1 ᑭᒋᐅᑭᒫᒃ 1 - Ojibwe Kihcimasina'ikan

Kihciokimaa Tepit Kii'ahkiwensiiwitc

¹ Wiinke aasha Tepit kihciokimaa kii⁠ahkiwensiiwi, ekii kihci tahsopipoonwetc. Kaawiin hsa wiihkaa kiih⁠kiishoonkwaamihsii, mihsawaa ko niipiwa' akwaniiwinan aana akwana'ontc.

² Otanohkii'aakana' itahsh okii'ikoo', “Ninkihciokimaaminaan, taka hsa ninka nanaantone'waanaan pehki oshkiniikihkwe ke⁠pami'ihk, ke⁠naanaakaci'ihk kaye. Miitahsh a'a pehsho ke⁠wiihpemihk ci⁠kiishooshkawihk,” okii'ikoo'.

³ Miitahsh kaa⁠ishi nanaantone'omintc misiwe Isriyalahkiink (Israel) wenishihshinitc ihkwewan. Aapishak (Abishag) hsa kii‑ishinihkaasowan kaakii mihkawimintc Shoonem (Shunem) ayaawinink wenciinitc, miihsh kaa⁠ishi piinimintc kihciokimaa eshi'ayaatc.

⁴ Wiinke hsa kii⁠minonaakosiwan. Miiwan hsa ini kaa⁠naanaakaci'ikotc, kaah⁠pami'ikotc kaye. Kaawiin itahsh kekoon okii onci tootawaahsiin ini ihkwewan.

Atonaaicah Kii'ihkitotc Wiin Ekihciokimaawitc

⁵ A'a tahsh Atonaaicah (Adonijah) kaakii otetetc Tepitoon, kaakii omaamaatc itahsh Hahkitan (Haggith), maawac kiih⁠sasiihkisi keyaapi eh⁠pimaatisitc. Mii hsa kaa⁠ihkitotc e⁠kihci inenintisotc, “Niin hsa ninka kihciokimaaw!” Miihsh kaakii ontinamaasotc miikaasowi otaapaanaahkwa', mihtatimoo' kaye ekiih kwayaancii'aatc, naanimitana (50) kaye ininiwa' ke⁠pimi wiiciiwikotc.

⁶ Kaawiin hsa wiihkaa okii onci'ikohsiin oteten kekoon kiiwii‑ishihciketc, cikii'ikohpan, “Wekonen i'i wenci ishihcikeyan!” Wiinke kaye kii⁠minonaakosi, Aapasalamoon ohsayensan eh⁠ahkohshkawaatc.

⁷ Okiih kanoonaan hsa Cooapoon (Joab) wemaamaanitc Seroaayah (Zeruiah), ini kaye Apaayahtaran (Abiathar) anami'ewikimaan. Miihsh kaa⁠ishi wiici'ikotc.

⁸ Ini tahsh wiin Setahkoon (Zadok) anami'ewikimaan, Piinaaiawan (Benaiah) wetetenitc Ceohiataawan (Jehoiada), Nehtanan (Nathan) kaye kaa⁠kanootamawaanitc Kishemanitoon, Shimiaaiwan (Shimei), Oreaaiwan (Rei), i'i kaye shimaakanihsha' Tepitoon kenawenimikonitc ininiwa' kaawiin okii wiiciiwikohsii' Atonaaicah.

⁹ Miitahsh Atonaaicah kaa⁠ishi pakitinaahsoowaaketc maanahcaanihsha', pishihkiwa' kaye, kaa‑aancipoonimintc kaye pishihkiinhsa' weti Kinepikwahsiniink ecikaatenik ciikaya'ii ayaawinink Enrooceyal (En Rogel) ecikaatenik. Kahkina hsa okii antomaa', kihciokimaan okosihsini kaakii owiicihkiiwetc, i'i kaye kahkina ininiwa' Coota (Judah) ahkiink wenciinitc Tepitoon kaa‑anohkii'aanitc.

