Coop 1 - Ojibwe Kihcimasina'ikan

Coop Kiinooci'ikotc Onanakaaniwen

¹ Kii⁠ayaa hsa inini ahkiink As (Uz) kaakii ishinihkaatenik, Coop (Job) ekii ishinihkaasotc. Kaawiin hsa awaac kekoon kii‑ishi anaamentaakosihsii. Wiinke kaye kiih⁠kwayahkwaatisi, okii kohtaanenimaan kaye Kishemanitoon. Kaawiin kaye okiih papaapisiskentansiin macikekoon.

² Kii⁠niishwaahciwa' (7) okosihsa', otaanihsa' kii⁠nihsiwa' (3).

³ Niipiwa' hsa kaye okiih tipenimaa' awahkaana'. Niishwaahcink mitaahswaahk (7,000) maanahcaanihsha', nihsink mitaahswaahk (3,000) pihkwaawikane mihtatimoo', mitaahswaahk (1,000) pishihkiwa', naanwaahk (500) noonshe maanshimihtatimoo'. Kiih⁠paahtiinowa' kaye otanohkii'aakana'. Wa'a hsa inini wiinke maawac kii⁠kihci wenootisi waapanonk inahke ahpiihc wiin i'i kotak ininiwa'.

⁴ Coop tahsh okosihsa' kii⁠nihtaa memeshkwaci wiihkwantiwa', ekii antomaanitc otawemaani ekii wiici wiihsiniimikonitc, ekii wiici minihkwemikonitc kaye.

⁵ Ahpii tahsh ekii ishihsenik e⁠ishkwaa wiihkwantinaaniwaninik, Coop hsa wiipa kikishep kii⁠wanishkaa. Miihsh kaakiih pakitinaahsoohtamawaatc kaa‑ankwaahkisikaatenikin tino minihk hsa ko kaakiih tahshinitc, ekii inwaatank ekiih pehki'aatc oniicaanihsa'. Mii hsa 'i kaa⁠ihkitotc, “Maakishaa hsa kaa⁠maci'ishihcikewaakwen, maakishaa kaye kaa⁠maci'inahpinemaawaakwen Kishemanitoon ote'iwaank.” Mii hsa 'o Coop kaa⁠nihtaa ishihciketc.

⁶ Ahpii tahsh e⁠ishi kiishikaninik iki kihcikiishiko awiyak kii⁠nihtaa anta waapamaawaatc Kishemanitoon enaahsamiinitc, kewiin hsa Setan Onanakaaniwe kiih⁠pi takwii.

⁷ Miitahsh kaaTipenciketc kaa'inaatc Onanakaaniwen, “Aanti kiin inaa kaah⁠pi'onci takohshinan?” okii ishi kakwecimaan. Miihsh o'o Onanakaaniwen kaa⁠ishi nahkwehtaakotc, “Weti hsa nimpi oncii ahkiink kaashi nihtaa papaamohseyaan, kaashi nihtaa aayaashawishkaayaan,” okii'ikoon.

⁸ Miitahsh kaaTipenciketc kaakii'inaatc Onanakaaniwen, “Kitoonci naanaakatawaapamaa na nintanohkii'aakan Coop? Kaawiin hsa awiya i'imaa ahkiink ishi'ayaahsiiwan i'i kaa⁠ishi'ayaatc. Kaawiin awaac kekoonini ishi anaamentaakosihsii, wiinke kaye kwayahkwaatisi. Okohtaanenimaan kaye Kishemanitoon, kaawiin kaye opapaapisiskentansiin macikekoon,” okii'inaan.

⁹ Miihsh o'o Onanakaaniwen kaa⁠ishi nahkwehtaakotc, “Ishi anihshaa na Coop otaa kohsaan Kishemanitoon?

¹⁰ Mii iitok entootawatc e⁠waahkaa menikanaahkohkantawatc eh⁠kanawenimatc. I'i kaye kahkina otaawinink kaa⁠onciinitc, kahkina kaye otaya'iiman, misiwe hsa ko kitoonci kanawenimaa. Kiminohse'aa kaye aaniin iko eshihciketc, otawahkaana' kaye awahshime e⁠ani paahtiinonitc i'imaa otahkiimink.

¹¹ Taka hsa otaahpinamaw kahkina kekoonini kaa‑ayaatc, inashke tahsh kika maci'inaahpinemik enaahsamiiwatc!” okii'ikoon.

