Jɛms 1 - Ŋwaale Feyin; Kelek Kefɛɛ

Ɛychakte

¹ Lu mɛ Jɛms, nɛ mɛ fɛle se Feyine ghene Báàba Jesus Christ. Mɛ nyake ŋwaale yin se ghel ə Feyin ɛjim ghɛ ɛ́ saanken mbi ɛyjim. Mɛ chakte ghɛn.

Toŋ Feyin ɛ əbliy ɛymomse

² Ghone-nyii, ngɛkse loo gwiy se ghɛn, chémè yɛ lu ɛynkii ngɛk se kɛ, ghɛn liɛ ge lu əbliy wɛ ghɛne yɛ saŋle saŋlen.

³ Lòó ghɛn liɛ dì bek ge ghɛn ke ge, ghɛne loo chia ɛ məme ngɛkse ten, nɛ ghɛne loote vii ɛytem se Feyine əbghun, ghɛn mɛyse teem ketaan.

⁴ Ghɛn lu se me se yɛ tiy ketaan, nduu kɛn ɛ mbiy, ka ghɛne yɛ loote lu kekwɛnten ka ghel ə Feyin, bo ghaa wiy kefaa ɛ ghɛne nchiine.

⁵ Ke gan ge wel yɛ lu ɛ ghene məm wɛ əb ghaan jii yɛ lòó əb yɛ feesen ɛ ten əb bif se Feyine, é əb din se wen. Lu wen wɛ əb kiin keghoo keyii, foo se ghel ɛjime nɛ̀ ɛyteme, bɛɛse wiy kefaa, koosen wiy nken.

⁶ Dî nɛ əb loo bif, əb yɛ lu se fo ɛytem ə wen se Feyine, ke fɛ əb yɛ maanen kenəə naa se nkan, bek ge wel wɛ əb maanen lu ka jio əbliy wɛ əbfiɛfe shiken nɛ̀ moome loole nduu kɛn ghaa əbfiɛfe nduun.

⁷ Wel nɛ̂ vi loo lu, ghàà əb yɛ kwaate ge lòó Feyine fó kefaa se yi naa se nkan.

⁸ Lòó Feyine jia fo kefaa se wen bek ge əb ki tetem tebaa, tantan ɛ əbnəə əbjim.

Kechɛkle wele ketan nɛ̀ kɛ́ wel əbkaa

⁹ Wan-nyii wɛ əb tanen lu se yɛ saŋle ge Feyine losemen wen,

¹⁰ nɛ wan-nyii wɛ əb kiin lu se yɛ saŋle ge Feyine səksemen wen, bek ge əb ke ge wel wɛ əb kiin náà mɛy kɛn ka əbgii busen è loo moote əbmbvəse tene me yoble.

¹¹ Chuye loo ban, ɛy yɛ lum, nyoke əbgii nɛ əbmbvəse tene yalene, ə́b yalen ɛyjofe tene me lɛy. Lu ghɛɛ-ghɛɛ ka wel wɛ əb kiin nɛ̂y kuo ɛ wene jii ɛykɛŋ.

Ɛymonse lòò ɛ tekwaate tebee

¹² Ke lu kejuŋ se wel wɛ əb teem ketaan ɛ əbliye ngɛkse, bek ge wele lóò chia ɛ məme ngɛkse nɛ əb lóóte vii ɛytem se Feyine əbghun, é Feyine nɛ̂y fo əbmakte se wen, nɛ lu ɛychii yɛ ɛy jia yî mɛy. Kii nɛ̂ kine lu əbmakte wɛ Feyine kakenmen se ghel ghɛ ɛ́ koŋen wen.

¹³ Ɛymomse gwiy se wel, ghàà əb suuy ge: Momse Feyin mɛ, bek ge lòó kefaa jia bɛyse Feyin ge əb nɛɛy mbee, nɛ lòó Feyin se wene ngeŋ jia momse wel.

¹⁴ Sɛ́y bo lu tekwaate tebee tɛ te luun ɛ wel ɛytem tɛ te lóòn te liɛte wel, è lobte əb lii se mbee.

¹⁵ Tekwaate tine taate, me fəy mbee, əb nɛɛy mbee se ŋaŋ, əb me kuo kejim.

¹⁶ Ghone-nyii, ghàà ghɛn yɛ lɛɛse ngeŋ ə sɛn.

¹⁷ Əbfua əbjuŋe əbjim wɛ luun nkante əbfua lu nɛ əb lòò se Feyine wɛ əb nè bomen chuy, nɛ̀ njoŋ gese nɛ̀ əmjesme. Feyin se wen ə ngeŋ sɛɛ jia kubsen, nɛɛye wiy ge əblike yɛ fin.

¹⁸ Nè koŋ wen se bome ghɛsen nɛ̀ giɛ əbluuy nə wen ge ghɛsen yɛ lu mbiy se əbfua wɛ əb nè bomen naa əbjim.

Wele Feyine wɛ̂ əbluuy yio lɛme

¹⁹ Yɛn-a, ghone-nyii, wel əbjim yɛ loote ki shii se yiote kenəə, è jia yɛ loote ki shii se suuye kenəə, è jia yɛ ki shii se yɛ yafse ɛytem.

²⁰ Bek ge wele loo yafse ɛytem, ghàà əb yɛ nɛɛye kenəə kɛ Feyine kɛŋen.

²¹ Ke me se lu ge ghɛn maay jii sebee, nɛ̀ nchiine ɛybee, è fiisen nɛ̀ ɛyvəme giɛ ə wen yɛ əb yiɛtemen ɛ ghɛne tetem. Lu keghene kɛ lòó ke boyse ghɛn.

²² Ghàà ghɛn yɛ yiote kɛn kenəə ə Feyin yioten. Ghɛn yɛ yiote, nɛɛye ka ke kɛŋen, buu dî fene ghɛne lɛɛse ngeŋ ə sɛn.

²³ Wele yióté kɛn kenəə ə Feyin yioten, nɛɛye wiy ka ke kɛŋen, fene əb lu ka wel wɛ əb kiyen ɛykeke ə wen ɛ kenkiy è yɛn ka ɛy luun,

²⁴ è lòò se fo ɛ leghɛ, əb me lɛysen ka ɛy keken.

²⁵ Dî nɛ naa ndɛ wɛ əb tuŋen ɛshiɛ se sakghɛ əbjuŋ wɛ əb nɛɛyen ge wel yɛ lu keyayten ɛ kenəə ə Feyin, nɛɛye ka Feyine kɛŋen, yio wiy kɛn yion, me lɛysene lu nɛ Feyine náà bose wen ɛ əbnəə wɛ əb nɛɛyen əbjim.

²⁶ Wel lòò è yɛ kwaate ge yi ki nchiine ə wel wɛ əb beemen se Feyine dî suŋnen se nchɛk fene əb lɛɛse ngeŋ ə wen nɛ kenəə kejim kɛ əb nɛɛyen lɛye se lólò.

²⁷ Nchiine yɛ Feyin wɛ Ba ə wɛsen koŋen lu se yɛ laane naa kejuŋ. Wel wɛ əb kiin nchiine yine sɛɛ toknen nɛ̀ ghone nkfə, nɛ̀ əbkiye nkfə ghɛ ɛ́ yɛnen ngɛk, gese tɛɛke ngeŋ ə wen fɛ əbnəə wɛ́ ketuu ntiɛ fɛne bese wen.