu wɛ̀ Simon, wɛ wán ə Joon? Ɛ́ nɛ̂y yɛ toŋte wɛ̀ ge Sefas. (Ɛyghel yɛ Sefas lu ge Bita, nɛ lu ge ɛyghok.)

Jesus liɛ Filib ghene Natanael se ghon-ɛyfɛl

⁴³ Əbtəke yio, Jesus liɛ ge yi ndu ɛ Galilee, è loo ndu è yɛn Filib, è suuy se wen ge: Gwiy ɛ́ loo.

⁴⁴ Filib nè lu wele Betsaida, ka Andole ghene Bita.

⁴⁵ Filib ndu è yɛn Natanael, è suuy se wen ge: Ghɛs yɛnmen wel wɛ Moses nè nyaken ɛ ŋwaale tesak, ghele ntum nə Feyine gese nyak ge əb náà gwiy. Əb lu Jesus wɛ̂ Nazalet, nɛ lu wán ə Josɛf.

⁴⁶ Natanael bif se wen ge: Lɛ lòó njuŋ fəy ɛ Nazalet-a? Filib suuy se wen ge: Gwiy è yɛn.

⁴⁷ Jesus yɛn ka Natanael gwiyen se yɛne wen è suuy ge: Lɛɛ naa nkante wele Islael lɛ! Kenlife wiy ɛ wene məm!

⁴⁸ Natanael bif se Jesus ge: Wɛ̀ ghan lɛɛy se geese keele mɛ? Jesus fise wen ge: Mɛ kè lô se yɛne wɛ̀ ɛyshaa fekake fig nɛ Filib geese jaŋe wɛ̀.

⁴⁹ Natanael me suuy ge: Ndinte, wɛ̀ lu wán ə Feyin! Wɛ̀ lu əbfone Islael!

⁵⁰ Jesus suuy se wen ge: Wɛ̀ fo ɛyteme yiɛ san ɛ leenen bek ka mɛ suuyen ge mɛ kè yɛn wɛ̀ ɛyshaa fekake fig-a? Wɛ̀ nɛ̂y yɛn əbnəə əbchio əbyúméné wɛ əb chian kine.

⁵¹ Jesus gese suuy se wen ge: Mɛ suuy əbluuy se wɛ̀ ge: Wɛ̀ náà yɛn ɛyyio nɛ ɛy dise, è yɛn nɛ nchiyse-ndaa nə Feyine koke gese chio ɛ ketuu nə Wanwel.

« Vorige

©CABTAL, 2012

Volg ons:

Geborgde skakels

Advertensies