Uswe 1 - Fanawbuid tagsibaliwas Fakayabian

Nu Gfalganan laman Nangagbilug Kanaan

¹ Muisis, Yawi at fagsuguan nu nbul wan, Yawi nalong sas Uswe, Nun at baguama te,

² “Ku fagsuguan Muisis anbul wan. Nu katanya, katsi, o ay anggan ngay taw Israel falganani, difei Liskung Urdan sa ku fon ban ayu fag talun.

³ Gfon kban sa ayu fagayu ay nadasug fag talun, kata ku nafatuyanan sas Muisis.

⁴ Ay fagbanwanan ban gfasigad siginans talun at yud e taw tagsabaliwas siun fag alvngvdan sitsigon sangay buksul Lebanun tagsabaliwas wala, ay siginans Eufrates, kafag liskung daul, sabaliwas fakamenitan sitsigons Dagat Mediteranyu tagsas fakayabian baliwa, ay anggan sa sangay taw Ket at talun.

⁵ “Wa ban e mababo emu kaduge o gleleg. Gufud kban gugat emu kata nu gufud au Muisis. Kwa ban gubun ay gfabayan emu.

⁶ Maksvni tua ay maseganamai, aroro o wan at nanfunan ngay taw, laman ban kanya fagayu magbilug ku nafatuyanan sat ngay mangaguyang fag talun.

⁷ Maksvni tua ay maseganamai. Faningi fia fagayu ku suguan ku nafon sa ku fagsuguan Muisis. Lag o kalyam, laman nusnga setaw am fagnamakamulunun gbabo tuo.

⁸ Lag o kalyam gtap Dius at Faugali. Amatangani tua gugat kayu menit ay yabi, laman sumaful tuo gfaning fagayu at marirukan sanya. Nu katanya tua ban am fakamulun, umkaksvn tua ban o ay gbabo.

⁹ Amatangi gugat ku suguan emu: maksvni tua ay maseganamai. Lag o kalimu ay kamomuy aroro au, Yawi am Dius, tagufud emu nusnga nday ban o.”

¹⁰ Nu katanya, Uswe nasugu sas Israel at ngay tagfangguna te,

¹¹ “Loi sa sangay taw at ngay bale ay nanlong am sa anya fagayu te, ‘Falganani ngay fakonun aroro si bans fatuluk menit, nandife tam Liskung Urdan laman nangagbilug tam Dius at nafon antam fag talun.’ ”

¹² Uswe nalong sas Rubin ay Gad at ngay kasugfunanan ay anggan sas Manase fag wabilug kasugfunanan te,

¹³ “Amatangi gugat Muisis, Yawi at fagsuguan at nalong ayu. Kanya nalong te, ay Dius Yawi gfon wan sa ayu ste fag talun laman ay fagfiangalayan.

¹⁴ Ay ngay mangena ay ay ngay sisian anggan ay ngay fagbaugun gbanwan yay ste sis fakamenitan baliwa fag tigyangan Liskung Urdan. Dewa katanya, ay ngay tagfawayan gfangguna ay ngay kaiban nandife Urdan. Ay am, gubuki anya fagayu

¹⁵ yakmay Yawi nafon anya fagayu at fagfiangalayan kata at nafon sa ayu. Sanya ginan, am, masine nu kafoli ban am stie sfakamenitan baliwa fag tigyangan Liskung Urdan, laman nangagbilug ste fag talun, Yawi at fagsuguan Muisis at nafon sa ayu.”

¹⁶ Ay kanya fagayu gbalus Uswe te, “Namakamulun ban mi fagayu am suguan ay sanya ban ami nusnga nday nu gsugu o emi.

¹⁷ Gfaning ban mi emu kata nu gfaning ami Muisis. Ay am Dius Yawi nangus galo gugat emu kata nu galo Muisis.

¹⁸ E gfabul ban nusnga sinu takamabo emu ay at yud gfaning am ngay suguan. Nu katanya, maksvni tua ay maseganamai!”