Thimo 5 - IBUKU RĨRĨA ITHERU RĨA NGAI

¹ MŨRŨ wakwa, thikĩrĩria ũũgĩ ũyũ wakwa; inamĩrĩria gũtũ, ũtaũku ũyũ wakwa ũkĩũigue,

² Nĩ getha ũtũũre wĩ na ũgerereri, nayo mĩromo yaku ĩikarage ĩrĩ na ũmenyi.

³ Amu-rĩ, mĩromo ya mũndũ mũka ũrĩa wa kwene ĩtaataga ũũkĩ, kanua gake kanyorokete gũkĩra maguta,

⁴ No rĩrĩ, marigĩrĩrio make nĩ marũrũ o ta mũgũta, nĩ mogĩ o ta rũhiũ rũa njora rũnore mbarĩ cierĩ.

⁵ Magũrũ make me njĩra ya gũikũrũka na gĩkuũ-inĩ, makinya make nĩ magwatu gũthiĩ o kũu Kwa-ngoma;

⁶ Agakĩũranwo na njĩra ĩrĩa njaraganu ya muoyo; ikĩro ciake nĩ njagaagu, ndoĩ na kũrĩa irorete.

⁷ Na rĩu, ariũ akwa-rĩ, no kĩiguei ũrĩa nguuga, ciugo cia kanua gakwa mũtikanae gũtigana nacio.

⁸ Njĩra yaku reke ĩraihanĩrĩrie mũno na kũu mũndũ mũka ũcio arĩ, ndũkanakuhĩhĩrie mũromo-inĩ wa nyũmba yake,

⁹ Ndũkae gũkahe andũ angĩ riri waku, ndũgakĩnenganĩre mĩaka yaku harĩ ũrĩa ũtarĩ tha;

¹⁰ Andũ ageni-rĩ, matikehũnie na hinya waku, ũrĩmi ũrĩa ũnogeire ũtuĩke wa mũciĩ wa mũrũrĩrĩ;

¹¹ Nawe marigĩrĩrio-inĩ maku ũgagĩcakayaga, rĩrĩa nyama ya mwĩrĩ waku, o gwata mwĩrĩ waku wothe, igakorũo nĩirathirĩrĩkĩra,

¹² Ũkoigaga, Wũi! nĩ kĩ gĩatũmire ’thũũre gũtaarũo, na ngoro yakwa ĩgĩtirika kũrũithio,

¹³ Na ndĩathĩkĩre mũgambo wa arĩa maandutaga, na nditege matũ ngĩigue arĩa maandaaraga?

¹⁴ Ndĩratigairie hanini ’horokere o ũũru-inĩ wothe ndĩ o kĩrĩndĩ-inĩ gatagatĩ, o hau kĩũngano-inĩ gĩakĩo.

¹⁵ Atĩrĩrĩ, nyuaga maĩ ma itahĩro rĩaku mwene, nyuaga maikũrũki moimĩte o gĩthima gĩaku kĩũmbe.

¹⁶ Githĩ nĩũtũme maĩ ma matherũkĩro maku manyagane o handũ na handũ, mĩtaro yaku nayo ĩhunjie maĩ o mabarabara-inĩ?

¹⁷ Reke matũũre me maku wee wiki, matigatuĩke manyu na andũ angĩ ageni.

¹⁸ Itherũkĩro rĩaku ta nĩrĩtũũre rĩrĩ irathime, ũgĩkenagio nĩ mũhiki ũrĩa wa wanake waku.

¹⁹ Anga ndaagĩrĩte ta mũgoma wa thwariga ũrĩa ũrĩ tha, kana ta gathiya ka mũgoma karĩa kega? Iganagwo nĩ nyondo ciake mahinda mothe, ũkenũkagio hingo ciothe no rũendo rũake arĩ we.

²⁰ Amu nĩ kĩ kĩngĩtũma wee, mũrũ wakwa, wende gũkenũkio nĩ mũndũ mũka wa kwene, na ũkenda kũhĩmbĩria gĩthũri kĩa mũgeni?

²¹ Amu-rĩ, mĩthiĩre ya mũndũ ĩrĩ o maitho-inĩ ma Jehova, nĩwe ũtaranagia ikĩro ciake ciothe.

²² Mũndũ mwaganu akagwatio nĩ mawaganu make mwene, nga cia kũhĩtia gwake nĩcio ikamuoha.

²³ Ũcio agakua nĩ ũndũ wa kwaga gũtaarĩka; akora nĩ ũrimũ wake kũneneha.