Thimo 3 - IBUKU RĨRĨA ITHERU RĨA NGAI

¹ MŨRŨ wakwa, menya gũkariganĩrũo nĩ kĩrĩra gĩakwa, ngoro yaku ta nĩĩĩikaragĩrie maathani makwa o wega!

² Thima-rĩ, magakuongererithia ũraihu wa matukũ, ũgĩtũũre mĩaka mĩingĩ, na ũikarage o na thayũ.

³ Ũtugi, na ũhoro-wa-ma-rĩ, ndũkanareke igũthame: ciĩoherere ngingo; ciandĩke kĩhengere-inĩ gĩaku kĩa ngoro:

⁴ Weka ũguo, no ũtuĩke wa kwendwo na ũgĩe na gĩtĩo maitho-inĩ ma Ngai o na ma andũ.

⁵ Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene;

⁶ Mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.

⁷ Tigaga kwĩona wee mwene ta wĩ mũũgĩ; ĩtigagĩre Jehova, ũthemage maũndũ marĩa moru:

⁸ Na ũhoro ũcio no ũtuĩke wa gũtũũria mũkonyo waku na hinya na wa gũikaragia mahĩndĩ maku na ũigũ

⁹ Tĩithagia Jehova na indo iria ũrĩ nacio, ningĩ na mĩgerio ya uumithio wothe ũrĩa wonaga:

¹⁰ Hĩndĩ ĩo makũmbĩ maku no maiyũrage bũthi, nacio itumbĩ ciaku ciiyũragĩrĩre ndibei ya mũhihano.

¹¹ MŨRŨ wakwa, menya gũgatirika ihũra rĩa Jehova, kana ũnoge nĩ kũrũithio nĩwe,

¹² Nĩ gũkorũo Jehova arũithagia ũrĩa endete, o ta ũrĩa ithe wa mũndũ arũithagia mũriũ o ũcio akenagĩra.

¹³ Gũkena-rĩ, nĩ mũndũ ũrĩa wonete ũũgĩ-ũrĩa-wa-ma, na mũndũ wĩrutagĩra ũtaũku mũthithũ-inĩ wake.

¹⁴ Amu wonjoria waguo nĩ mwega kũrĩ wonjoria wa betha, uumithio waguo ũgagĩkĩra wa thahabu ĩrĩa theru mũno.

¹⁵ Mũtumia ũcio ũgwĩtwo Ũũgĩ-ũrĩa-wa-ma e bata gũkĩra ruru iria ndune, na indo ciothe iria ũngĩĩrirĩria gũtirĩ kĩngĩhota kũgerekanĩka nake.

¹⁶ Rũhĩ-inĩ rũake rũa ũrĩo arĩ na ũraihu wa matukũ, naruo rũa ũmotho arĩ na ũtonga na gĩtĩo.

¹⁷ Njĩra ciake irĩ o maũndũ ma kũiguithia mũndũ wega, na tũcĩra twake tuothe no twa thayũ.

¹⁸ Harĩ arĩa mamwĩgwatĩrĩire nĩ mũtĩ wa muoyo; mũndũ wa gũtũũra amwĩnyitĩrĩire, kaĩ nowe wa gũkena-ĩ!

¹⁹ Ũũgĩ-rĩ, nĩguo Jehova aahandire gĩtina gĩa thĩ naguo, igũrũ narĩo aarĩrũmirie na ũtaũku ũcio wake.

²⁰ Nĩ ũmenyi wake watũmire maria-inĩ kũu kũriku gũtuthũrũrũke, nakuo matu-inĩ gũgataatangagia ime.

²¹ MŨRŨ wakwa, ndũkanareke maũndũ maya mathenge maitho-inĩ maku; ũũgĩ ũrĩa mũkinyanĩru, gwata ũgerereri-rĩ, ciĩikaragĩrie:

²² Weka ũguo, no ituĩke cia gũtũũria roho waku muoyo, na ituĩke wagĩru wĩ ngoga wĩkĩrĩte ngingo.

²³ Hĩndĩ ĩo no ũthiage na njĩra yaku o wĩgangarĩte, na kũgũrũ gwaku gũtingĩkahĩngwo.

²⁴ Wakoma, ndũrĩ ũndũ ũngĩĩtigĩra, ĩĩ-ni, no gũkoma ũrĩkomaga ũkona toro mwega.

²⁵ Ndũngĩgĩa na bata wĩtigĩre kĩmakania kĩrĩa kĩngĩũka na kĩguũ, o na kana gĩcanjamo kĩa arĩa aaganu, rĩrĩa kĩngĩmakinyĩrĩra,

²⁶ Nĩ gũkorũo Jehova nĩwe ũgũtuĩka mwĩhoko waku, nake no amenyagĩrĩre kũgũrũ gwaku gũtikagwatio nĩ mũtego.

²⁷ Menya gũkaima andũ ũndũ mwega, arĩa maagĩrĩirũo nĩ gwĩkwo, guoko gwaku gwakorũo gũtaagĩte hinya wa kũwĩka.

²⁸ Tiga kwĩra mũndũ wa itũũra rĩanyu, Thiĩ, ũcoke rĩngĩ, nĩngakũhe rũciũ; na kĩrĩa ekwenda ũrĩ o nakĩo hakuhĩ.

²⁹ Ndũkanathugundĩre mũndũ wa itũũra rĩanyu ũndũ mũũru, kuona nĩmũtũũrainie atarĩ na ũndũ angĩĩgigima.

³⁰ Ndũkanahiũranie na mũndũ tũhũ, atarĩ ũũru agwĩkĩte.

³¹ Menya ũigue ũiru nĩ ũndũ wa mũndũ ũrĩa mũtoi, na ndũkanethurĩre njĩra ciake o na ĩmwe ũmĩrũmĩrĩre.

³² Amu mũndũ mũhĩtanu nĩ kĩndũ kĩĩ magigi harĩ Jehova, no andũ arĩa arũngĩrĩru nĩo agĩaga ndundu nao.

³³ Mũciĩ wa arĩa aaganu ũtũũraga ũrumĩtwo nĩ Jehova, nakĩo gĩtũũro kĩa mũndũ mũthingu nĩ kũrathima akĩrathimaga.

³⁴ O na aatuĩka atĩ arĩa atendi, gũtenda nĩakĩmatendaga, andũ arĩa matarĩ etĩi-rĩ, nĩ wega wake amakinyagĩria.

³⁵ Andũ arĩa ogĩ, igai rĩrĩa makagaya nĩ riri, ĩndĩ ngatho ĩrĩa ĩgwatagwo nĩ irimũ no njono.