Nehọm 1 - Kịrịkẹnị Baịbụl

¹ Mịn mị anị Nehọm ịkịankoroḅọ ḅe ọrịye-ẹ Ninivẹ sẹ mị ḅụ. Anị Ẹlkọsh ama mị ḅie ḅoḅọ ḅe.

Nyanaḅọ Ḅe Ninivẹ Apụma Ḍiki Ịganịmẹ

² Nyanaḅọ Tamụnọ Ḅe, ori orina arụ ḍia ḅọ ḍọkịkẹ; ò fomuḅara seni ori na tụḅụrụ apụma pịrịpịrịmẹ. Oria ịganị ḅụ ọ̀ gbẹịnye se ini pịrịpịrịmẹ.

³ Nyanaḅọ Ḅe ọ̀ fịkịrị ịganị ịganịkẹ, ọkụma ọ̀ kụrọmẹ se siye mịẹapụ ma fomuḅara ini laka ḅụ ori ini wẹrịso-ẹkẹ. Nyanaḅọ Ḅe nwẹngịarị nyọ ḅụ, so fieḅịa; soḅuno ma anị oria nwẹngị ḅụọma mịẹ fọn ma-ẹ!

⁴ Ọ̀ ḅẹrẹtọn opu tọrụ mị pịrịmẹ, se anị samịnamẹ! Ọ̀ mịẹse tọrụ ma samịnamẹ. Bashan ozuma samịna famẹ, Kamẹl Tụndụ mị aḅaịn tọrụ chụamẹ, se Lẹbanọn ngwengwe ma arịa tọrụ ma fịmẹ.

⁵ Nyanaḅọ Ḅe tọrụkuḅu ḅụ tụndụma jikemẹ; ọ̀ tọrụkuḅu ḅụ chịngịma sanịmẹ. Sẹkiri jikeḅịa Nyanaḅọ Ḅe ḅụpakụmaḅịa sịkị; tomonikiri mị na, anịa tomonima na ḅụgerergereḅịa.

⁶ Ori ịganị sịkị, tụḅọ ḍumoḅe? Tụḅọ ineda oria ḅalafama ịganị ḅie pakaḅoḅe? Oria kọrịarị ịganị mị ọ̀ nwọ mịẹ pakụmaḅịa; ọ̀ tọrụkuḅu ḅụ ḍụparịma kọsị fọn sọḅịa.

⁷ Nyanaḅọ Ḅe ori iḅimẹ; ḅẹrẹ sịkị ḅụ ori agbọ sọ oria tomonima pịrịpịrịmẹ; vinpịkị ọ̀ damaḅoapụ ma ori ini kokoḅịa.

⁸ Owoima sọarị opu mengi ye sima ḅara mị ori okorona okorona ori na tarakapụma fama fama ọkụ-ẹ; ori na tụḅụrụapụma ori ini ḅaaḅịa.

⁹ Che siḅẹrẹ ị́ nwọ ḅia Nyanaḅọ Ḅe pịrị-ao? Ori ị́ famaḅịa. Gbọrịḅọ sọnị gbọrị sịkị nẹngịma sịkị se ori na tụḅụrụ-ẹkẹ.

¹⁰ Fangalama fangalama ịga na samịna osuein na kọrị ọkụ anị ómine iruḅu apụma ọ́ kọrịḅịa ọkụ-ẹ!

¹¹ Ị́rị́ Ninivẹ, ị́ ḅụ, siaye ḅụ ḅein ḅọ pakaḅo siḅẹrẹ ḅia Nyanaḅọ Ḅe pịrịmẹ.

¹² Mịn anị Nyanaḅọ Ḅe ọkwẹịn seni oria tomoni, Izrẹlapụma pịrịye mịẹ: “Asiriapụ ma, ini kụrọ pịkị ḅakamẹ nwọ ḅẹ sọnị, ini ini famaḅịa, se ini sịkịrị faḅịa. Ị̀ya tomoni àrị ọ́ mịẹse ọ́ tọrụsiọrịmẹ, ọkụma, à ḅarị ọkọ mịẹ-ẹkẹ.

¹³ À mịọkụ Asiriapụ ma ọ́ mịnaḅụ nyana kụrọ mị mịẹse anị ḅo kulumaḅịa, se ini se ọ́ chụa ikoli ma anyịmaḅịa.”

¹⁴ Mịn anị Nyanaḅọ Ḅe Asiriapụ ma ḅụ tọnsaye-ẹ: “Ọḅụju pakaḅo inia ẹrẹ mịẹ chịẹmaḅịapụ ini nwọ nyana ẹkẹ. Àrị inia opu oru-a warịma ḅie sime ini kara yema nwọ kọsịmaḅịa. Àrị iḍupu soku Asiriapụ ma pịrịaḅẹ—ini ḍumo gbẹịnkẹ!”

¹⁵ Ḍiki, iḅi oku se ḅoarịḅọ tụndụma ọgọnọ ḅọrọ ḅoaḅẹ! Ori ateli sọsam, ò ḅo ọmụḅaraiḅi ḅẹrẹ ḍuko ḅịa ẹrẹchị! Juda tomoni, ómine ọ́mịna alalị ma fị, se ọ́ ḅọịma seni Tamụnọ Ḅe karị a yema nwọse ọ̀ pịrị. Sitịḅịnyana apụma ini ḅarị ngịsị ọ́mịna ama mị ḅie kansọ-ẹkẹ. Ini ini famasosam!