¹⁰ Kaawiin itahsh wiin okii antomaahsiin Nehtanan kenootamawaanitc Kishemanitoon, Piinaaiawan kaye, i'i kaye shimaakanihsha' kenawenimaanitc Tepitoon. Kaawiin kaye okii antomaahsiin wiicihkiweyan Swaalaman (Solomon) eshinihkaasonitc.

Swaalaman Kiikihciokimaawi'intc

¹¹ Nehtan (Nathan) itahsh okii'inaan Paahshiipawan (Bathsheba) wekosihsinitc Swaalamanan, “Kaawiin ina kinoontansii Atonaaicah wemaamaatc Hahkitan (Haggith) ekii kihciokimaawi'itisotc? Kitookimaaminaan Tepit itahsh awaac e⁠kihkentansik?

¹² Inashke kika wiintamawin aaniin mayaa ke⁠ishihcikeyan keshi pimaacihtooyan kipimaatisiwin, a'a kaye kikosihs keshi pimaaci'atc Swaalaman.

¹³ Anta waapamaahkan Tepit kihciokimaa, miitahsh o'o ke'inatc, ‘Nintookimaam kihciokimaa, kikii aayiici ahshotamawihshinaapan iitok o'o ekii'ishiyampan, “Kehcinaac hsa kikosihs Swaalaman ta⁠kihciokimaawi kii‑ishkwaa kihciokimaawiwak, ci⁠namatapitc ninkihciokimaawapiwinink?” Wekonenini tahsh Atonaaicah wiin wenci kihciokimaawitc?’ ”

¹⁴ Miihsh o'o kaa‑ani'inaatc, “Mekwaa tahsh keyaapi weti ayaayan kakanoonatc kihciokimaa, mii hsa ci⁠piintikeyaan, keniin ci⁠wiintamaan mayaa ehkitoyan,” okii'inaan.

¹⁵ Miitahsh Paahshiipa kaakii ishaatc eshi nipaanitc, ekii anta waapamaatc kihciokimaan ehkiwensiiwinitc. Mii hsa 'iwe ini ihkwewan Aapishakan Shoonem (Shunem) wenciinitc kaakiih tashi pami'aanitc kihciokimaan.

¹⁶ Miitahsh Paahshiipa kaa⁠ishi animihkohtaatc eshi'ayaanitc e⁠kihtenimaatc kihciokimaan. Miihsh o'o kaa'ikotc, “Wekonen entawentaman?” okii'ikoon.

¹⁷ Miitahsh o'o kaa'inaatc, “Nintookimaam, kiin iitok kikii ayiici ahshotamawihshinaapan ekii ahpimoyan kaaTipenciketc kiKishemanitoom o'o ekii'ishiyampan, ‘Kikosihs hsa Swaalaman ta⁠kihciokimaawi kii‑ishkwaa okimaawiyaan, ci⁠namatapitc ninkihciokimaawapiwinink.’

¹⁸ Inashke tahsh aasha Atonaaicah kihciokimaawi, kaawiin itahsh nintookimaam kehciokimaawiyan kikihkentansiin o'o.

¹⁹ Kiih⁠pakitinaahso ohsha niipiwa' pishihkiwa', maanahcaanihsha' kaye, kaa‑aancipoonimintc kaye pishihkiinhsa'. Okii antomaa' kaye kahkina kihciokimaan okosihsini, Apaaitaran (Abiathar) anami'ewikimaan, Cooapoon kaye shimaakanihshiiwikimaan, kaawiin itahsh wiin okii onci antomaahsiin Swaalamanan kitanohkii'aakanan.

²⁰ Nintookimaam kihciokimaa, kahkina ohsha Isriyalak (Israel) kikanawaapamikook ewii kihkentamowaatc ci⁠wiintamawatwaa awenen ke⁠naapishkawihk o'o kaashi kihciokimaawiyan.

²¹ Kiishpin itahsh i'i ishihcikehsiwan, ahpii hsa ko ishkwaa pimaatisiyan, mii hsa 'i ke⁠tootaakooyaank ninkosihs Swaalaman ci‑inakimikooyaank tino kaa⁠mamaashiiwaatc,” okii'inaan.

²² Mekwaa tahsh eh⁠kakanoonaatc kihciokimaan, mii hsa Nehtanan kenootamawaanitc Kishemanitoon kaakiih pitakohshininitc.

²³ Miitahsh o'o kaakii'inimintc kihciokimaan, “Nehtan kaa⁠kanootamawaatc Kishemanitoon hsa o'omaa ayaa!” Miitahsh kaakiih pi piintikenitc eshi'ayaanitc kihciokimaan ekii ishi animihkohtaanitc.

²⁴ Miitahsh o'o Nehtan kaa⁠ihkitotc, “Nintookimaam kihciokimaa, kiin ina kaakii inatc Atonaaicah ci⁠naapishkawihk ci⁠kihciokimaawitc, ci⁠namatapitc kaye kikihciokimaawapiwinink?

²⁵ Noonkom ohsha kaa⁠kiishikaninik opakitinaahsoowaakena' niipiwa' pishihkiwa', kaa‑aancipoonimintc pishihkiinhsa', maanahcaanihsha' kaye. Okii antomaa' kaye kahkina kihciokimaan okosihsini, shimaakanihshiiwikimaa' kaye. Okii antomaan kaye Apaaitaran anami'ewikimaan. Noonkom itahsh matwe wiihsiniwak e⁠wiitoohpamaawaatc o'o e⁠ihkitowaatc, ‘Taka Atonaaicah kihciokimaa kinwesh ta⁠pimaatisi!’

²⁶ Kaawiin itahsh niin ninkii antomikohsii. Kaawiin kaye Setahkoon (Zadok), Piinaaiawan (Benaiah) wetetenitc Ceohiataawan (Jehoiada), ini kaye Swaalamanan okii antomaahsii'.

²⁷ Miina'oweni nintookimaam kihciokimaa kaa⁠ishihciketc ekii wiintamawaahsik itahsh otanohkii'aakana' ci⁠kihkentaminitc awenenan ke⁠naapishkaakotc ke⁠apinitc okihciokimaawapiwinink?” okii'inaan.

²⁸ Tepit itahsh o'o kii‑ihkito, “Antomihk Paahshiipa (Bathsheba) ci⁠piishaatc,” kii‑ihkito. Miitahsh kaa⁠ishi piishaanitc Tepit eshi'ayaatc, ekii inaahsamikaapawihtaakotc.

²⁹ Miitahsh kihciokimaa kaa⁠ishi ahpimotc ekii'inaatc, “Kehcinaac iko kaaTipenciketc wiin misiwe eh⁠tipenciketc, a'a kaa⁠naatamawitc kahkina kekoon eshi maanshihsewak,

³⁰ mii 'i ehpiihci kehcinaa'entamaan keniin ke⁠tootawinaan kaa⁠ishi ahpimonotawinaampaan ekii ahpimoyaampaan kaaTipenciketc Isriyala' weKishemanitoomimikotc. A'a hsa Swaalaman kikosihs ninka naapishkaak ci⁠kihciokimaawitc, wiin ci⁠apitc ninkihciokimaawapiwinink. Noonkom hsa kaa⁠kiishikahk i'i ta⁠ishihse,” okii'inaan.

³¹ Miitahsh Paahshiipawan kaa⁠ishi animihkohtaanitc, ekii ociciinkwanapiihtaanitc o'o ekii ihkitonitc, “Taka nintookimaam Tepit kihciokimaa nehpic ta⁠pimaatisi!” kii‑ihkitowan.

³² Miitahsh o'o Tepit kihciokimaa kaa⁠ihkitotc, “Taka antomihk Setahk anami'ewikimaa, Nehtan kaye kaa⁠kanootamawaatc Kishemanitoon, a'a kaye Piinaaia wetetetc Ceohiataawan,” kii‑ihkito. Ahpii tahsh tekohshininitc kihciokimaa eshi'ayaatc,

³³ mii 'oweni kaa'inaatc, “Wiishaamihkwak nintanohkii'aakanak ci⁠wiici'inekwaa. Nishoonshoomihtatimoomink hsa ishi api'ihk ninkosihs Swaalaman, weti tahsh ishiwinaahkek ayaawinink Kaaihan (Gihon) ecikaatenik.

