Filibi 1 - Ŋwaale Feyin; Kelek Kefɛɛ

Ɛychakte

¹ Lu mɛ Bool nɛ̀ Timoti ghɛ ghɛse fɛ́len se Christ Jesus. Ghɛse nyake ŋwaale yin se ghel ə Feyin ɛjim ghɛ ɛ́ luun ɛ Filibi nɛ ɛ́ fó ɛytem se Jesus Christ, nyake sɛy se ghele mbiye se kenone ghel ɛbeemene gese nɛ̀ se ghɛ ɛ́ giamten.

² Ghɛse lone ge Feyin wɛ Ba ə wɛsen ghene Báàba Jesus Christ cham ɛysen ə yɛn è gese nɛɛy é ghɛn yɛ ki tetem tezəətene.

Bool jem se ghel ɛbeemene ghɛ́ Filibi

³ Loo lu ɛ leghɛ wɛ mɛ kwaaten ghɛn, mɛ ko bɛ́ɛ̀lè Feyin.

⁴ Loo lu ɛ leghɛ wɛ mɛ jemen se ghɛn ghel ɛjim mɛ yɛ jem nɛ̀ ɛysaŋlee,

⁵ bek ka ghɛn nè chinten mɛ è se giamten mɛ nɛ̀ ɛyfɛle sakghɛ əbjuŋ se kɛ̀ɛ̀tè se kechii kɛ mbiye kɛ ghɛn nè yion se kok se chin lan.

⁶ Mɛ me se ke se əbluuy ge Feyin wɛ əb nè kɛɛten ɛyfɛl ɛyjuŋe yin ɛ ghɛne tetem é yɛ ndu kɛn so ɛ mbiy se chin ka əb yî mɛyse ɛ kechii kɛ Jesus Christe gwiy ɛ ten.

⁷ Ke lu ɛ titiy se mɛ se yɛ kwaate ɛ jii ghan kum ghɛn, bek ka ghɛn luun ɛytem ə yom se nkan. Ghɛn nè chìntèn mɛ è se kiile sɛy mbose yɛ Feyine nè se foon san, ɛ leenen wɛ mɛ luun ɛ nchak nɛ̀ se əbliy wɛ mɛ nè bo ghanen fekten ge sakghɛ əbjuŋ lu əbluuy.

⁸ Feyine ke ge kenəə kɛ mɛ suuyen lu se əbluuy. Jii yɛ ɛykoŋe lunen ɛ mɛ ɛytem kum ghɛn lu kɛn ka Christ Jesus se wene ngeŋ koŋen ghɛn.

⁹ Mɛ jeme ge ghɛn yɛ koŋe ngeŋ ə sɛn nduu kɛn ɛ mbiy, gese jeme ge ghɛn yɛ loote ke əbnəə gese ke se tayte əbnəə,

¹⁰ ka ghɛne keele jii yɛ lòó ghɛn chok kenəə kɛ ke luun ɛ titiy, Jeme ge ghɛn yɛ lu ghel ɛlanene nɛ kenəə wiy kɛ ɛ́ yɛ ghame ghɛn se ten se ndu se chin se kechii kɛ Christ gwiyen ɛ ten.

¹¹ É ghɛn loo lu dî, è me yɛ ki nchiine ɛyjuŋ yɛ ɛy lòòn nɛ lu se Jesus Christ, nɛ ghele yɛne ngvəmle Feyin gese foo ɛykokse se wen.

Mɛ Chii bek Ɛytem yɛ mɛ foon se Christ

¹² Ghone-nyii, mɛ kɛŋe se nɛɛy ge ghɛn keele ge kenəə kɛ ke ganen se mɛ lu nɛ ke sɛy nɛɛy ge sakghɛ əbjuŋ yɛ ndu nɛ lu ɛ mbiy.

¹³ Lu bek kii nɛ̂ kine kɛ ghel ɛyghoŋ ɛjim ghɛ ɛ́ chiyen ntok gese nɛ̀ wel əbjim keelenmen ge mɛ lu ɛ nchak bek ka mɛ fɛ́len se Jesus Christ.

¹⁴ Ɛylu ə yom ɛ nchak lu nɛ ɛy nɛɛy ndio ghone-nyii loote teem ketaan ɛ kenəə nə Báàba, è se fekte kenəə ə Feyin bo fane wiy.

¹⁵ Mɛ ke ge ghene ɛlee fekte kenəə Christ, nɛ ɛ́ ghɛke mɛ ghɛken gese kɛŋe nɛ lu ɛvəə ə ghom, dî nɛ ɛlee fekte nɛ̀ ɛytem ɛyjuŋe.

¹⁶ Ghel ghɛ ɛ́ fekten nɛ̀ ɛytem ɛyjuŋe fekte bek ka ɛ́ koŋen mɛ gese ke ge nè nɛɛy Feyin ge mɛ yɛ lu ɛ nchak fɛn, ka mɛ yɛ din ge sakghɛ əbjuŋ lu əbluuy.

¹⁷ Nɛ ghɛ́ kenghɛk ghii, fekte Christ nɛ̀ kentáŋe, nɛ lu nɛ̀ ɛytem ɛybee, kwaate ge ghɛy jii yɛ lòó ghene nɛɛy é ɛyteme yɛ foo ngɛk san ɛ leenen wɛ mɛ luun ɛ nchak.

¹⁸ Kii nɛ̂ kii lɛ kume mɛ se nkan-a? Mɛ saŋle kome saŋlen bek ge, ka ghene yɛ fekte nɛ̀ ɛytem ɛybee, kene ɛ́ yɛ fekte nɛ̀ ɛyjuŋe, fene kɛ ke luun lu ge ɛ́ fekte kenəə kɛ kum Christ.

¹⁹ Nɛ mɛ lu se yɛ saŋle bek ge mɛ ke ge ka ghɛne jemen se mɛ nɛ Keyioy Kelanene nə Jesus Christ giamtene lu nɛ kenləysen əbnəə nɛ̂ ghan əbjime yɛ lu ge mɛ boy boyen.

²⁰ Kenəə kɛ mɛ kɛŋen naa ketaan, gese kwaate lu ge lòó mɛ jia yî yɛ ki kenchoksen ɛ mɛ ɛyfɛl, dî è yɛ ki ɛytem se yɛ nduu ɛ mbiy nɛ̀ ɛyfɛle ka mɛ liɛ ngeŋ ə yom ɛyjim è fo ɛykokse so se Christ ɛ leenen nɛ̀ naamen ɛ leghɛ, kene mɛ taa taan, kene mɛ kuo kuon.

²¹ Mɛ suuye lɛ bek ka mɛ goken əbtaa é mɛ yɛ kokse Christ, mɛ kuo é ke jof jofen san.

²² Mɛ lòò è gok əbtaa, è jia kuo kuon é mɛ yɛ fɛl ɛyfɛl yɛ ɛy yɛ giamtene ghel, se lu nɛ mɛ báà se ke ge mɛ sɛ chok ke kɛ-a?

²³ Mɛ tiy ɛ feteten ɛ feteten ke wiy ge mɛ sɛ ndu jii ghááy-a? Mɛ semte se ndu se yɛ lu ghɛse Christ bek ge kii nɛ̂ kii jofe chia.

²⁴ Se lu bek ghɛn, ke me se lu kejuŋ ge mɛ gok əbtaa.

²⁵ Mɛ loote ke se əbluuy ge mɛ nɛ̂y gok ghɛsen è yɛ giamtene ghɛn ka ghɛne yɛ kuy gese saŋle ka ghel ghɛ ɛ́ foon ɛytem se Jesus Christ,

²⁶ é mɛ gese lóó lu ghɛsen é ghɛn mɛyse è fo ɛykokse se Christ Jesus bek ka mɛ kasen è gwiy.

Ɛychii Ghel ghɛ́ Ɛylak ə ghene Shiin Ɛyyio

²⁷ Kenəə ketaa lu ge ɛychii ə yɛne yɛ lu kɛn ghɛɛ-ghɛɛ ka sakghɛ əbjuŋ wɛ kum Christe suŋnen, ka mɛ loo lu è gwiy se ghɛn é ke yɛ lu kejuŋ, yɛ lu wɛ mɛ jia gwiy, é mɛ yɛ yio ge ghɛn tiy ketaan, lu se əbchio əbmok, ki ɛytem ɛymok gese loolè se kefaa kemok se yɛ din əbluuy wɛ kum sakghɛ əbjuŋ.

²⁸ Ghàà ghɛn yɛ fane ghel ghɛ ɛ́ banen ghɛn naa se nkan. Kii nɛ̂ kine lu əbchəyte se din se ghene ge ɛ́ mɛyse ghene mɛysen è boyse ghɛn bek ge kejime lu se Feyine.

²⁹ Ke lu dî bek ge Feyine nɛɛymen ge ghɛn jia beeme kɛn Christ beemen, dî è yɛ lu se yɛ yɛne ngɛk bek wen.

³⁰ Leenen lu nɛ ghɛne chinten mɛ é ghɛsen yɛ loolè kebiine kemok se yɛ noo əbnóò wɛ ghɛn nè yɛnen nɛ mɛ noo nɛ ko bo bɛɛy əbghene wɛ ghɛne yion ge mɛ bo noo.