Aanlyn Bybel

Ɛfesos 1 - Ŋwaale Feyin; Kelek Kefɛɛ

¹ Lu mɛ Bool wɛ Feyine nè yɛnen ge yí chok se wele ntum nə Christ Jesus. Mɛ nyake ŋwaale yin se ghele ə Feyin ɛ Ɛfesos, ghii dii ghɛ ɛ́ foon ɛytem se yɛ lu ghele Christ Jesus.

² Feyin wɛ Ba ə wɛsen ghene Báàba ə wɛsen Jesus Christ kô cham ɛysene yɛ́sen, è fo nzəəte se ghɛn.

Feyine bose ghel bek ɛyfɛl ə Christ

³ Ghɛsen yɛ́ kokse Feyine Báàba ə wɛsen Jesus Christ wɛ kò luun Bay se wen. Lu wen wɛ əb bósen ghɛsen nɛ̀ mbose sɛ se lòòn ɛ ɛyshiɛ nə wen ɛ ɛyyio jii sejim sɛ se giamten keyioy ə kɛ́sen bek ka ghɛsen luun ghel ə Christ.

⁴ Əb nè ghane ge yí bom mbi nɛ əb chokmen ghɛsen ge ghel ə Christ ka ɛ́ yɛ lu ghel ɛlanene, ki wiy kejas ɛ ɛyshiɛ nə wen.

⁵ Se lu bek ɛykoŋ ə wen, əb me lɛm ge ghɛsen yî yɛ lu ghon ghɛ ghíí bek ɛyfɛl ə Jesus Christ. Ke nè gan kɛn ɛ jii yɛ əb nè chɛklen gese kɛŋen ge ke yɛ lu.

⁶ Ɛ́ yɛ kokse wen se əbghaake ɛycham ɛysen nə wen wɛ əb səsen se ghɛsen nchɛk nchɛk bek ka ghɛsen luun ghɛ́ wan ə wen wɛ əb koŋen se ŋaŋ.

⁷ Jesus Christ nè kuo, əmnduŋ mə wen boyse ghɛsen. Ghɛy ge Feyine lɛysemen əbjas ə wɛsen, dì ghɛy jii yɛ Feyine chammen ɛysen se ghele naa se ŋaŋ,

⁸ səs səsen ɛycham ɛysen nə wen ɛ ketuu nə ghɛsen ɛ jiise ɛytof nɛ sɛ əbfee sejim.

⁹ Əb nè nɛɛy əbnəə wɛ əb nè saŋlen kum əbghene ɛ jii yɛ əb kɛŋen ɛ ten, è me nɛɛy ghɛsen keele chəm ə wen yɛ əb nè leten, ka əb nè kaken chia əbghun nɛ Christ;

¹⁰ é loo lu nɛ əbliye dî lootemen kwɛn, é Feyine me nɛɛy kenəə kɛ əb nè baaten ka ə́b chinten əbfua əbjim, kene wɛ́ ɛyyio, kene wɛ́ ntiɛ, é Christ yɛ lu ketuu ə ten.

¹¹ Feyine nè chok ghɛs ghɛ ɛ́ luun kefaa kemok nɛ̀ Christ ge ɛ́ yiɛ əbtik ə ví. Ke nè gan kɛn ka əb nè yimen siyse. Əb nè nɛɛy əbnəə əbjim kɛn ɛ jii yɛ əb yɛnen è se kɛŋe ge ghɛy ka əb yɛ lu.

¹² Feyine nè siyse dì ka ghɛs ghɛ ɛ́ nè kɛɛten lɛm ɛykwaate ə yɛ́s se Christ me yɛ chii ɛ jii yɛ ɛykokse yɛ́ lu se yi bek əbghaake ví.

¹³ Nè lu əbliy wɛ ghɛn nè yion giɛse əbluuy sɛ kum sakghɛ əbjuŋ wɛ əb boysen ghel, è fo ɛytem se Christ, è loo lu kefaa kemok ghɛne ghe Christ, Feyine me fo Keyioy Kelanene se ghɛn kɛ əb nè kaken ka əbchəysen se din ge ghɛn lu ghel ə ghí.

¹⁴ Ghɛne loo ki Keyioy ə Feyin dì, è me se ke se əbluuy ge ɛ́ nɛ̂y kiile kii dii kɛ Feyine nè kaken se ghel ə wene. Ke me se lu ge Feyine yî loote boyse ghel ghɛ luun ghɛ́ wene, ɛykokse yɛ lu se wen bek əbghaake wen.

Ɛyjem ə Bool se ghele Ɛfesose

¹⁵ Se kɛ̀ɛ̀tè se əbliy wɛ mɛ nè yion jii yɛ ghɛne loote foon ɛytem se Báàba Jesus gese nɛ̀ ɛykoŋ yɛ ghɛn loote kiin se ghel ə Feyine əblik əbjim,

¹⁶ lu nɛ mɛ nè bɛɛy ghàà yì yal se yɛ foo bɛ́ɛ̀lè se Feyine kum ghɛn. Mɛ kuume ghɛn ɛ mɛ ɛyjem,

¹⁷ lone ge Feyine Báàba ə wɛsen Jesus Christ, Bay əbghaken ko nɛɛy é ghɛn yɛ feesen gese yɛne əbnəə wɛ əb dinen ka ghɛne yɛ loote keele wen.

¹⁸ Mɛ kò gese jeme ge Feyine dise tetem ə tɛn ka ghɛne yɛ loote ke əbnəə, me ke vii dii wɛ əb nè bɛɛsen se ghɛn ghɛ əb nè chokenmen, dì ghɛy wɛ luun əbghaake əbchio əbyúméné wɛ əb yî fo se ghel ə wene.

¹⁹ Mɛ gese jeme ge ghɛn keele kenəə kɛ kum kediak ə wen kɛ ke luun ɛ jii yɛ lòó wel jia fek, kɛ ke giamten ghel ghɛ ɛ́ foon ɛytem se wen. Lu kediak ə wen keghuye nɛ̂ kine,

²⁰ kɛ əb nè losen Christ so se ɛykuo, è lɛm wen ɛ kelik kengaŋtene əbkoy əbtaa nə wen ɛ ɛyyio.

²¹ Se lu nɛ Christ ngaŋtemen chia əbtaawe əbjim wɛ əb saken ɛ ɛyyio, nɛ̀ wɛ ə́b kiin əbtaawe nɛ̀ kediake gese nɛ̀ báàba sejim. Əb ki ɛyghel nɛ ɛy chia teghel tejim ɛ mbi lan, nɛ̀ se mbi yɛ ɛy bo gwiyen.

²² Feyine nè lɛmen əbnəə əbjim ɛ ɛyshaa əbtaawe nə Christ, əb se lu ketuu se kenchintene ghel ɛbeemene.

²³ Kenchintene ghel ɛbeemene lu əbghune Christ, fii əbtaawe əbjim se wen, nɛ nɛɛy wen ge əbfua əbjim əblik əbjim yɛ lu.

« Vorige

©CABTAL, 2012

Volg ons:

Geborgde skakels

Advertensies