Emahs 1 - ᐅᒋᐺ ᑭᒋᒪᓯᓇᐃᑲᓐ1 ᒦᑕᔥ ᐅᐅ ᐁᒪᔅ Amos ᑳᐃᑭᑐᐸᓐ᙮ ᐐᓐ ᐄᑐᒃ ᑳᑮ ᓈᑲᒋᐋᒡ ᒫᓇᒑᓂᔕᐞ ᑳᑮ ᐅᒌᒡ ᐆᑌᓈᕽ ᑌᑰᐊ Tekoa ᐁᒋᑳᑌᓂᒃ᙮ ᓃᔓᐱᐴᓐ 2 ᓴ ᒋᑆ ᑯᔥᑯᓭᓂᒃ ᐊᑭ, ᒦ ᐃ ᐊᐲ ᐁᒪᔅ ᑳᑮ ᓈᑯᑖᑯᒡ ᑭᔐᒪᓂᑑᓐ ᐋᓃᓐ ᑫᐊᓂ ᐃᔑᓭᓂᒡ ᐃᔅᕒᐃᔭᓬᐊᐞ Israel᙮ ᒦ ᓴ ᐃ ᐊᐲ ᔫᓵᔭ Uzziah ᑮᑭᒋᐅᑭᒫᐎᒡ ᐌᑎ ᒎᑕ Judah ᐊᑮᕽ᙮ ᒉᕒᐆᐴᐊᒻ Jeroboam ᑕᔥ ᐐᓐ ᐌᑎ ᐃᔅᕒᐃᔭᓬ ᐊᑮᕽ ᑮᑕᔑ ᑭᒋᐅᑭᒫᐎ ᑳᑮ ᐅᑌᑌᒡ ᒋᐆᐋᔕᓐ Jehoash᙮ 2 ᒦ ᓴ ᐅᐌᓂ ᑳᐃᑭᑐᒡ, ᑳᑎᐯᒋᑫᒡ ᓴ ᐌᑎ ᓵᔭᓂᕽ Zion ᑕᔑ ᑯᑖᓂᑖᑯᓯ, ᒉᕒᐆᓴᓬᐊᒥᕽ ᑲᔦ ᐅᒋ ᐱᓀᓰᐎᑖᑯᓯ᙮ ᒦᑕᔥ ᐁᔑ ᐹᑌᓂᒃ ᐃᐃᒫ ᐅᑲᓇᐎ ᒫᓇᒑᓂᔑᐌᐞ ᑳᔑ ᐊᔕᒫᓂᒡ ᐅᑕᐗᑳᓂᓂ, ᒦ ᑲᔦ ᐃ ᑳᐊᓂ ᐅᒋ ᐅᓵᐙᑌᓂᑭᓐ ᒪᔥᑯᓯᐗᓐ ᐗᑭᒐᔭᐄ ᐗᒌᕽ ᑳᕒᒪᓬ ᐁᒋᑳᑌᓂᒃ᙮ ᑭᔐᒪᓂᑑ ᐋᓃᓐ ᑳᑑᑕᐙᒡ ᐯᒫᑎᓯᓂᒡ ᐯᔓ ᑳᑮᐐᒋᑖᒫᓂᒡ ᐃᔅᕒᐃᔭᓬᐊᐞ 3 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐃᑭ ᓴ ᐯᒫᑎᓯᐙᒡ ᐆᑌᓈᕽ ᑎᒫᔅᑲᔅ Damascus ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ ᒦᔥ ᐃᐃ ᑳᐐ ᐅᒋ ᓇᓇᐊᓴᒀ᙮ ᑳᐐᓐ ᐄᑐᒃ ᐊᐙᒡ ᐸᑮ ᐅᑮ ᒪᓈᒋᐋᓯᐙᐙᐞ ᐯᒫᑎᓯᓂᒡ ᑭᓬᐃᔭᑦ Gilead ᐊᑮᕽ ᐌᒌᓂᒡ, ᐁᑮ ᑑᑕᐙᐙᒡ ᑖᐱᔥᑰ ᑭᑎᑳᓇᓐ ᑳᔑ ᐐᑯᐱᒋᑳᑌᑭᓐ ᑳᔑ ᐲᐙᐱᒀᐱᑌᔮᒃ ᐋᐸᒋᒋᑲᓐ᙮ 4 ᒦᑕᔥ ᑫᐅᒋ ᑑᑕᒧᐗᒃ ᒋᒑᑭᑌᓂᒃ ᑭᒋᐅᑭᒫ ᐊᓭᐊᓬ Hazael ᐅᑖᐎᓐ, ᓂᑲ ᐊᒀᑭᓴᒧᐙᓐ ᑲᔦ ᐯᓐ ᐁᑖᑦ Ben-hadad ᑳᑮ ᐅᔑᑑᐸᓐ ᐅᑕᐸᐃᐌᐎᑲᒥᒃ᙮ 5 ᐐᑫ ᓴ ᓂᑲ ᐱᑭᔥᑲᐋᓐ ᐃᐃ ᑭᒋ ᐆᑌᓈᐎ ᐃᔥᒀᑌᒻ ᐃᐃᒫ ᐆᑌᓈᕽ ᑎᒫᔅᑲᔅ Damascus ᑳᐊᔮᒃ᙮ ᓂᑲ ᒑᑭᐋᒃ ᑲᔦ ᐃᑭ ᑳᑖᐙᒡ ᐃᐃᒫ ᐁᐸᓐ ᐸᓴᑎᓈ Aven Valley ᐁᒋᑳᑌᓂᒃ᙮ ᒦᔥ ᑲᔦ ᑫᑑᑕᐗᒃ ᐊᐊ ᑳᐅᑭᒫᐎᒡ ᐯᑏᑎᓐ Betheden᙮ ᐃᑭ ᓴ ᑕᔥ ᐯᒫᑎᓯᐙᒡ ᓰᕒᐃᔭ Syria ᐊᑮᕽ ᑳᐅᒌᐙᒡ ᑕᒫᒌᒋᑲᓂᐎᐗᒃ ᒋᑕᑯᓂᑣ, ᐌᑎ ᐊᑮᕽ ᑫᕒ Kir ᐁᒋᑳᑌᓂᒃ ᑕᐃᔑᐎᓈᐗᒃ, ᐃᑭᑐ ᑳᑎᐯᒋᑫᒡ᙮ 6 ᒦᑕᔥ ᑳᑎᐯᒋᑫᒡ ᐁᓂ ᐃᑭᑐᒡ, ᐃᑭ ᓴ ᐯᒫᑎᓯᐙᒡ ᐆᑌᓈᕽ ᑫᓴ Gaza ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ, ᒦᑕᔥ ᐃᐃ ᑳᐐ ᐅᒋ ᓇᓇᐊᓴᒀ᙮ ᐅᓵᒻ ᐋᓃᔥ ᐅᑮ ᒫᒌᓈᐙᐞ ᑲᑭᓇ ᐱᑯ ᐁᑕᔑᓂᒡ ᐯᒫᑎᓯᓂᒡ, ᐌᑎ ᐄᑕᒻ ᐊᑮᕽ ᐃᓇᑫ ᐁᑮ ᐃᔑ ᐊᑖᐙᑫᐙᒡ ᒋᐃᓍᓱᓂᒡ ᐅᐸᒦᑕᑫᐞ᙮ 7 ᓂᑲ ᐃᔑᒋᑫ ᓴ ᐃᐃ ᑳᔑ ᐙᑳᔮᐱᑭᓂᑳᑌᒃ ᐆᑌᓇ ᑫᓴ ᒋᐊᒀᑭᑌᒃ᙮ ᓂᑲ ᐊᒀᑭᓴᒪᐙᓇᓐ ᑲᔦ ᐅᑕᐸᐃᐌᐎᑲᒥᑯᐙᓐ᙮ 8 ᓂᑲ ᓂᓵᒃ ᑲᔦ ᐃᑭ ᑳᐅᑭᒫᑲᑕᒧᐙᒡ ᐃᓂ ᐆᑌᓇᐗᓐ ᐋᔥᑖᑦ Ashdod, ᐊᔥᑫᓬᐊᓐ Ashkelon ᑲᔦ ᑳᐃᒋᑳᑌᓂᑭᓐ᙮ ᐃᐃᐌ ᓴ ᑲᔦ ᑭᒋ ᐆᑌᓇ ᐁᑲᕒᐊᓐ Ekron ᑳᐃᒋᑳᑌᒃ ᓂᐐ ᓇᓇᐊᑑᓐ᙮ ᐃᑭ ᑕᔥ ᐱᓬᐃᔅᑏ ᑳᑎᓄᐎᐙᒡ ᑳᐃᔥᑸᓄᐙᒡ ᑲᑭᓇ ᑕᓂᐳᐗᒃ, ᐃᑭᑐ ᑳᑎᐯᒋᑫᒡ᙮ 9 ᒦᑕᔥ ᑲᔦ ᐁᓂ ᐃᑭᑐᒡ, ᐃᑭ ᓴ ᐯᒫᑎᓯᐙᒡ ᐆᑌᓈᕽ ᑕᔭᕒ Tyre ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ ᒦᑕᔥ ᐃᐃ ᑳᐐ ᐅᒋ ᓇᓇᐊᓴᒀ᙮ ᐅᓵᒻ ᐋᓃᔥ ᐅᑮ ᒫᒌᓈᐙᐞ ᑲᑭᓇ ᐯᒫᑎᓯᓂᒡ ᒋᑕᑯᓂᒥᓐᒡ, ᐄᑕᒻ ᐊᑮᕽ ᐁᑮ ᐃᔑᐎᓈᐙᒡ᙮ ᑳᐐᓐ ᐅᑮ ᑲᓇᐌᑕᓰᓈᐙ ᐄᑕᒦ ᑳᑎᓄᐎᓂᒡ ᑳᑮ ᐃᔑ ᐊᔓᑕᒫᑎᐙᑯᐸᓀᓐ ᐁᐐ ᒥᓄ ᐐᒌᑎᐙᒡ᙮ 10 