1 Timoti 1 - Ŋwaale Feyin; Kelek Kefɛɛ

¹ Ŋwaale yin lòò se mɛ Bool. Mɛ lu wele ntum nə Christ Jesus. Lu Feyin wɛ Mboyse ə yɛ́sen ghene Christ Jesus wɛ ghɛsen lɛmen ɛykwaate ɛ wen əbghun ghɛ ɛ́ nè làmen ge mɛ yɛ lu wele ntum.

² Mɛ nyake se wɛ̀ Timoti. Wɛ̀ lu wán ə wom se nkan se ɛybeeme. Bay Feyin ghene Báàba Christ Jesus kô cham ɛysen ə yiɛ, è koosen ɛysen se wɛ̀ è gese fo əmnyiaŋ se wɛ̀.

Yɛɛ toknen kum ndintese əbbuam

³ Mɛ kɛŋe ge wɛ̀ gok kɛn ɛ Ɛfesos kɛn ka mɛ nè beŋten wɛ̀ əbliy wɛ mɛ nè chian nduun ɛ Masedonia. Mɛ kɛŋe ge wɛ̀ gok fô dì bek ka ghel ɛlee luun fô ghɛ ɛ́ foon teyiɛke əbbuam, nɛ wɛ̀ lu se tun se ghene.

⁴ Tûn ge ghàà ghene gese yɛ jefse əbliy maa əmngaanme lólò, tamte nduu nɛ̀ teghele ɛbaa-ɛbaa ghele se kɛ̀ɛ̀tè se əbməən. Əbnəə nɛ̂ vin lu kɛn se yɛ gwiy nɛ̀ mbekse. Ə́b báà se giamten ghel ka ɛ́ yɛ́ fɛl ɛyfɛl ə Feyin yɛ ɛ́ foon nɛ lu ɛytem se geese yɛ fɛl.

⁵ Shii wɛ mɛ kwanten wɛ̀ əbnəə nɛ̂ ghan lu bek ka mɛ kɛŋen ge ghel ɛbeemene yɛ din ɛykoŋ yɛ ɛy lòòn ɛytem ɛylanene, ki wiy tekwaate tebee nɛ ɛ́ loote fo ɛytem se Jesus Christ se əbluuy.

⁶ Ghel ɛlee maaymen ɛyyíɛ́ke nɛ̂ yin, è jas jii è gok kɛn ɛ məme mbekse lólò.

⁷ Ghene kɛŋe se yɛ lu ndintese ɛysak nə Feyine, dî nɛ ghene se ghene ngeŋse ke wiy kenəə kɛ ghene dinten, chèmè ke wiy kenəə kɛ ghene ghaŋsen əbghun ge ɛ́ dintee.

⁸ Ghɛsen ke ge ɛysak ə Feyine jofe ɛ lefɛ ghele lɛmen ɛ jii yɛ ɛ́ luun se yɛ lɛm ɛ ten.

⁹ Ghɛsen yɛ ke ge ɛ́ báà fo ɛysak se ghel ghɛ ɛ́ nɛɛyen əbnəə wɛ əb luun ɛ titiy. Ɛ́ fo nɛ lu se ghel ghɛ ɛ́ kolen ɛysak, è fo se ghel ghɛ ɛ́ taan ketuu nɛ̀ se ghel ghɛ ɛ́ yionen wiy se Feyine, gese nɛ̀ se ghele mbeese. Ɛ́ fo se ghel ghɛ ɛ́ báà se chii ɛychii ɛylanene nɛ̀ se ghel ghɛ ɛ́ suŋnen kebee kum Feyin, ɛ́ fó se ghel ghɛ ɛ́ yúyten ɛbaa ə ghen, yuyte ɛnoo ə ghen gese nɛ̀ se ghel ghɛ ɛ́ yúyten ghel ɛlee.

