Thimo 18 - IBUKU RĨRĨA ITHERU RĨA NGAI

¹ Mwĩbũngia arũmagĩrĩra o kwenda gwake mwene, akang’athithagio nĩ ũũgĩ wothe ũrĩa mũkinyanĩru.

² Kĩrimũ gĩtikenagio nĩ ũmenyi; ũrĩa kĩendaga no gũtengũra ngoro yakĩo.

³ Rĩrĩa hoka mwaganu, nĩhoka ningĩ mũrurũkano, na ũhoro wa thoni ũrehage ũmeneku.

⁴ Ndeto cia kanua ka mũndũ nĩ ta ndia ĩrĩa ndiku; gĩthima kĩa ũũgĩ no ta rũũĩ rũikũrũkaga o wega.

⁵ Ti wega gũtĩĩra mũndũ mwaganu maũthĩ, na kũgaramĩria ũrĩa mũthingu ituĩro.

⁶ Mĩromo ya kĩrimũ ĩgĩtonyagia mburuga-inĩ, na kanua gakĩo nĩgagĩĩtagĩria icamiũ.

⁷ Kanua ga kĩrimũ nĩgakĩũnũhithagia, mĩromo yakĩo nĩ mũtego ũgwatagia ngoro yakĩo.

⁸ Ndeto cia mũndũ wa mũhuhungo nĩ ta macũno ma kĩhembe, na kũmerũka imerũkaga nginya tũturi-inĩ twa nda tũrĩa twĩ thĩinĩ mũno.

⁹ Ũrĩa nake ũrutaga wĩra wake na mũhũthia nĩ wa nyina na mwanangi.

¹⁰ Rĩĩtwa rĩa Jehova nĩ nyũmba ya hinya njake mũthiringo; nĩyo mũndũ mũthingu ahanyũkagĩra agatonya, akarema gũkinyĩrĩrĩka.

¹¹ Ũtonga wa mũndũ gĩtonga nĩ ta gĩtũũro e nakĩo kĩirige na hinya; ũhaana ta rũthingo rũraya na igũrũ, we akĩĩgereria.

¹² Ĩtanona mwanangĩko, ngoro ya mũndũ ĩkoragwo ĩĩgoocete; gũtĩĩka gũtongoirio nĩ kwĩnyihia.

¹³ Mũndũ gũcokia ũhoro atanaigua nĩ ũrimũ, na nĩ ũndũ wa gũtũma one thoni.

¹⁴ Roho wa mũndũ nĩguo ũmũũmagĩrĩria ahinyarĩte, no guo roho ũthuthĩkĩte-rĩ, nũ ũngĩhota gwĩtiiria?

¹⁵ Ngoro ya ũrĩa wĩ na mbuguĩro nĩĩĩthũgũragĩra ũmenyi; gũtũ kwa mũndũ mũũgĩ o nakuo no ũmenyi gũcaragĩrĩria.

¹⁶ Kĩheo mũndũ aheanĩte nĩkĩmuonagĩra ha kũhĩtũkĩra, na gĩkamũkinyia harĩ andũ arĩa anene.

¹⁷ Mwambĩrĩria cira onagwo ta arĩ we wĩ na kĩhooto, ĩndĩ ũrĩa me cira nake okaga agakĩmuururia.

¹⁸ Ũcuki wa mĩtĩ nĩũninaga ngarari, gũtuithania nĩũtuithanagia makarau.

¹⁹ Mũndũ ekĩte mũrũ wa nyina ũũru, nĩ hinya agĩcoka kwĩiguithania nake gũkĩra kwĩgwatĩra itũũra rĩirige; ngarari ta icio nĩ ta mĩgĩĩko ĩrĩa ĩhingaga njera.

²⁰ Maciaro ma kanua ka mũndũ nĩmo makamũiyũra nda; uumithio wa mĩromo yake kũmũhũnia no ũkamũhũnia.

²¹ Rũrĩmĩ rũĩ na hinya wa gwathĩrĩra mwene muoyo o na gĩkuũ, nao arĩa marũenda no marĩage maciaro maruo.

²² Ũrĩa wĩgĩĩrĩire na mũtumia nĩagĩĩte na kĩndũ kĩega; nĩ gũtugwo atugĩtwo nĩ Jehova.

²³ Mũkĩa no gũthaithana athaithanaga, no gĩtonga gĩcokagia ũhoro na mũgoromoko.

²⁴ Mũtumi ndũgũ nyingĩ nĩ wa kwĩũnũhithia, no nĩkũrĩ mũrata wa gũtũũra anyitaine na mũndũ gũkĩra mũrũ wa nyina.