¹² Miihsh kaaTipenciketc kaa'inaatc Onanakaaniwen, “Haw, kahkina hsa kekoonini kaa‑ayaatc kika kashkihtaawaan waah⁠tootamowatc ci⁠tootamowatc. Keko tahsh wiin papaamentamowaahken a'a inini opimaatisiwin,” mii 'i kaa'inaatc. Miihsh Onanakaaniwen kaa⁠ishi nakanikotc.

Coop Oniicaanihsa' Kiihcaaki'imintc, Owenootisiwin Kaye Kii'otaahpinamawintc

¹³ Aapitink hsa eh⁠kiishikaninik Coop oniicaanihsa' kiih⁠tashi wiihkwantiwa' otaawininiink ini maawac sesiihkisinitc okosihsan.

¹⁴ Awiyan tahsh kiih⁠piitaacimopahtoowan Coop eshi'ayaatc ekiih pi'ikotc, “Iki hsa pishihkiwak mekwaa mihshawahkamik e⁠anohkii'ankitwaa, maanshimihtatimook kaye pehsho i'imaa entashi wiihsiniwaatc.

¹⁵ Iki hsa Sepiiyan (Sabeans) kaatinowiwaatc ininiwak ninkii miikaanikonaanik, okii maaciinaawaa' kaye awahkaana'. Okii nihsaawaa' kaye anohkii'aakana', niin tahsh ehta ninkiih shaapwii cipi tipaacimoyaan,” okiih pi'ikoon.

¹⁶ Mekwaa tahsh eh⁠kaakiikitonitc ini kaakiih piitaacimonitc, miinawaa hsa peshik kotak kiih⁠pakamipahtoowan ekii inaacimonitc, “Kiishikonk hsa ishkote kiih⁠pionci naashihse, miihsh i'imaa maanahcaanihshak, anohkii'aakanak kaye kaa⁠ishi ankwaahkisowaatc. Niin tahsh ehta ninkiih shaapwii ci⁠wiintamawinaan aaniin kaa⁠inahkamikahk,” kii‑ihkitowan.

¹⁷ Mekwaa tahsh eh⁠kaakiikitonitc ini, miinawaa hsa peshik kotak awiyan kiih⁠pakamipahtoowan Coop eshi'ayaatc ekii'ikotc, “Kii⁠nihswewaanakisiwak hsa ininiwak Kaaltiiya (Chaldea) ahkiink wenciiwaatc ekiih pi takohshinowaatc ekii maaciinaawaatc pihkwaawikane mihtatimoo', miitahsh kaye kaa⁠ishi nihsaawaatc anohkii'aakana'. Niin ihsa ehta ninkiih shaapwii ci⁠wiintamawinaan aaniin kaa⁠inahkamikahk,” okii'ikoon.

¹⁸ Cipwaa kiishaacimonitc tahsh ini, aasha miinawaa kotak awiyan kiih⁠pakamipahtoowan o'o ekii'ikotc, “Kiniicaanihsak hsa mekwaa e⁠wiihkwantiwaatc, e⁠wiihsiniwaatc, e⁠minihkwewaatc kaye weti otaawinink maawac kaa⁠sasiihkisitc;

¹⁹ wiinke hsa kiih⁠kihci pakamaaniman, kaashi pashkwaak ekii ontaanimahk. Miitahsh kaakiih kaahciciwepahsink i'i waahkaa'ikan kaashi kakiihkeyaak, miihsh i'i kaa⁠ishi kawihsek. Kahkina tahsh i'imaa piintik oshkaya'aak kaakii ayaawaatc kii⁠aapisihkoosowak. Niin tahsh ehta ninkiih shaapwii, miihsh o'o kaa⁠onci wiintamawinaan,” okii'ikoon.

²⁰ Miitahsh Coop kaa⁠ishi pasikwiitc ekiih taashkiikipitootc okashkiikiiwin. Miihsh kaye kaa⁠ishi kashkipaatootc ohtikwaan kaa‑ahpiihci minciinawesitc ekii animihkohtaatc mihtahkamik. Kishemanitoon tahsh okii anami'ehtawaan.

²¹ Miitahsh o'o kaa⁠ihkitotc, “Kaawiin hsa kekoon ninkii ayaahsiin kii⁠nihtaawikiyaan, mii kaye i'i nahke keshi nipoyaan. KaaTipenciketc ohsha kekoonini miikiwe, wiin kaye kekoonini otaahpinamaake. Taka hsa kaaTipenciketc owiinsowin ta⁠miikwehciwentaakwanini,” kii‑ishi anami'aa.

²² O'o tahsh kahkina Coop ekii ishihsetc, kaawiin hsa kii⁠macitootansii, kaawiin kaye Kishemanitoon okii anaamimaahsiin.