Matthew 1 - Luaniua New Testament

Kakala kemanava Jesus

¹ Kenei kemamaoha iho nakipuna Jesus Christ, kama la ekeiho kemanava kela David. David ekeiho kemanava kela Abraham.

² Abraham kamana Isaac, Isaac kamana Jacob, Jacob kamana Judah ia ma nakaina aia.

³ Judah kamana Perez laua ma Zerah. Kina laua Tamar. Perez kamana Hezron. Hezron kamana Ram.

⁴ Ram kamana Amminadab. Amminadab kamana Nahshon. Nahshon kamana Salmon.

⁵ Salmon kamana Boaz. Ia Rehab kina Boaz. Boaz kamana Obed. Kina Obed a Ruth. Obed kamana Jesse.

⁶ Jesse kamana kela kekuꞌu David. David kamana Solomon. Kina Solomon heꞌavana Uriah imua.

⁷ Solomon kamana Rehoboam. Rehoboam kamana Abijah. Abijah kamana Asa.

⁸ Asa kamana Jehoshaphat. Jehoshaphat kamana Joram. Joram kamana Uzziah.

⁹ Uzziah kamana Jotham, Jotham kamana Ahaz, Ahaz kamana Hezekiah,

¹⁰ Hezekiah kamana Manasseh, Manasseh kamana Amon, Amon kamana Josiah.

¹¹ Josiah kamana Jechoniah ia ma nakaina aia. Keualoko na nakama Israel ukolia noꞌave i Babylon.

¹² Imuli nakama la ukolia noꞌave i Babylon, Jechoniah kamana Shealtiel. Shealtiel kamana Zerubbabel.

¹³ Zerubbabel kamana Abiud. Abiud kamana Eliakim. Eliakim kamana Azor.

¹⁴ Azor kamana Zadok. Zadok kamana Achim. Achim kamana Eliud.

¹⁵ Eliud kamana Eleazar. Eleazar kamana Matthan. Matthan kamana Jacob.

¹⁶ Jacob kamana Joseph. Joseph keꞌavana Mary. Kena Mary kina Jesus, emale ma Christ.

¹⁷ Amaka Abraham haele nokae David, kela sanahulu ma haa nakaukama hakoa. Amaka David haele nokae kulana nakama Israel nikolia noꞌave i Babylon, kena kela sanahulu ma haa nakaukama hoi. Ia amaka kulana nakama Israel nikolia noꞌave i Babylon haele nokae kulana Christ nihanau, kena kela sanahulu ma haa nakaukama hoi.

Kemamaoha Jesus Christ

¹⁸ Kenei kemamaoha Jesus Christ. Mary o kina Jesus. Kaupu la ehanoa iꞌavana Joseph. Ia imua koꞌolua la meꞌavana, Mary emakino pela aia unoho i namahi Keanana Kapu.

¹⁹ Ia kena Joseph ehakekele ma laua ameselavaa keꞌavana. Ia Joseph hekama ekonu kahi, kena kama la sehihai kekakala aꞌe alakama, maikinimea kama la sehihai Mary inapa imua namaisu keonohenua la.

²⁰ Ia kulana Joseph ehakekele namenei, kama la emoe nomiki. Kama la eꞌike ke{enselo} Kealiꞌi haele aꞌe nome aꞌe, “Joseph kama haleaina David, aꞌoe sehakekele saꞌino i keꞌavana ia Mary. Maikinimea kamaliꞌi kama na enoho la, kamaliꞌi Keanana Kapu.

²¹ Kaupu na meimamaoha kamaliꞌi kanaka, kena aꞌoe uanaa kemale kamaliꞌi na Jesus, maikinimea kama na meikonaꞌi nakama Israel ikaha ma nahaisala lakou.”

²² Name nei hakoa ehuli mai kehamaoni nakakala kela Keakua nime aꞌe kekama hakae nakakala aia,

²³ “Kaupu meihaikama nohanau kamaliꞌi kanaka. Kanamale Immanuel, eme ma, Keakua enoho ma kakou.”

²⁴ Kulana Joseph nimahulu, kama la ehalono hea ke{enselo} la eme aꞌe i aia, iꞌavana Mary.

²⁵ Ia Joseph semomoe laua ma Mary, hakali kulana kaupu la ihanau kamaliꞌi kanaka aia la. Kena Joseph usui kemale kamaliꞌi la Jesus.