³⁴ Miitahsh weti Setahk anami'ewikimaa, a'a kaye Nehtan kenootamawaatc Kishemanitoon ke⁠tashi onaapamaawaatc Swaalamanan ci⁠kihciokimaahkantawaanitc Isriyala'. Pootaatamoohkek kaye pootaacikan o'o ci‑ishi shaakoweyek, ‘Kinwesh Swaalaman kihciokimaa ta⁠pimaatisi!’

³⁵ O'omaa tahsh inahke pishi kiiwe wiiciiwaahkek, ci⁠namatapitc ninkihciokimaawapiwinink ci⁠naapishkawitc eshi kihciokimaawiwak. Niin hsa ninkii onenimaa ci⁠okimaahkantank Coota (Judah) ahkiini, Isriyalahki kaye,” kii‑ihkito.

³⁶ Miitahsh o'o Piinaaiawan wetetenitc Ceohiataawan kii‑ihkitowan, “Taka hsa mii 'i ke⁠ishihsek! Taka hsa kaaTipencikenitc weKishemanitoomitc nintookimaam i'i ta⁠ihkitowan.

³⁷ I'i hsa kaaTipenciketc kaakiih pishi wiiciiwihk nintookimaam kihciokimaa, taka mii'inahke keshi wiiciiwaatc Swaalamanan aanciihke ci‑ishihtootc otookimaawiwinini ci⁠ani kihci inentaakwaninik ahpiihc kiin enentaakwahk kitookimaawiwin!” kii‑ihkitowan.

³⁸ Miitahsh Setahk anami'ewikimaa, Nehtan kaye kenootamawaatc Kishemanitoon, Piinaaia kaye wetetetc Ceohiataawan, iki kaye kaa⁠kanawencikewaatc, kii‑ishaawak e⁠antawi onapi'aawaatc Swaalamanan Tepitoon oshoonshoomihtatimoominiink. Okii ishi wiiciiwaawaan itahsh weti ayaawinink Kaaihan ecikaatenik.

³⁹ Miitahsh Setahk anami'ewikimaa kaa⁠ishi otaahpinank eshkani ahtoopaan eshi piintenik pimite kihci anami'e pakwaanekamikonk kaakiih pi'onci piitootc. Miihsh kaakiih siikinank Swaalamanan ohtikwaaniniink e⁠inakimaatc ci⁠kihciokimaawinitc. Miihsh kaa⁠ishi noontaakohtoowaatc pootaacikan kahkina pemaatisiwaatc ekii ishi shaakowewaatc, “Taka kinwesh Swaalaman kihciokimaa ta⁠pimaatisi!”

⁴⁰ Miitahsh kahkina pemaatisiwaatc kaa⁠ishi kiiwe wiiciiwaawaatc ekiih kitohcikaakewaatc pootaacikanenhsan, wiinke kaye ekiih kihci ciihkentamowaatc. Miihsh kaakii onci koshkohsenik mihtahkamik ekiih kishiiwewaatc.

⁴¹ Atonaaicah (Adonijah) tahsh, i'i kaye kahkina kaa⁠wiiciiwikotc e⁠ani ishkwaa wiihsiniwaatc, okii noontaanaawaa i'i enihtaakwaninik. E⁠noontamowaatc itahsh pootaacikan mii 'i Cooap (Joab) kaa⁠ihkitotc, “Amanc inaa enwaatekwen i'i kahkina kaa⁠noontamank o'omaa ootenaank?” kii‑ihkito.

⁴² Mekwaa eh⁠kiikitotc, Cwaanahtanan (Jonathan) wetetenitc anami'ewikimaan Apaaitaran kiihpi takohshinoon. Atonaaicah tahsh okii'inaan, “Piintiken. Sesekaa ininiiwiyan, kehcinaac maawiin sasekaa tipaacimowin kipiitoonaatok!” okii'inaan.

⁴³ Miitahsh o'o kaa'ikotc Cwaanahtanan, “Kaawiin kanake sasekaa tipaacimowin nintayaahsiin. Kitokimaaminaan Tepit kihciokimaa hsa okii ishi'aan Swaalamanan ci⁠kihciokimaawinitc.