¹⁰ Ɛ́ fo ɛysak se ghel ghɛ ɛ́ jaŋen kenjaŋ, nɛ̀ se ɛluumen ghɛ ɛ́ nyiim nɛ̀ ɛluumen ɛlee, è fo se ghel ghɛ ɛ́ choŋen ghel ɛlee feene, nɛ̀ se ghel əbbuame nɛ se ghel ghɛ ɛ́ benen nsake lólò gese nɛ̀ se ghel ghɛ ɛ́ nɛɛyen əbnəə nɛ əb wiy ka ɛyyíɛ́ke yɛ́ titiye dinen.

¹¹ Ɛyyíɛ́ke nɛ̂ yine fəye ɛ məme sakghɛ əbchio əbyúméné wɛ Feyine ɛykokse viin ɛ mɛ keghoo ge mɛ yɛ fekte.

Bool bɛɛle Feyin ka əb chamen ɛysen ə wen

¹² Mɛ bɛ́ɛ̀lè Báàba ə wɛsen Christ Jesus se kediak kɛ əb foon ge mɛ yɛ nɛɛy ɛyfɛl yin so, bɛɛle wen ka əb nè yɛnen ge mɛ lu wel əbluuy è chok ge mɛ yɛ fɛl se wen.

¹³ Chèmè lu ka mɛ nè se suŋnen kebee kum wen, tɛyle wen, nyable nɛ̀ ghel ə wene, əb ko koosen ɛysen se mɛ bek ka mɛ nè keen wiy kenəə kɛ mɛ nè nɛɛyen, nɛ mɛ bɛɛy ghàà fo ɛytem se wen.

¹⁴ Báàba ə wɛsen nè cham ɛysen ə yom naa se ŋaŋ, è nɛɛy mɛ fó ɛytem se Christ Jesus, è se koŋe ghel ɛbeemene ɛlee ka wel wɛ əb shiin kefaa kemok ghene wen luun se yɛ koŋ.

¹⁵ Kenəə kɛ ɛ́ suuyen ge: Christ Jesus nè gwiy ɛ mbi fɛn se boyse ghele mbee, lu əbluuy se ghal naa ketaan, nɛ mɛ se mɛ ngeŋ lu əbfone ghele mbee nɛ̂ ghì.

¹⁶ Feyine me koosen ɛysen se mɛ ka Christ Jesuse yɛ lu se loote se din se mɛ jii sejim sɛ əb sɛɛ lu ge wɛ̀ɛ̀, ka əb nè boysen mɛ wɛ əbfone ghele mbee se din əbchəyte se ghel ghɛ ɛ́ luun se fo ɛytem se wen se kiile ɛychii yɛ ɛy jia yî mɛy.

¹⁷ Ghɛsen yɛ kokse Feyin. Əb lu əbfon wɛ əb saken əbliy əbjim, nɛ əb jia yî lɛy, nɛ lòó wel jia yɛn wen, nɛ lu kɛn wen Feyin. Ghɛsen yɛ fo ɛykokse se wen əbliy əbjim. Amen.

¹⁸ Wan ə wom Timoti, mɛ vii kenəə kɛ mɛ kè kwanten wɛ̀ so kin ɛ wɛ́ keghoo kɛn ghɛɛ-ghɛɛ ka ghele ntum nə Feyine nè yimen suuy kum wɛ̀. Liɛ giɛ shin ka əbfua ɛyghoŋ ka wɛ yɛ lu se noo ndintese əbbuam kejuŋ.

¹⁹ Teem ketaan ɛ ɛytem yɛ wɛ̀ foon se Christ, è yɛ ki ɛytem ɛylaanene. Ghel ɛlee nè lômen maay kenəə kɛ ɛytem ə ghene suuyen se ghene è me sakte ɛytem yɛ ghene foon se Feyine.

²⁰ Ɛ məme ghele ghɛ́ tene lu Himenaeus ghene Alesanda nɛ mɛ fomen ghene se Satan ka əb loo nəkse ghene, é ghene jia bo yɛ tɛyle Feyin.