1 ᑌᓴᓬᐆᓂᔭᓇᒃ 1 - ᐅᒋᐺ ᑭᒋᒪᓯᓇᐃᑲᓐ1 ᓃᓇᐎᓐᑦ ᐅᐅᐌ ᓂᑑᔑᐲᐃᑲᓂᓈᓐ ᑆᓬ Paul, ᓵᐃᓬᐊᔅ Silas, ᑎᒪᑎ Timothy᙮ ᑭᑑᔑᐲᐊᒫᑰᒻ ᑮᓇᐙ ᐅᑌᐺᑕᒨᒃ ᑳᒫᐗᒋᐊᓇᒥᐋᔦᒃ ᐃᐃᒫ ᑌᓴᓬᐊᓇᐃᑳᐎ ᐆᑌᓈᕽ ᐁᔮᔦᒃ, ᒥᓂᒃ ᑳᐐᒌᐎᓀᒃ ᑭᔐᒪᓂᑑ ᑳᐅᔫᓯᒥᓐᒡ, ᑲᔦ ᑳᑎᐯᒋᑫᒡ ᒋᓴᔅ X᙮ ᑭᑲᐙᐸᑕᒧᐙᒻ ᐅᑭᔐᐙᑎᓯᐎᓐ, ᐅᐱᓵᓂᓯᐎᓐ ᑲᔦ᙮ ᐋᓃᓐ ᐁᓈᑎᓯᐙᒡ ᐃᑭ ᐅᑌᐺᑕᒨᒃ ᐃᐃᒫ ᑌᓴᓬᐊᓇᐃᑳᕽ ᑳᐊᔮᐙᒡ 2 ᒨᔕᒃ ᓂᒦᑴᒋᐎᐋᓈᓐ ᑭᔐᒪᓂᑑ ᐁᒫᒥᑴᓂᒥᑰᔦᒃ ᐁᐊᓇᒥᐋᔮᕽ᙮ 3 ᔑᑾᔥ ᐊᐲ ᑯ ᐁᐊᓇᒥᐁᑕᐗᑭᒡ ᑭᔐᒪᓂᑑ ᑳᐅᔫᓯᒪᕽ, ᒨᔕᒃ ᓂᒫᒥᑴᑖᒥᓐ ᐃᐃᐌ ᑳᐅᒋ ᐃᔑᒋᑫᔦᒃ ᐁᐅᑌᐺᑕᒧᐎᓂᔦᒃ, ᑲᔦ ᐁᐅᒋᑭᒋᐊᓄᑮᔦᒃ ᓵᑭᐃᐌᐎᓂᕽ, ᑲᔦ ᑕᔥ ᐁᐅᒋᔕᔒᐯᑕᒣᒃ, ᐗᐐᑫ ᐁᑫᒋᓈᐅᔦᒃ ᐁᐐᐱᑕᑯᔑᕽ ᐊᐊ ᑳᑎᐯᓂᒥᓇᕽ ᒋᓴᔅ X᙮ 4 ᑳᐐᒋᐅᑌᐺᑕᒨᒥᑰᔦᒃ! ᑭᑭᑫᓂᒥᑰᒻ ᐁᓵᑭᐃᓀᒃ ᑭᔐᒪᓂᑑ ᐁᑮᐅᓈᐸᒥᓀᒃ᙮ 5 ᐃᓇᔥᑫ ᓴ ᐁᑮᐱ ᐃᔑᐐᑕᒫᑰᔦᒃ ᒥᓍᒋᒧᐎᓐ, ᑳᐐᓐ ᐁᑕ ᓂᑑᓂᓈᓂᕽ ᑭᑮᐱ ᐃᔑᑲᑲᓅᓂᑰᓰᒻ᙮ ᐃᐃᐌ ᐋᓃᔥ ᐅᒪᔥᑲᐎᓰᐎᓐ ᑭᔐᒪᓂᑑ ᓂᑮᐐᒋᐃᑯᒥᓐ, ᑭᔐᒪᓂᑑ ᐅᑕᒑᑾᓐ ᐁᑮᐃᔑᐊᓄᑮᓂᒡ, ᐗᐐᑫ ᐁᑮᑫᒋᓈᐁᑕᒫᕽ ᐁᑌᐺᑕᒫᕽ ᒥᓍᒋᒧᐎᓐ᙮ ᑫᑮᓇᐙ ᑭᑭᑫᓂᒥᓈᒻ ᐋᓃᓐ ᐁᔑᒥᓄᐱᒫᑎᓯᔮᕽ ᒥᓂᑭᑯ ᑳᑮᐐᒋᑖᒥᑰᔦᒃ, ᑮᓇᐙ ᑯ ᐁᑮᐅᒋ ᐃᔑᒋᑫᔮᕽ᙮ 6 ᓃᓇᐎᓐᑦ ᑭᑮᓈᓈᐱᓇᐎᓈᒻ ᐁᔑᐱᒫᑎᓯᔮᕽ, ᑲᔦ ᑭᑮᓈᐱᒋᑫᐙᒻ ᑳᑎᐯᒋᑫᒡ ᑳᑮᐃᔑᒥᓄᒋᑫᒡ᙮ ᔑᑾ ᐋᓇᐐᓐ ᐁᑮᑭᒋᑲᒀᑕᑭᑑᔦᒃ, ᐌᔩᑉ ᑭᑮᐅᑖᐱᓈᓈᐙ ᐃᐃᐌ ᑳᐃᔑᐐᑕᒫᑰᔦᒃ, ᑭᔐᒪᓂᑑ ᐅᑕᒑᑾᓐ ᐁᑮᐅᒌᒌᑫᑕᒧᔥᑳᑰᔦᒃ᙮ 7 ᒦᑕᔥ ᑳᑮᐅᒋ ᑭᑭᓇᐙᑌᓂᒥᓀᒀ ᑲᑭᓇ ᐊᐎᔭ ᐅᑌᐺᑕᒨᒃ, ᒥᓂᒃ ᐃᐃᒫ ᒫᓯᑑᓂᔮᐗᑮᕽ Macedonia ᑳᐊᔮᐙᒡ ᑲᔦ ᐊᑫᔮᐗᑮᕽ Achaia᙮ 8 ᑮᓇᐙ ᐋᓃᔥ ᑮᐅᒋᓅᑖᑾᓂᓂ ᑳᑎᐯᒋᑫᒡ ᐅᑎᐹᒋᒥᑰᐎᓐ, ᑳᐐᓐ ᐃᑕᔥ ᐁᑕ ᐃᒫ ᒫᓯᑑᓂᔮᐗᑮᕽ ᑲᔦ ᐊᑫᔮᐗᑮᕽ ᒋᐃᔑᓅᑖᑾᒃ᙮ ᐋᔕ ᒥᓯᐌ ᑮᐃᔑᓅᑖᑳᓂᐗᓐ ᐁᔑᑌᐺᑕᐌᒃ ᑭᔐᒪᓂᑑ᙮ ᑳᐐᓐ ᒣᒬᒡ ᓃᓇᐎᓐᑦ ᓂᐐᑕᒪᐙᓯᐙᓈᓂᒃ ᐊᐎᔭᒃ ᐁᔑᐌᐱᓯᔦᒃ᙮ 9 ᐐᓇᐙ ᑯ ᑲᑭᓇ ᑭᑕᔑᒥᑯᐙᒃ ᐋᓃᓐ ᐁᔑᐲᑎᑲᔑᔮᕽ ᐊᐲ ᑲᑮᑮᔫᑕᒥᑰᔦᒃ, ᑲᔦ ᐋᓃᓐ ᑳᔑᑴᑫᑕᒣᒃ ᐁᑮᐃᔑᐌᐱᓀᒀ ᒪᓂᑑᑳᓇᒃ, ᐁᑮᑌᐺᑕᐌᒃ ᑭᔐᒪᓂᑑ, ᐁᑮᐐᐊᓄᑮᑕᐌᒃ᙮ ᒦ ᐊᐌ ᑭᔐᒪᓂᑑ ᐁᑌᐺᐎᓂᐎᒡ ᑲᔦ ᐁᐱᒫᑎᓯᐎᓂᐎᒡ᙮ 10 ᑭᑎᐹᒋᒥᑯᐙᒃ ᑲᔦ ᐁᐊᔕᐙᐸᒥᒣᒃ ᑭᔐᒪᓂᑑ ᐅᑯᓯᓴᓐ, ᑭᒋᑮᔑᑯᕽ ᒋᐱᐅᒋᓈᑯᓯᓂᒡ, ᒦ ᐊᐌ ᒋᓴᔅ ᐌᑯᓯᓯᒫᐎᒡ, ᐊᐊᐌ ᑳᑮᑮᐌᐱᒫᑎᓯᐃᑯᒡ ᑭᔐᒪᓂᑑᓐ ᑮᐃᔥᒀᓂᐳᒡ᙮ ᒦ ᐊᐌ ᒋᓴᔅ ᑳᔖᐾᐃᓇᕽ ᐁᑳ ᒋᐸᑕᑯᔥᑳᑯᓯᐗᕽ ᑭᔐᒪᓂᑑ ᐅᓂᔥᑳᑎᓯᐎᓐ ᑳᐐᐱᑕᑯᔑᓅᒪᑲᓂᓂᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society