Aaiseya 1 - ᐅᒋᐺ ᑭᒋᒪᓯᓇᐃᑲᓐ1 ᐊᐲ ᓴ ᑮᑭᒋᐅᑭᒫᐎᐙᒡ ᒎᑕ Judah ᐊᑮᕽ ᐅᑯ ᔫᓴᔭ Uzziah, ᒎᑕᒻ Jotham, ᐁᐋᔅ Ahaz, ᐊᐊ ᑲᔦ ᐁᓯᑳᔭ Hezekiah, ᒦ ᓴ ᐃ ᐊᐲ ᐋᐃᓭᔭ Isaiah ᐌᑯᓯᓯᒥᑯᒡ ᐁᒫᓲᓐ Amoz ᐅᐅ ᑮᐃᔑᓇᒧᑯᐸᓐ, ᑭᔐᒪᓂᑑᓐ ᐁᑮ ᐙᐸᑕᐃᑰᑴᓐ ᐅᒋ ᒎᑕ ᐊᑮᓂ, ᐆᑌᓈᓂ ᑲᔦ ᒉᕒᐆᓴᓬᐊᒻ Jerusalem ᐁᒋᑳᑌᓂᒃ᙮ ᑭᔐᒪᓂᑑ ᑮᑭᔒᑲᓅᓈᒡ ᐅᐱᒫᑎᓰᒪᐞ 2 ᑳᑎᐯᒋᑫᒡ ᓴ ᐅᐅ ᑮᐃᑭᑐ, ᐊᑭ, ᑮᔑᒃ ᑲᔦ, ᐱᓯᑕᒧᒃ ᐅᐅ ᑳᐃᑭᑐᔮᓐ! ᐃᑭ ᓴ ᑳᐱ ᐅᐱᑭᐊᒀ ᐊᐱᓅᒌᔑᕽ ᓂᑎᓀᓂᒫᒃ ᐐᑫ ᐁᔕᔒᐱᑕᐎᐙᒡ᙮ 3 ᐱᔑᑭ ᓴ ᐐᓐ ᐅᑭᑫᓂᒫᓐ ᑌᐯᓂᒥᑯᒡ, ᒫᔑᒥᑕᑎᒻ ᑲᔦ ᐅᑭᑫᑖᓐ ᐋᓃᑎ ᓀᑖ ᑕᔑ ᐊᔕᒥᑯᒡ ᑌᐯᓂᒥᑯᒡ; ᐃᔅᕒᐃᔭᓬᐊᒃ Israel ᑕᔥ ᐐᓐ ᑳᐐᓐ ᐃᐃ ᐃᓇᑫ ᐃᔑ ᑭᑫᒋᑫᓰᐗᒃ, ᑳᐐᓐ ᑲᔦ ᐃᐃ ᐃᔑ ᓂᓯᑐᑕᓰᐗᒃ! 4 ᑭᑲ ᓂᔑᐗᓈᑎᓯᒻ ᓴ ᑮᓇᐙ ᐯᒫᑎᓯᔦᒃ ᐅᒪᒋᐃᔑᐌᐱᓰᒃ ᑳᑎᓄᐎᔦᒃ᙮ ᐁᑕᑕᐌ ᓴ ᓅᒋᑯ, ᑳᒪᒋᐃᔑᐌᐱᓯᐙᒡ ᐯᒫᑎᓯᐙᒡ ᑭᑎᓄᐎᒻ, ᑖᐱᔥᑰ ᐊᐱᓅᒌᔕᒃ ᑳᐱᓯᑕᓯᒀ ᐅᓇᔓᐌᐎᓐ᙮ ᑭᑮ ᓇᑲᓈᐙ ᑳᑎᐯᒋᑫᒡ, ᐁᑮ ᐊᓇᐌᓂᒣᒃ ᑭᔐᒪᓂᑑ ᑳᑯᑖᓀᑖᑯᓯᒡ ᑳᑎᐯᓂᒫᒡ ᐃᔅᕒᐃᔭᓬᐊᐞ, ᐁᑮ ᑴᑭᑳᐸᐎᔦᒃ ᐁᐋᓇᐌᓂᒣᒃ᙮ 5 ᐌᑯᓀᓐ ᑕᔥ ᑫᔮᐱ ᑫᐅᒋ ᐌᓵᓂᐃᑰᔦᑭᐸᓐ? ᐌᑯᓀᓐ ᑲᔦ ᐌᒋ ᐴᓂᑑᓯᐌᒃ ᐃᐃ ᑳᔑ ᔕᔒᐱᑕᒣᒃ? ᐋᔕ ᐄᑐᒃ ᑭᑎᒀᓂᐙᓐ ᒫᑲᑲᓈᒋᑳᑌᐗᓐ, ᑭᑌᐃᐙᓐ ᑲᔦ ᐋᔕ ᐋᑯᓰᒪᑲᓅᓐ᙮ 6 ᐃᐃᒫ ᓴ ᑭᓯᑎᐙᕽ ᐲᓂᔥ ᐌᑎ ᑭᑎᒀᓂᐙᕽ, ᑳᐐᓐ ᓴ ᐋᐲᓐᒡ ᐃᑯ ᐊᔮᓯᓅᓐ ᒥᓄᐊᔮᐎᓐ᙮ ᐐᑫ ᓴ ᑭᒫᑭᐃᑰᒻ, ᑭᑳᑮᑎᓯᒻ ᑲᔦ, ᑭᑕᔦᓇᑲᓈᓱᒻ ᑲᔦ ᑭᐐᔭᐎᐙᕽ; ᑳᐐᓐ ᒪᔑ ᐯᑭᒋᑳᑌᓯᓅᓇᓐ, ᑳᐐᓐ ᑲᔦ ᒪᔑ ᓰᑑᐱᒋᑳᑌᓯᓅᓇᓐ ᒋᑮ ᑕᑯᓂᑳᑌᑭᐸᓐ ᐱᒥᑌᐙᐳ᙮ 7 ᑭᑕᑮᒥᐙ ᓴ ᐐᑫ ᑮᓂᔑᐗᓈᒋᒋᑳᑌ, ᑭᑑᑌᓈᒥᐙᓐ ᑲᔦ ᐐᑫ ᐱᑯ ᑮᐊᒀᑭᓯᑳᑌᐗᓐ᙮ ᑭᑭᑎᑫᐗᑲᒥᑯᐙᓐ ᑲᔦ ᐐᑫ ᐅᑮ ᓂᔑᐗᓈᒋᑑᓈᐙᓐ ᐃᑭ ᐸᑳᓐ ᐊᑮᕽ ᑳᑮ ᐅᒌᐙᒡ, ᐁᑲᓇᐙᐱᔦᒃ ᐲᐎᑌᒃ ᐁᑮ ᓂᔑᐗᓈᒋᑑᐙᒡ ᑲᑭᓇ ᑫᑰᓐ᙮ 8 ᒉᕒᐆᓴᓬᐊᒻ Jerusalem ᐃᓴ ᐁᑕ ᐃᔥᑯᓂᑳᑌ, ᐁᐙᑳᔥᑭᑳᑌᒃ ᐁᐃᓀᑖᑾᒃ ᑖᐱᔥᑰ ᐅᑲᓇᐌᒋᑫ ᐅᑕᓃᐲᔑᑭᐙᒻ ᑳᓂᔑᑫ ᐸᑕᑭᑌᓂᒃ ᒣᑴᔭᐄ ᔔᒥᓈᑎᑯ ᑭᑎᑫᐎᓂᕽ, ᑯᒫ ᑲᔦ ᒥᓯᑭᐙᒻ ᒣᑴᔭᐄ ᑳᔑ ᑭᑎᑳᓱᐙᒡ ᑳᐱᒫᐱᑫ ᓂᑖᐎᑭᐙᒡ᙮ 9 ᑮᔥᐱᓐ ᓴ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐸᑭᑎᓂᓯᓄᐎᓂᓇᑭᐸᓐ ᐋᓂᑕ ᒋᐱᒫᑎᓯᓯᐗᑭᐸᓐ, ᐐᑫ ᐄᑐᒃ ᑭᑖᑮ ᓂᔑᐗᓈᒋᐃᑰᒥᓐ ᑖᐱᔥᑰ ᑳᑮ ᑑᒋᑳᑌᑭᓐ ᐃᓂ ᐆᑌᓇᐗᓐ ᔂᑕᒻ Sodom, ᑯᒸᕒᐊ Gomorrah ᑲᔦ᙮ 10 ᒉᕒᐆᓴᓬᐊᒻ, ᐃᑭ ᓴ ᑳᑎᐯᓂᒥᒀ, ᐃᑭ ᑲᔦ ᐃᐃᒫ ᐁᐊᔮᐙᒡ, ᒦ ᓴ ᐁᓀᑖᑯᓯᐙᒡ ᑖᐱᔥᑰ ᐊᐎᔭᒃ ᑳᑮ ᐃᔑᐊᔮᐙᐸᓐ ᔂᑕᒨᕽ, ᑲᒸᕒᐊᐐᕽ ᑲᔦ᙮ ᑕᑲ ᐱᓯᑕᒧᒃ ᐋᓃᓐ ᐁᓂᓀᒃ ᑳᑎᐯᒋᑫᒡ᙮ ᐱᓯᑕᒧᐙᒃ ᑲᔦ ᐋᓃᓐ ᑭᑭᔐᒪᓂᑑᒥᓈᓐ ᐁᔑ ᑭᑭᓄᐊᒪᐎᓀᒃ᙮ 11 ᐅᐅ ᓴ ᑭᔐᒪᓂᑑ ᐃᑭᑐ, ᐋᓃᓐ ᑕᔥ ᐁᓍᑕᒣᒃ ᐃᓂ ᐸᑭᑎᓈᓱᐎᓇᓐ ᒨᔕᒃ ᑳᐲᑕᒪᐎᔦᒃ? ᐋᔕ ᐅᔕ ᑌᒥᓂᒃ ᑭᐲᑕᒪᐎᒻ ᐃᑭ ᑳᐊᒀᑭᓱᑣ ᑮᐸᑭᑎᓈᔂᓂᐎᐙᒡ ᐋᐯ ᒫᓇᒑᓂᔕᒃ, ᐃᑭ ᑲᔦ ᑳᐋᒋᐴᓂᑣ ᐊᐗᑳᓇᒃ᙮ ᓂᐐᔭᑭᔥᑫᑕᒧᐙᓐ ᐅᔕ ᐋᔕ ᐅᒥᔅᑸᒥᐙ ᐋᐯ ᐱᔑᑭᐗᒃ, ᒫᓇᒑᓂᔐᓴᒃ, ᒫᓇᑎᑾᒃ ᑲᔦ᙮ 12 ᐊᐌᓀᓐ ᑕᔥ ᑳᐃᓂᓀᒃ ᒋᐲᑑᔦᒃ ᐅᓄ ᑮᐱᐊᑕ ᐊᓇᒥᐁᑕᐎᔦᒃ? ᐊᐌᓀᓐ ᑲᔦ ᑳᐃᓂᓀᒃ ᒋᑕᑕᑯᑳᑕᒣᒃ ᓂᑕᓇᒥᐁᐎᑲᒥᑯᕽ᙮ 13 ᒦ ᐃ ᐃᔑ ᐴᓂᒋᑫᒃ ᐃᐃ ᑳᐹᐲᑕᒪᐎᔦᒃ ᑫᑰᓐ ᑳᐃᓍᑌᓯᓄᑭᓐ ᐸᑭᑎᓂᑫᐎᓇᓐ᙮ ᐐᑫ ᐅᔕ ᓂᑲᒀᓂᓴᑫᑖᓐ ᐃᐃ ᑳᒥᓈᓴᒪᐎᔦᒃ᙮ ᑳᐐᓐ ᓴ ᓂᒥᓍᐸᑕᓰᓇᓐ ᐃᓂ ᑳᓂᑖ ᒫᐗᒋᐃᑎᔦᒃ ᑮᐅᔥᑲᑰᒋᕽ ᑎᐱᑭᑮᓯᔅ, ᑮᐊᓉᐲᐎ ᑮᔑᑲᒃ ᑲᔦ᙮ 14 ᐐᑫ ᓴ ᑲᔦ ᓂᔒᑫᑖᓇᓐ ᑳᓂᑖ ᐐᑾᑎᔦᒃ ᑮᐅᔥᑲᑰᒋᕽ ᑎᐱᑭᑮᓯᔅ, ᐃᓂ ᑲᔦ ᑳᑭᑌᑕᒣᒃ ᑳᑮᔑᑲᑭᓐ᙮ ᐐᑫ ᐅᔕ ᓂᐐᔭᑭᔥᑫᑖᓇᓐ, ᓂᑎᔥᑫᑖᓇᓐ ᑲᔦ᙮ 15 ᐊᐲ ᓴ ᑕᔥ ᔒᐱᓂᑫᓂᔦᒃ ᐊᓇᒥᐋᔦᒃ, ᑳᐐᓐ ᓴ ᑭᑲ ᑲᓇᐙᐸᒥᓯᓅᓂᓂᒻ᙮ ᒥᓴᐙ ᑯ ᐋᓇ ᑭᒋ ᐊᓇᒥᐁᑕᐎᔦᒃ, ᑳᐐᓐ ᑭᑲ ᓅᑕᐎᓯᓅᓂᓂᒻ ᐅᓵᒻ ᐋᓃᔥ ᑭᓂᒌᐙᓐ ᒥᔅᑸᐗᓅᓐ᙮ 16 ᑮᓰᔮᐹᐗᓂᑎᓱᒃ ᐃᑕᔥ, ᓇᑲᑕᒧᒃ ᐃᐃ ᑳᔑ ᐙᐸᒥᓇᑰᒃ ᐁᒪᒋᑑᑕᒣᒃ᙮ ᐴᓂᑑᒃ ᐃᐃ ᑭᒪᒋᐃᔑᒋᑫᐎᓂᐙᓐ; 17 ᒣᔥᑯᒡ ᑕᔥ ᑭᑫᑕᒧᒃ ᑾᔭᒃ ᒋᐃᔑᒋᑫᔦᒃ᙮ ᑫᒋᓈᒡ ᐃᑯ ᐌᐌᓂ ᑲᑴ ᒥᓄᐃᔑᒋᑫᐃᑯᒃ, ᐐᒋᐃᑯᒃ ᒋᒪᔥᑲᐎᑌᐁᐙᒡ ᐃᑭ ᑳᑰᐹᑎᓯᐙᒡ᙮ ᓈᑕᒪᐎᑯᒃ ᑸᐗᔑ ᐊᐱᓅᒌᔕᒃ, ᓈᑕᒪᐎᑯᒃ ᑲᔦ ᐃᑴᐗᒃ ᑳᑮᐙᑎᓯᐙᒡ, ᑮᑭᑑᑕᒪᐎᑯᒃ ᑲᔦ ᒋᒥᓄᓭᐙᒡ᙮ 18 ᒦᑕᔥ ᐅᐅ ᐁᑭᑐᒡ ᑳᑎᐯᒋᑫᒡ, ᑕᑲ ᓴ ᓇᑭᔥᑯᑖᑎᑖ ᒋᓇᓇᐊᑑᔭᕽ ᐅᐅ, ᐋᓇ ᓴ ᐐᓐ ᑭᒪᒋᑑᑕᒧᐎᓂᐙᓐ ᐁᐋᑯ ᒥᔅᑯᓈᑾᑭᓐ ᑖᐱᔥᑰ ᓴ ᑰᓐ ᑳᐊᐲᒋ ᐙᐱᔥᑭᓯᒡ ᑕᐃᔑᓈᑾᓅᓐ᙮ ᒥᓴᐙ ᓴ ᑯ ᑲᔦ ᐃᔑᓈᑾᑭᓐ ᑫᑰᓐ ᑳᒥᔅᑾᑎᑌᒃ, ᐃᐃ ᓴ ᑳᐊᐲᒋ ᐙᐱᔥᑳᒃ ᒫᓇᒑᓂᔑᐲᐗᐃ ᒦ ᓴ ᐃ ᑫᐃᔑᓈᑾᑭᓐ᙮ 19 ᑮᔥᐱᓐ ᓴ ᐃᓀᑕᒣᒃ ᒋᓇᐃᑕᐎᔦᒃ, ᒦᑕᔥ ᐃᐃ ᒋᐅᑕᑕᒣᒃ ᓴᓭᑳ ᒦᒋᒻ ᑫᓂᑖᐎᑭᕽ ᐃᐃᒫ ᐊᑮᕽ᙮ 20 ᑮᔥᐱᓐ ᐃᑕᔥ ᐐᓐ ᐋᒋᑯ ᔕᔒᐱᑕᐎᔦᒃ, ᒦ ᓴ ᐃ ᒋᓂᔑᐗᓈᑎᓯᔦᒃ᙮ ᓃᓐ ᐋᓃᔥ ᑳᑎᐯᒋᑫᔮᓐ ᐅᐅ ᓂᑎᑭᑦ᙮ ᒪᒋᐆᑌᓇ ᐁᑕᔑᑌᒃ 21 ᐃᐃ ᓴ ᑭᒋ ᐆᑌᓇ ᑳᑌᐺᔦᑖᑾᑭᐸᓐ ᐊᓂ ᑎᓄᐌᑖᑾᓐ ᑖᐱᔥᑰ ᐱᔑᒀᒋᑴ᙮ ᐋᐱᑎᕽ ᓴ ᐃᐃᒫ ᐆᑌᓈᕽ ᑮᑕᓀᑖᑾᓐ ᐌᐌᓂ ᐁᐃᓈᑯᓂᑳᓂᐗᕽ, ᑾᔭᒀᑎᓯᐎᓐ ᑲᔦ ᐃᐃᒫ ᑮᐊᔮ᙮ ᓅᑯᒻ ᐃᑕᔥ ᐐᓐ ᐅᓂᔑᐌᒃ ᐃᐃᒫ ᐊᔮᐗᒃ᙮ 22 ᒉᕒᐆᓴᓬᐊᒻ, ᐙᐹᐱᑯ ᔔᓂᔮ ᐙᐱᑯᕽ ᐁᐃᓀᑖᑯᓯᔭᐸᓐ, ᑳᐐᓐ ᐃᑕᔥ ᓅᑯᒻ ᑫᑰᓐ ᑭᑎᓀᑖᑯᓯᓰ᙮ ᑭᔔᒥᓈᐴᒻ ᑲᔦ ᑳᐐᓐ ᑫᑰᓐ ᒋᐃᓈᑲᒥᕽ ᐋᓃᔥ ᓂᐱ ᑮᑕᒀᑲᒥᓂᑳᑌ᙮ 23 ᑳᓃᑳᓂᓯᐙᒡ ᓴ ᐃᐃᒫ ᐁᔮᐙᒡ ᔕᔒᐱᑕᒨᒃ, ᐅᐐᒌᐙᐙᐞ ᑲᔦ ᐅᑭᒨᒋᔥᑲᐞ᙮ ᑲᑭᓇ ᑲᔦ ᐅᒥᓉᑖᓈᐙ ᑫᑰᓐ ᐁᐅᒋ ᐃᔑᒋᑫᐙᒡ ᔔᓂᔮᓐ ᐁᑎᐸᐊᒪᐎᑣ, ᐁᑲᑴ ᑌᐱᓇᒧᐙᒡ ᑲᔦ ᐁᑕ ᒦᑭᐙᓇᓐ᙮ ᑳᐐᓐ ᑲᓇᑫ ᐅᓈᑕᒪᐙᓯᐙᐙᐞ ᑸᐗᔑᔖᓇᐞ, ᑳᐐᓐ ᑲᔦ ᐅᐸᐹᒥᑕᐙᓯᐙᐙᐞ ᑮᐙᒋᑴᐞ ᑮᓈᓯᑳᑯᐙᒡ ᒋᐐᒋᐋᐙᒡ᙮ 24 ᒦᑕᔥ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ, ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ ᐌᒋ ᐃᑭᑐᓂᒡ, ᓃᓐ ᓴ ᐱᑯ ᑭᑲ ᓇᓇᐊᓯᓂᓂᒻ ᐁᓀᑖᑯᓯᔦᒃ ᑳᔒᑫᓂᒥᔦᒃ, ᑳᐐᓐ ᐃᑕᔥ ᐊᐗᔑᒣ ᑭᑲ ᐅᒑᓂᒣᑕᒥᐃᓰᒻ! 