Sefanias 1 - Fanawbuid tagsibaliwas Fakayabian

¹ Katatuy Yawi at longan sas Sefanyas gina Usyas, Amun at baguama, talun Uda at fun. Sefanyas, Kusi at baguama, ay Kusi, Gedalya at baguama. Ay Gedalya, Amarya at baguama, ay Amarya, Esekyas at baguama.

Yawi at Faurianan nu Kadasug

² Yawi nalong te, “Namamin kwan fagayu nusnge wain sas fagdaul daga:

³ ngay taw, ngay fagbaugun, ngay manuk tungud ay anggan ngay albon sis dagat. Umkamin ban fagayu tagsugu sa sik taw laman gfakamulun at mauri. Ay namamin kwan ngay taw sas fagdaul daga. Au, Yawi, taglong tuy.

⁴ Namaurianan au ngay tagbanwan sis Uda, ay fagayu tagbanwan sis Erusalem. Namamin kyangay at kinsawad tagseg Baal fag fagsegan, anggan ngay tagfon fanggalangun tagfakamulun sanya laman ban kanya fagayu wa kamatang ya.

⁵ Namamin kyangay anggan ngay taw tagsas tungud bale laman nanseg menit ay magdanun ay ngay galeme. Namamin kyangay ngay taw takamuagan glong te, ‘Gfaning ami emu,’ ay aroro mangaro gseg way Mulek fag fagsegan.

⁶ Namamin kyangay tagtalyuyan ay at yud kakbang sa angku.

⁷ Maragangani si ku daga salubangan, aroro munakbang wan ku nafalganan fag menit nu namaurianan au. Nafalganan kwan laman namabul ku ngay taw kata sik fagbaugun fag fanggalangun. Ay katsi, nauro au ku nafili fag ngay tagfawayan laman namawayan talun Uda.

⁸ Ginanya ban fag menit, namabul au ngay taw Uda kata sik fanggalangun sa angku fag fagbaugun. Namaurianan au ngay tagfangguna gasfuan fun at ngay baguama, ay tagfaning tibak talun tagugali at mauri.

⁹ Ginanya ban fag menit, namaurianan kyangay fagayu tagseg ngay fagsegan, anggan at madot ay tagfandaya laman gfapnu ramraman sat fagsegan at bale.

¹⁰ Au, Yawi, glong au te, ginanya yangay ban fag menit, dumungug ban am tagwaywayan sis Erusalem at sakbawan at ngayan te, Sakbawan Albon. Ay dumungug yangay ban am tagbia fag uro siginan at bagu fag afud furuan, ay tagsi sangay buksul fag ngay bale nu kafugfug.

¹¹ Am fag ngay taw tagbanwan si tangababa fag afud furuan Erusalem, gwayway ban am, aroro ay ngay tagfalo umbul wan.

¹² Ay ginanya yangay ban fia fag menit, namae salung au ay nanrvbvy ay namaurianan ngay taw sis Erusalem tagbanwan manabayan ay gamatangan te, ‘Yawi wa namakamulun sa emi at mauri ay at masine.’

¹³ Tiba ban ktaw nangago kafag ngay taw at fagagbilugun ay nangiklas at ngay bale. Bunwa ban kanya ya at namanwan sat ngay bale. Ay bunwa yangay ban kanya ya at nanginum at fanginum siginan at tanuman wat ubas.”

Yawi nu Gfaurianan fag Menit

¹⁴ Yawi at nafalganan fag menit nu gfaurianan munakbang wan. Kafag menit masakit kadasug. Ginanya ban fag menit malimu, aroro dewa at maseganama fag ngay tagfawayan guro laman get gubuk.

¹⁵ Ginanya ban fag menit, Dius namadasug at dotama. Ginanya ban, mabalu ay maidap, ay karasras ya. Ay ginanya ban, glinyabu ay umdulum,

¹⁶ ay umdungug yangay ban nu e gbudyung gasfuan ngay tagfawayan nu gudguroan gfawayan sa sangay furuan at ke ngay alad ay dewa sat mogat fag ngay afud alad fag ngay fagulitan.

¹⁷ Yawi nalong te, “Namae fagidapun au ngay taw, ay kanya ban fagayu glao kata sik yud glag, aroro anke asalanan sa angku. Ay at taguk gtaribisan kata mamam, ay at ngay bilug kadan kata ngay nakaurian.

¹⁸ Gina kban gfaurianan fag menit, we mafalangfe anya fagayu, dewa at ngay salapi ay at ngay gintu. Ku dotama kata afuy tagirug fagdaul daga. Ay masakit nu gfamin au fagayu tagbanwan sas fagdaul daga.”