⁴⁴ Kihciokimaa ohsha iinsan okii ishinisha'waan Setahkoon anami'ewikimaan, Nehtanan kaye kenootamawaanitc Kishemanitoon, Piinaaiawan kaye wetetenitc Ceohiataawan, i'i kaye kaa⁠kanawencikenitc kaye ci⁠onapi'aanitc Swaalamanan Tepitoon oshoonshoomihtatimoominiink.

⁴⁵ Setahk anami'ewikimaa hsa, a'a kaye Nehtan kenootamawaatc Kishemanitoon okiih tashi onakimaawaan ci⁠kihciokimaawinitc Swaalamanan weti ayaawinink Kaaihan. Miitahsh weti kaah⁠pi onciiwaatc o'o kaa⁠ciihkentamowaatc, miihsh kaa⁠onci ompwehkamikahk o'omaa ootenaank. Mii hsa 'iwe kaa⁠noontamek kaa⁠kihci inihtaakwahk.

⁴⁶ Swaalaman itahsh noonkom kihciokimaawi e⁠apitc kihciokimaawapiwinink.

⁴⁷ Kihciokimaa tahsh kaye otanohkii'aakana' okii kihtenimiko' Tepit kihciokimaa o'o ekii'ikotc, ‘Taka kiKishemanitoom ta⁠ishihcike nawac Swaalaman owiinsowin ci⁠kihci inentaakwaninik ahpiihc kiin, otookimaawiwin kaye nawac ci⁠kihci inentaakwaninik!’ Miitahsh kihciokimaa kaa⁠ishi animihkohtaatc onipewinink ekii anami'aatc.

⁴⁸ Miihsh o'o kihciokimaa kaa⁠ihkitotc, ‘Ta⁠miikwehciwentaakosi kaaTipenciketc, Isriyalak weKishemanitoomiwaatc e⁠waapamimak peshik nimpiiwesiiman noonkom kaa⁠kiishikaninik e⁠naapishkawimitc ci⁠kihciokimaawinitc,’ ” okii'ikoon Cwaanahtanan.

⁴⁹ Kahkina tahsh Atonaaicah kaakii wiiciiwikotc kiih⁠sekisiwa', miihsh kaa‑ani ishi maacaanitc entahshinitc ekii misihteshkaanitc.

⁵⁰ Atonaaicah hsa kaa‑ahpiihci kohsaatc Swaalamanan, kii‑ishaa kihci anami'e pakwaanekamikonk ekii awi sakinank kiihkeyaank eshi kakaashihcikaatenik eshi pakitinaahsowintc.

⁵¹ Miitahsh Swaalaman kaakii'inintc, “Atonaaicah hsa okohsaan Swaalamanan kihciokimaan, miihsh kaa⁠onci sakinank kiihkeyaank eshi kakaashihcikaatenik eshi pakitinaahsowintc. O'o iinsan kaye kii‑ihkito, ‘Taka hsa Swaalaman kihciokimaa ta‑ahpimo noonkom kaa⁠kiishikaninik pashipa'ikewihkomaanink ci⁠onci nihsikoowaahsiwak, otanohkii'aakanink e⁠inentaakosiwak,’ ” kii‑inaa Swaalaman.

⁵² Swaalaman itahsh o'o kii‑ihkito, “Kiishpin hsa enentamokwen kwayahk ci⁠wiicihtwaatc eshi okimaawiwak, kaawiin kanake peshik wiinisihs mihtahkamik ta⁠ishi pankihsisiinini; kiishpin itahsh wiin kekoon kaa⁠ishi mamaashiikwen, mii hsa 'i ci⁠nipotc,” kii‑ihkito.

⁵³ Miitahsh Swaalaman kaa⁠ishi anoonaatc otininiima' ci⁠naasihkawaanitc Atonaaicahwan kaakii ishi sakinaminitc eshi pakitinaahsowintc. Ahpii tahsh kaah⁠piishaanitc eshi'ayaatc Swaalaman kihciokimaa, mii hsa kaa⁠ishi animihkohtaanitc mihtahkamik. Miihsh o'o kaa'inaatc, “Maacaan ani kiiwen,” ekii'inaatc.