25 ᑫᑰᓐ ᓴ ᑭᑲ ᑑᑕᐎᓂᓂᒻ ᑖᐱᔥᑰ ᐲᐙᐱᒃ ᑳᓂᑭᓯᑳᑌᒃ ᐁᐯᑳᐱᑭᓯᑳᑌᒃ, ᒦ ᓴ ᐃ ᓇᑫ ᑫᔑ ᐯᑭᐃᓇᑰᒃ, ᒋᐅᑖᐱᓇᒪᐎᓇᑰᒃ ᑳᐐᓂᔥᑳᑯᔦᒃ᙮ 26 ᒦᑕᔥ ᒋᓈᐸᓴᒀ ᑭᑎᐹᑯᓂᑫᐎᓂᓃᒥᐙᒃ ᑖᐱᔥᑰ ᑎᓄ ᑳᑮ ᓂᑖ ᐊᔮᐙᐸᓐ ᐅᑖᓈᕽ, ᑮᑭᑑᐎᓂᓂᐗᒃ ᑲᔦ ᑎᓄ ᓂᑕᒻ ᑳᑮ ᐊᔮᐌᒀ᙮ ᒦᔥ ᐅᐅ ᑫᓂ ᐃᔑᓂᑳᓂᑰᔭᓐ, ᐆᑌᓇ ᑳᑾᔭᑴᑖᑾᒃ, ᐆᑌᓇ ᑳᑌᐺᔦᑖᑾᒃ᙮ 27 ᐋᓃᔥ ᑳᑎᐯᒋᑫᒡ ᐁᑾᔭᒀᑎᓯᒡ ᐅᑲ ᔖᐾᑑᓐ ᓵᔭᓐ Zion, ᒋᐱᒫᒋᐋᒡ ᐃᐃᒫ ᑲᑭᓇ ᑳᐊᔮᓂᒡ ᑳᑴᑳᑎᓯᓂᒡ᙮ 28 ᐃᐃ ᑕᔥ ᐐᓐ ᑳᔕᔒᐱᑕᒥᓂᒡ, ᒣᒋᐃᔑᐌᐱᓯᓂᒡ ᑲᔦ ᒥᒋᓃᔥ ᐃᑯ ᑕᓂᔑᐗᓈᑎᓯᐗᒃ, ᑳᑎᐯᒋᑫᒡ ᑳᓇᑲᓂᑯᒡ ᑕᐴᓂ ᐊᔮᐗᐞ᙮ 29 ᑌᐺ ᓴ ᑯ ᑭᑲ ᐅᒋ ᐊᑲᑌᑖᒻ ᐁᑮ ᐊᓇᒥᐁᑕᐌᒀ ᐁᐊᓇᒥᐁᐗᑭᒣᒀ ᐅᒃ ᑎᓄᐙᑎᑰᒃ, ᑭᑲ ᐊᑲᒋᐃᑯᒻ ᑲᔦ ᐃᓂ ᑎᓄ ᑭᑎᑳᓇᑲᒥᑰᓐ ᐁᑮ ᑭᑎᑳᑕᒣᒃ ᐅᓄᐌᓂᐗᓐ ᑳᒥᓴᐌᑕᒣᒃ᙮ 30 ᒦ ᓴ ᐃ ᑫᐃᓀᑖᑯᓯᔦᒃ ᑖᐱᔥᑰ ᐅᒃ ᑎᓄᐙᑎᒃ ᑳᐊᓂ ᐹᓱᒡ, ᑖᐱᔥᑰ ᑲᔦ ᑭᑎᑳᓇᑲᒥᒃ ᑳᐅᒋ ᓰᑲᐊᒋᑳᑌᓯᓄᒃ᙮ 31 ᑖᐱᔥᑰ ᓴ ᐹᑌᐎ ᒪᔥᑯᓯ ᑳᐅᒋ ᒫᒌ ᓴᑭᑌᒃ ᐁᒥᒋ ᐸᑭᓀᒃ, ᒦ ᓴ ᐃ ᐃᓇᑫ ᑳᓲᑭᓯᒡ ᐊᐎᔭ ᐅᒪᒋᐃᔑᐌᐱᓯᐎᓂᕽ ᑳᐅᒋ ᑲᔥᑭᑕᒫᓱᒡ ᑫᐅᒋ ᓂᔑᐗᓈᑎᓯᒡ᙮ ᑳᐐᓐ ᓴ ᐊᐎᔭᓐ ᐅᑲ ᑲᔥᑭᑑᓰᓂ ᒋᑭᐱᑎᓇᒥᓂᒡ ᑫᔑ ᓂᔑᐗᓈᑎᓯᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society