Caahshowaa 1 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑᓐ ᑮᐊᓅᓂᑯᒡ ᒑᔓᐙ ᒋᒪᑲᑗᒡ ᑫᓇᓐ ᐊᑭ 1 ᐊᐲ ᑕᔥ ᓈᓈᑫ ᑳᐃᔥᒀ ᐱᒫᑎᓯᒡ ᒨᓯᔅ Moses ᑳᐊᓄᑮᑕᐙᒡ ᑳᑎᐯᒋᑫᓂᒡ, ᒦ ᓴ ᑳᑎᐯᒋᑫᒡ ᑳᑮᐃᓈᒡ ᒑᔓᐙᓐ Joshua ᑳᑮ ᐅᑌᑌᓂᒡ ᓇᓇᓐ Nun᙮ ᒑᔓᐙ ᐄᑐᒃ ᑳᑮ ᐊᓄᑮᑕᐙᒡ ᒨᓯᓲᓐ᙮ 2 ᐅᐅ ᐁᑮᐃᓈᒡ, ᐊᐊ ᓴ ᒨᓯᔅ ᓂᑕᓄᑮᐋᑲᓐ ᑳᐐᓐ ᐱᒫᑎᓯᓰ᙮ ᑕᑲ ᑕᔥ ᐗᓂᔥᑳᓐ ᒋᐋᔕᐎᔥᑳᔭᓐ ᐃᐃ ᒞᕒᑕᓐ Jordan ᓰᐱ᙮ ᑮᓐ ᑯᑕ, ᐃᑭ ᑲᔦ ᑲᑭᓇ ᐯᒫᑎᓯᐙᒡ, ᒋᐃᔖᐙᒡ ᐌᑎ ᐊᑮᕽ ᑳᐐ ᒦᓇᒀ, ᑖᐱᔥᑰ ᑳᑮᐃᓇᒃ ᒨᓯᔅ᙮ 3 ᒥᓂᒃ ᑕᔥ ᐃᑯ ᑫᓂ ᓵᒥᔥᑳᒣᒃ ᐃᐃ ᐊᑭ, ᒦ ᓴ ᐃᐌ ᑳᒦᓂᓇᑰᒃ ᑖᐱᔥᑰ ᒨᓯᔅ ᑳᑮᐃᓇᒃ᙮ 4 ᐅᐅᒫ ᓴ ᐱᑾᑕᑲᒥᒃ ᐲᓂᔥ ᐌᑎ ᑮᐌᑎᓄᕽ ᓬᐁᐸᓇᓐ Lebanon ᐃᓇᑫ, ᐲᓂᔥ ᐃᑕᔥ ᐌᑎ ᑭᒋ ᓰᐱᕽ ᐃᔫᐸᕒᐁᑏᔅ Euphrates ᐁᒋᑳᑌᒃ, ᑲᑭᓇ ᑲᔦ ᐃᐃ ᐊᑮᓂ ᑳᑖᓄᑕᒧᐙᒡ ᐃᑭ ᐁᑦ Hittites ᑳᑎᓄᐎᐙᒡ, ᐲᓂᔥ ᑕᔥ ᐌᑎ ᑭᒋᑲᒦᕽ ᐃᓇᑫ ᑳᔑ ᐸᑭᔑᒧᒡ ᑮᓯᔅ, ᒦ ᓴ ᐃᐌ ᑫᐅᑕᑮᒥᔦᒃ᙮ 5 ᑳᐐᓐ ᑲᔦ ᐊᐎᔭ ᑭᑲ ᔖᑰᒋᐃᑯᓰ ᒥᓂᒃ ᑫᐱᒫᑎᓯᔭᓐ; ᑖᐱᔥᑰ ᑳᑮ ᐃᔑ ᐐᒌᐗᒃ ᒨᓯᔅ ᒦ ᐃ ᑫᔑ ᐐᒌᐎᓈᓐ᙮ ᒨᔕᒃ ᓴ ᐱᑯ ᑭᑲ ᐐᒌᐎᓐ, ᑳᐐᓐ ᐐᑳ ᑭᑲ ᓇᑲᓂᓯᓅᓐ᙮ 6 ᒪᔥᑲᐎ ᐊᔮᓐ, ᒪᔥᑲᐌᑕᓐ ᑲᔦ; ᑮᓐ ᐄᑐᒃ ᑳᐐ ᒦᓇᑣ ᐅᑯ ᐯᒫᑎᓯᐙᒡ ᒋᑎᐱᓇᐌᐎᓯᐙᒡ ᐃᐃ ᐊᑮᓂ ᑳᑮ ᐊᔓᑕᒪᐎᒪᒃ ᐅᑫᑌᔭᐋᒥᐙᐸᓃᐞ ᐁᐐ ᒦᓂᒪᑭᐸᓐ᙮ 7 ᒦ ᐁᑕᑯ ᒪᔥᑲᐎ ᐊᔮᓐ, ᐗᐐᑫ ᑲᔦ ᒪᔥᑲᐌᑕᓐ; ᐌᐌᓂ ᐃᔑᒋᑫᓐ ᒋᑑᑕᒧᐗᒡ ᑲᑭᓇ ᐃᓈᑯᓂᑫᐎᓇᓐ ᒨᓯᔅ ᓂᑕᓄᑮᐋᑲᓂᐸᓐ ᑳᑮ ᐃᓂᒃ ᒋᐃᔑᒋᑫᐗᒡ᙮ ᑫᑯ ᑲᔦ ᑴᑮᓄᑕᑫᒃ ᑭᑭᒋᓂᑭᐙᕽ ᐃᓇᑫ ᒋᐃᔖᔦᒃ, ᑯᒫ ᑲᔦ ᑭᓇᒪᑎᓂᑭᐙᕽ᙮ ᒦᑕᔥ ᐃᐃ ᒋᒥᓄᓭᔦᒃ ᐋᓃᑎ ᐱᑯ ᑫᐃᔖᔦᒃ᙮ 8 ᐅᐅ ᑲᔦ ᒪᓯᓇᐃᑲᓐ ᐃᓈᑯᓂᑫᐎᓐ ᑳᔑ ᐅᔑᐲᐃᑳᑌᒃ ᑫᑯ ᐴᓂ ᐐᑕᑫᓐ, ᒦ ᓴ ᐃᐌ ᑫᓈᓈᑲᑕᐌᑕᒪᓐ ᐁᑕᓱ ᑮᔑᒃ, ᐁᑕᓱ ᑎᐱᒃ ᑲᔦ, ᐌᐌᓂ ᓴ ᒋᐃᔑᒋᑫᔭᓐ ᑲᑭᓇ ᑳᐃᔑᐲᐃᑳᑌᒃ᙮ ᒦᑕᔥ ᒋᐌᓅᒋᓭᔭᓐ, ᒦᑲᔦᐃ ᒋᒥᓄᓭᔭᓐ᙮ 9 ᒦᑕᔥ ᐅᐅ ᐁᓂᓈᓐ, ᒪᔥᑲᐎ ᐊᔮᓐ, ᒪᔥᑲᐌᑕᓐ ᑲᔦ, ᑫᑯ ᑲᔦ ᓭᑭᓯᑫᓐ, ᑫᑯ ᑲᔦ ᓅᑌ ᐸᑭᑌᑕᑫᓐ; ᑳᑎᐯᒋᑫᒡ ᑭᑭᔐᒪᓂᑑᒻ ᐅᔕ ᑭᐐᒌᐎᒃ ᐋᑎ ᐱᑯ ᐁᔖᔭᓐ᙮ ᒑᔓᐙ ᑮᑲᓅᓈᒡ ᐯᒫᑎᓯᓂᒡ ᐋᓃᓐ ᑫᐃᔑᒋᑫᓂᒡ 10 ᒑᔓᐙ Joshua ᑕᔥ ᐅᑮ ᐃᓈᐞ ᑳᑮ ᐋᓂᑫ ᓃᑳᓀᑖᑯᓯᓂᒡ ᐯᒫᑎᓯᓂᒡ ᐅᐅ ᐁᑮᐃᓈᒡ, 11 ᒥᓯᐌ ᐃᔖᒃ ᒣᑴᔭᐄ ᑳᔑ ᑲᐯᔑᕽ ᐅᐅ ᒋᐃᓇᓅᓀᒀ ᐯᒫᑎᓯᐙᒡ, ᐅᔒᑖᓄᑕᒧᒃ ᒦᒋᒻ ᑫᒫᒌᑑᔦᒃ᙮ ᓂᓱᑮᔑᒃ 3 ᓴ ᐃᔑᓭᒃ ᑭᑲ ᐋᔕᐎᔥᑳᒻ ᒞᕒᑕᓐ Jordan ᓰᐱ, ᒋᐊᐎ ᐲᑎᑫᔥᑳᔦᒃ ᐃᐃ ᐊᑭ ᒋᑎᐱᓇᐌᐎᓯᔦᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓀᒃ, ᑮᓇᐙ ᐱᑯ ᒋᑎᐱᓇᐌᐎᓯᔦᒃ, ᐅᑮ ᐃᓈᐞ᙮ 12 ᒦᑕᔥ ᐅᐅ ᒑᔓᐙ ᑳᐃᓈᒡ ᐃᐃ ᐅᕒᐆᐸᓂᕽ Reuben ᐌᑕᑳᓀᓯᓂᒡ, ᑫᑎᕽ Gad ᑲᔦ, ᐃᐃ ᐋᐱᑕ ᒥᓂᒃ ᒪᓈᓴᑳᕽ Manasseh ᐌᑕᑳᓀᓯᓂᒡ, 13 ᒫᒥᑲᐎᒃ ᐅᐅ ᑳᑮᐃᓂᓀᑭᐸᓐ ᒨᓯᔅ Moses ᑳᑮ ᐊᓄᑮᑕᐙᒡ ᑳᑎᐯᒋᑫᓂᒡ, ᑳᑎᐯᒋᑫᒡ ᑭᑭᔐᒪᓂᑑᒥᐙ ᑭᒦᓂᑯᐙ ᐊᓉᐱᐎᓐ, ᒦᔥ ᐅᐅ ᐊᑮᓂ ᑳᒦᓂᓀᒃ᙮ 14 ᑭᐐᐎᐙᒃ, ᑭᓃᒑᓂᓯᐙᒃ ᑲᔦ, ᑭᑕᐗᑳᓂᐙᒃ ᓴ ᑲᔦ ᑕᐊᔮᐗᒃ ᐅᐅᒫ ᓇᑫ ᒞᕒᑕᓐ ᓰᐱᕽ ᒨᓯᔅ ᑳᑮᐃᓂᓀᒃ ᒋᐊᔮᐌᒃ᙮ ᔖᑰᒡ ᐃᑕᔥ ᐃᑭ ᑳᔑᒫᑲᓂᔒᐎᐙᒡ ᑕᐋᔕᐎᔥᑳᐗᒃ ᒋᑮᔒᐙᒡ ᒋᐐ ᒦᑳᓱᐙᒡ, ᒋᓃᑳᓃᑕᒪᐙᐙᒡ ᐅᐐᒋ ᐅᒌᒫᑲᓂᐙᐞ, ᒋᐐᒋᐋᐙᒡ᙮ 15 ᐹᓂᒫ ᑕᔥ ᑭᑲ ᐱᑮᐌᒻ ᑮᐃᔥᒀ ᑌᐱᓇᒧᐙᒡ ᐊᑮᓂ ᐋᑎ ᑫᔑ ᐊᓉᐱᐙᒡ᙮ ᐃᐃᐌᓂ ᑫᑎᐱᓇᐌᐎᓯᐙᒡ ᓂᑳᐲᐊᓄᕽ ᐃᓇᑫ ᒞᕒᑕᓐ ᓰᐱᕽ ᐊᔮᓂ, ᑳᑎᐯᒋᑫᓂᒡ ᑭᑭᔐᒪᓂᑑᒥᐙᓐ ᑫᒦᓂᑯᐙᒡ᙮ ᐊᐲ ᑕᔥ ᑲᑭᓇ ᐃᔅᕒᐃᔭᓬᐊᒃ Israel ᑮᐅᔑ ᑲᐯᔑᐙᒡ, ᐊᒦᔥ ᑫᐱᔑ ᑮᐌᓄᑕᒣᒃ ᑭᑕᑮᒥᐙ ᒋᑎᐱᓇᐌᐎᓯᔦᒃ᙮ ᒨᓯᔅ ᑳᑮ ᐊᓄᑮᑕᐙᒡ ᑳᑎᐯᒋᑫᓂᒡ ᑭᑮ ᒦᓂᑯᐙ ᒋᐊᔮᐌᒃ ᐁᔮᓂᒃ ᐙᐸᓄᕽ ᐃᓇᑫ ᒞᕒᑕᓐ ᓰᐱᕽ, ᐅᑮ ᐃᓈᐞ᙮ 16 ᒦᔥ ᐅᐅ ᑳᐃᔑ ᓇᑴᑖᑯᒡ, ᐋᓃᓐ ᓴ ᐱᑯ ᐁᔑ ᐊᓅᔑᔮᕽ ᓂᑲ ᐃᔑᒋᑫᒥᓐ, ᐋᓃᑎ ᐱᑯ ᑲᔦ ᑫᐃᔑᓂᔕᐅᔮᕽ ᓂᑲ ᐃᔖᒥᓐ᙮ 17 ᑖᐱᔥᑰ ᓴ ᒥᓯᐌ ᑳᑮ ᐃᔑ ᓇᐃᑕᐗᑭᒡ ᒨᓯᔅ, ᒦ ᓴ ᐃ ᑫᑮᓐ ᑫᔑ ᓇᐃᑖᑰᔭᓐ; ᒦᑕᔥ ᐁᑕᑯ ᑕᑲ ᑳᑎᐯᒋᑫᒡ ᑭᑭᔐᒪᓂᑑᒻ ᑭᑲ ᐐᒌᐎᒃ, ᑖᐱᔥᑰ ᑳᑮ ᐃᔑ ᐐᒌᐙᒡ ᒨᓯᓲᓐ᙮ 18 ᐊᐌᓀᓐ ᐃᑕᔥ ᑫᔕᔒᐱᑕᕽ ᐁᓈᑯᓂᑫᐗᒡ, ᓇᐃᑕᓯᒃ ᑲᔦ ᑲᑭᓇ ᑳᐃᑭᑐᐗᒡ, ᒦ ᓴ ᐊ ᑫᓂᒋᑲᓂᐎᒡ; ᑮᓐ ᐃᑕᔥ ᒪᔥᑲᐎ ᐊᔮᓐ, ᒪᔥᑲᐌᑕᓐ ᑲᔦ, ᐅᑮᐃᑰᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society