Philemon 1 - Luaniua New Testament

¹ Anau Paul, epono kia iloko kelokapu, maikinimea anau heheaꞌu ma Jesus Christ. Maua ma Timothy, kaina kakou, eau aku kelauniu nei i aꞌoe Philemon. Aꞌoe hesoa laoi maua. Kakou eheheaꞌu ma Christ.

² Maua eau aꞌe kelauniu nei hoi i Apphia, keꞌave maua la, ia ma Archippus, kekama heheaꞌu ma Christ hoi, ia ma nakama keloku kela eꞌuku iloko hale kehale aꞌoe la.

³ Keakua Kamana kakou ia ma Kealiꞌi Jesus Christ ilolosi hakaualeꞌa okou inoho laoi.

Kelaoi Philemon

⁴ Keualoko anau eloku, anau emanaku kahi aꞌoe. Anau ehamaha kauAkua,

⁵ maikinimea anau ulono pela aꞌoe ehakina Kealiꞌi Jesus, kena ilaoi nakama ekapu Keakua la hakoa.

⁶ Ia okou nahakina ana esuꞌui hakoa, kena emakino laoi namea kaualeꞌa kela Christ ekonaꞌi okou ipena la.

⁷ Kaukaina, aꞌoe ihapulupulu mai anau ihihia, maikinimea aꞌoe ehuli aꞌe kelaoi aꞌoe i nakama ekapu Keakua la, ilolosi hakaualeꞌa lakou.

Onesimus hekaina aꞌoe

^8-9 Anau Paul, epono kia iloko kelokapu, maikinimea anau heheaꞌu ma Jesus Christ. Kama la ehaunalia anau ime aꞌe nakakala aia. Ia kena anau elavaa kekakala hamakaꞌu aku aꞌoe ipena hea aꞌoe ekau kepena. Ia anau elaoi aꞌoe. Kena anau eainoa aku i aꞌoe,

¹⁰ ihaialoha aꞌe kaukama Onesimus la. Anau ekonaꞌi kama la iola hamaoni iloko kelokapu nei.

¹¹ Imua, kama la hekama heheaꞌu saꞌino aꞌoe. Ia vahonei, kama la ameheheaꞌu kaualeꞌa ma kaua.

^12-13 Anau epono kia iloko kelokapu nei, maikinimea anau ekaukaꞌu kelono kaualeꞌa Keakua. Kena anau uhihai Onesimus inoho manau ikonaꞌi anau, isui kesao aꞌoe. Ia niaina anau haikama laoi kama nei, anau eaunahie kevaꞌai muli aku kama nei.

¹⁴ Anau selavaa kekaohi kama heheaꞌu aꞌoe nei, maikinimea anau seme aku aꞌoe imua. Kena hevahi aꞌoe kekonaꞌi anau.

¹⁵ Ame Keakua eko Onesimus ikaha maꞌoe kama saika oia, ia aꞌoe meko muli kama nei naualoko hamau.

¹⁶ Ia seko kama nei poi hemanu sili. Kama nei ekaualeꞌa iluna kemanu sili, kama nei kaina hamaoni kaua. Kena aꞌoe mehaikaina laoi kama heheaꞌu aꞌoe nei, maikinimea olua ehakina Kealiꞌi.

¹⁷ Apena aꞌoe hakaꞌoko pela kaua esoa laoi, kena ko muli Onesimus poi aꞌoe elavaa kehihia noko anau.

¹⁸ Poi kama nei ehailavaꞌa naheheaꞌu aꞌoe, aꞌoe emakino pela anau meisui muli aku.

¹⁹ Anau, Paul, anau ekakaa aku nakakala nei i kelima anau, ANAU MEISUI MULI AKU. Ia aꞌoe isesili pela anau ekonaꞌi aꞌoe iola hamaoni, kena aꞌoe ekau kesui muli mai keola aꞌoe.

²⁰ Kena kaukaina, kaua esuꞌui ma Christ, kena aꞌoe ekau kelolosi hakaualeꞌa anau.

Kakala haoki

²¹ Anau ekakaa aku kelauniu nei, maikinimea anau ehakina pela aꞌoe meihalono nakakala anau. Anau emakino pela aꞌoe meipena hea anau eainoa aku i aꞌoe ipena. Kena hoi, aꞌoe mepena elaꞌa iluna hea anau eainoa aku i aꞌoe ipena.

²² Kelaa mea hoi. Kanakana heꞌina manau inoho. Anau enoho kali pela Keakua meilono keloku aꞌoe, ilavaa anau kehaele aku i aꞌoe.

²³ Epaphras epono iloko kelokapu nei hoi, maikinimea aia ekaukali Jesus Christ. Kama nei ekakala hihia aku.

²⁴ Mark, Aristarchus, Demas, ia ma Luke, makou heheaꞌu hakoa. Nakama la ekakala hihia aku hoi.

²⁵ Kealiꞌi Jesus Christ ilolosi hakaualeꞌa okou hakoa.