ᓂᑲ ᐃᔑᒋᑫ ᒋᒑᑭᑌᒃ ᐃᐃ ᑳᔑ ᐙᑳᔮᐱᑭᓂᑳᑌᒃ ᐆᑌᓇ ᑖᔭᕒ, ᓂᐐ ᐊᒀᑭᓵᓇᓐ ᑲᔦ ᐅᑕᐸᐃᐌᐎᑲᒥᑯᐙᓐ᙮ 11 ᒦᔥ ᐅᐅ ᑳᑎᐯᒋᑫᒡ ᐁᓂ ᐃᑭᑐᒡ, ᐃᑭ ᓴ ᐯᒫᑎᓯᐙᒡ ᐆᑌᓈᕽ ᐄᑕᒻ ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ ᒦᑕᔥ ᐃᐃ ᑳᐐ ᐅᒋ ᓇᓇᐊᓴᒀ᙮ ᐅᓵᒻ ᐄᑐᒃ ᐅᐱᒥᓂᔕᐙᐙᐞ ᐅᐐᒋ ᐅᒌᒫᑲᓂᐙᐞ ᐸᔑᐸᐃᑫᐎᑯᒫᓇᓐ ᐁᑕᑯᓇᒧᐙᒡ, ᐊᐙᒡ ᐸᑮ ᐊᐎᔭᓐ ᐁᑰᐹᑌᓂᒫᓯᒀ᙮ ᑳᐐᓐ ᐄᑐᒃ ᐐᑳ ᑕᐴᓂᑭᑖᓱᓰᐗᒃ ᑳᐐᓐ ᑲᔦ ᐐᑳ ᑕᐗᔦᒀᓭᓯᓂᓂ᙮ 12 ᓂᑲ ᐃᔑᒋᑫ ᓴ ᑲᔦ ᒋᓴᑭᑌᒃ ᐃᐃ ᐆᑌᓇ ᑌᒪᓐ Teman ᑳᐃᒋᑳᑌᒃ, ᓂᑲ ᐊᒀᑭᓵᓇᓐ ᑲᔦ ᐃᓂ ᐊᐸᐃᐌᐎᑲᒥᑰᓐ ᐌᑎ ᐴᔅᕒᐊ Bozrah ᐆᑌᓈᕽ ᐁᔮᑭᓐ᙮ 13 ᒦᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐃᑭ ᓴ ᐯᒫᑎᓯᐙᒡ ᐆᑌᓈᕽ ᐊᒪᓐ Ammon ᐌᒌᐙᒡ, ᐁᑕᑕᐌ ᓂᑖ ᒪᒋᑑᑕᒧᒃ, ᐁᐊᓂ ᐋᓂᑫ ᒨᔕᒃ ᒪᒋᑑᑕᒧᐙᒡ᙮ ᒦᑕᔥ ᐃᐃ ᑳᐐ ᐅᒋ ᓇᓇᐊᓴᒀ᙮ ᐅᓵᒻ ᐋᓃᔥ ᐅᑖᑐᒌᐌᐱᔣᐙᐞ ᐃᑴᐗᐞ ᑳᑭᑭᔥᑲᐙᐗᓱᓂᒡ ᐃᐃᒫ ᑭᓬᐃᔭᑦ Gilead ᐊᑮᕽ ᐁᔮᓂᒡ, ᒦᔥ ᑳᐅᒋ ᐃᔑᒋᑫᐙᒡ ᐁᐐ ᓇᑭ ᑎᐯᑕᒧᐙᒡ ᐊᑮᓂ᙮ 14 ᓂᑲ ᒑᑭᓵᓐ ᑕᔥ ᐃᐃ ᑳᔑ ᐙᑳᔮᐱᑭᓂᑳᑌᒃ ᐃᐃ ᐆᑌᓇ ᐅᕒᐊᐸ Rabbah, ᓂᑲ ᐊᒀᑭᓵᓇᓐ ᑲᔦ ᐅᑕᐸᐃᐌᐎᑲᒥᑯᐙᓐ᙮ ᑕᔖᔖᑯᐌᓈᓂᐗᓐ ᑕᔥ ᐃᐃ ᐊᐲ ᑮᔑᑲᒃ ᒦᑳᑎᕽ, ᑖᐱᔥᑰ ᓴ ᐁᑭᒋᓅᑎᕽ ᑕᐃᓀᑖᑾᓐ ᑫᐊᐲᒋ ᑭᒋ ᒦᑳᑎᕽ᙮ 15 ᐅᑭᒋᐅᑭᒫᒥᐙᓐ ᓴ ᑕᔥ ᑕᒫᒌᒋᑲᓂᐎᐗᓐ, ᐃᐃ ᑲᔦ ᐋᓂᑫᐎᑭᒫᐞ ᐸᑳᓐ ᐊᑮᕽ ᒋᐊᐎ ᑭᐸᐅᒥᓐᒡ, ᐃᑭᑐ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society