Filemon 1 - Ŋwaale Feyin; Kelek Kefɛɛ

¹ Nyake mɛ Bool, mɛ lu ɛ nchak bek kenəə ə Jesus Christ. Mɛ lu ghɛse wan-nyii wɛ Timoti. Mɛ nyake se wɛ̀ Filemon, wan-nyii wɛ ghɛse koŋen naa se ŋaŋ nɛ ghɛsen fɛle se Christ.

² Ɛychakte yome nduu sɛy se jɛmte yɛsen Abfia, gese nduu se Alkibbus wɛ ghɛsen nɛ̀ ghene chinten è se noo kum kenəə ə Báàba ə wɛsen Jesus Christ, nduu sɛy se kenchintene ghel ɛbeemene kɛ ke konen ɛ wɛ̀ ndaa.

³ Feyin wɛ Ba ə wɛsen nɛ̀ Báàba ə wɛsen Jesus Christ ko cham ɛysene yɛn, è fo ɛytem ɛyzəətene se ghɛn.

Bool bɛɛlè Feyin bek Filemon

⁴ Mɛ lóó jem naa ɛ leghɛ, mɛ yɛ kuume wɛ̀, bɛɛlè Feyin,

⁵ bek ka mɛ yion kum ɛytem yɛ wɛ̀ foon se Báàba Jesus gese nɛ̀ ɛykoŋ yɛ wɛ̀ kiin se ghel ə Feyine ɛjim.

⁶ Mɛ jeme ge wɛ loo fekte kenəə kɛ wɛ̀ foon ɛytem se ten se ghele ɛlee, ɛ́ kii nɛ̂ kine nɛɛy ɛ wɛ keele əbnəə əbjuŋe əbjim wɛ ghɛsene yɛ nɛɛy se foo ɛykokse se Christ.

⁷ Mɛ suuy lɛ wan-nyii bek ge ɛykoŋ yɛ wɛ̀ kiin se ghone-nyii lu nɛ ɛy nɛɛy mɛ se saŋle naa se ŋaŋ gese koo kelumten ka wɛ̀ losen tetem ə ghel ə Feyin.

Bool lon Filemon bek Onesimus

⁸ Ke me se lu ge chèmè lu ka mɛ kiin əbtaawe ka wele Christ se suuy ge wɛ̀ nɛɛy kenəə kɛ titiye;

⁹ bek ɛykoŋ yɛ ghɛsen kiin mɛ se beŋte wɛ beŋten. Suuy mɛ Bool wɛ mɛ ngɛsenmen lɛ, gese lu ɛ nchak bek kenəə Jesus Christ.

¹⁰ Mɛ beŋte wɛ̀ bek Onesimus wɛ mɛ nè kiilen Ka wán ɛ nchak fɛn.

¹¹ Nè lu se mbiy nɛ əb lu wele lólò se wɛ̀, se lu ɛ leenen nɛ əb se shi wel wɛ loo əb yɛ giamtene ghɛsoo.

¹² Mɛ kase tinse wen se wɛ̀ ɛ leenen, tinse nɛ lu ka mɛ ten nɛ lu ɛybee əbghun nɛ mɛ ɛylee.

¹³ Kè lòó mɛ yɛ koŋ se vəse wen fɛn ka əb liɛ kelike kiɛ, è yɛ giamtene mɛ nɛ mɛ lu ɛ nchak bek sakghɛ əbjuŋ.

¹⁴ Dî nɛ mɛ kè báà se kɛŋe se nɛɛye kenəə nɛ wɛ̀ baa beeme fɛ wɛ̀ loo giamtene mɛ é ke yɛ lu ka ɛ́ kane wɛ̀ kanen, nɛ wɛ̀ giamten wiy ɛ wɛ̀ ɛykoŋ.

¹⁵ Tam fene Onesimus nè vəse wɛ̀ se keleŋ əbliy ka əb nɛ̂y kase gwiy è yɛ lu ghɛne wen əbliy əbjim.

¹⁶ Kɛ ɛ leenene lu nɛ əb bɛɛy wiy kekos se wɛ̀, dî chia kekos: Əb lu wán-nyii əbjuŋ. Əb lu ɛ mɛ ɛytem, nɛ kè loo əb yɛ lu ɛ wɛ ɛytem chia, lu ka kekos ə kiɛ, gese lu Ka wán-nyii se ɛybeeme.

¹⁷ Loo lu nɛ wɛ̀ yɛn ge ghɛsoo fɛle ɛyfɛl ɛymok se Jesus Christ, wɛ̀ fiisen wen kɛn ka kè lòó wɛ̀ fiisen mɛ.

¹⁸ Yɛ lu wɛ ge əb nè lô nɛɛy kenəə kebee se wɛ̀ kene əb ki ɛykaa se wɛ̀, wɛ̀ yɛ bif se mɛ.

¹⁹ Nyakte kɛn naa mɛ kine nɛ keghoo ə kome ge: Mɛ nɛ̂y lak ɛykaa ten se wɛ̀. Mɛ jia yɛ tamte tamten se wɛ̀ ge wɛ̀ ki ɛykaa san yɛ luun kɛn naa ngeŋ ə yiɛ.

²⁰ Kiy wɛ̀ wan-nyii, ko nɛɛy kenəə kɛ mɛ kɛŋen bek ka ghɛsoo luun ghele Báàba, nɛɛy ka ɛytem ə yome yɛ saŋle ka wán-nyii ɛ kenəə nə Christ.

²¹ Mɛ nyake lɛ ke se əbluuy ge wɛ̀ nɛɛ́y kenəə kɛ mɛ kɛŋe gese ke ge wɛ̀ nɛɛ́y naa è chia ka mɛ kwaaten.

²² Kenəə kelee lu ge, wɛ̀ siyse ndaa se mɛ. Mɛ ke se əbluuy ge Feyine nɛ̂y fise ɛyjem ə yɛn ghel ɛjim ka mɛ fəy è gwiy se ghɛn.

Ɛychakte Kenləysen

²³ Ebaflas wɛ ghɛse ghene luun ɛ nchak fɛn bek Christ Jesuse chakte wɛ̀.

²⁴ Mak, nɛ̀ Alistalkus, nɛ̀ Demas gese nɛ̀ Luk ghɛ ghɛse ghene fɛ́len ɛ kenəə nə Christe chakte sɛy wɛ̀.

²⁵ Báàba Jesus Christ ko cham ɛysene yɛn ghel ɛjim.