Nẹhimaya 1 - Kịrịkẹnị Baịbụl

¹ Mịn mị anị Hakalaịya tọkụ Nẹhimaya ḅe mịẹaye-ẹ. Si karama kụra mị ḅie, Kislev akalụ mị ḅie, anị Atazakzis ḅe Pesia amanyanaḅọ sọ sịkị ḅụ, Ị̀rị̀, Nẹhimaya ḅe, Susa ḅie àrị angamẹ, Tịḅịda opuama mị ḅie.

Jerusalẹm Mị Nẹhimaya Ḅe Ḅụ Laye

² Hananị, ị̀ya mịnapụma ḅie gbọrị owuḅọ na jịn owuapụ kpo na Juda ḅie wẹrịḅomẹ, à Jerusalẹm na pịkịna mịna juo Juapụ, ini kụrọḅara seni desin Babilọn mun seni pịkịmaḅo apụma ḅẹrẹ nwọse ini gbelamẹ.

³ Ini ḍuko ị̀ pịrịmẹ na fịḅụ kọn seni pịkịma ama ḅoapụ ma, opu ḅụfụka ḅie ini omi-ẹ, na ama mị na kpekima anga jịn sẹ apụma ini ḍikisimamẹ. Ini pịkịna ḍuko ị̀ pịrịmẹ na Jerusalẹm onu ma kansaraḅụ àrị omi-ẹ, pịkịna onu ma ḅọkọ ma ini àrị dọkịma sịkị ngịsị ọkịḅo nwọla ma ini pa àrị chụakẹ.

⁴ À maye mamgba naa sịkị, à kpọnjị sime seni owumẹ. Tọn-a ḍin à nwọse kururumẹ, à pịkịna yefịkẹ, seni à Tamụnọ Ḅe tẹkẹmẹ,

⁵ “Nyanaḅọ Soḅie Tamụnọ! Ị́ ḍụḅamẹ, wa pịkị ị́ ḍikiḅalafamẹ. Ị́ iḅiọkụma iḅiḅara se ị́ya ọḅọkụ mị kokomẹ anị ị́ ḅẹlẹma pịkịna ị́ tọn ayema mịẹmịẹapụma ḅụ.

⁶ Ị̀ ḍiki, Nyanaḅọ, seni ị̀ya tẹkẹma naa, ḍin na enekaka na ḅụ à nwọ ị́ya fịrịnwẹngị Izrẹlapụma gose ị́ tẹkẹarị sịkị. À si gopakụmamẹ na mine Izrẹlapụma wa si mịẹsam, ḅieju-a ḍapụma na ị̀rị̀ na wa si mịẹsam.

⁷ Wa ḅakama sitịḅị chụa ị́ pịrịmẹ. Ị́ tọn wa pịrịayema sọnị wa mịẹkẹ. Ị́ya fịrịnwẹngịḅọ Moziz ḅe ḅụ ị́ ḅọrọ seni wa pịrị olokoma sọnị wa àrị kokokẹ.

⁸ Ị́ ḍuko Moziz ḅe pịrịye mị, se mịọkụ ḅiekoroma. ‘Ómine Izrẹlapụma ị̀ ḅerenikẹ ḅẹḅẹ, àrị ómine galagalama jịn sẹma ḅie sẹịnḅịa.

⁹ Ọkụma ọ́ tọrụpịkị ị̀ da seni à tọn ọ́ pịrịye mị mịẹmẹ ḅẹḅẹ, àrị ómine ọkịpakụmaḅo à sẹlẹ ọkị se ómine ị̀ tẹkẹtẹkẹḅịa nyọ ḅụ koromaḅịa, ọ́ ḅọrọ galagala mun sẹkiri ḅie kuluma nyọma la sọnị.’

¹⁰ “Nyanaḅọ, mịna apụma ị́ya fịrịnwẹngịapụ-ẹ, ị́rị́ ḅarana nyanapụ-ẹ. Ị́ya opu kụrọ ḅụ na ịnyọ ḅụ na ị́ ini ḍụapakụmaḅomẹ.

¹¹ Mịọkụ, ị̀ya tẹkẹ mị na, ísí fịrịnwẹngịapụ tẹkẹma na poki, anị osi seni ị́ pịrị ḍọkịarị apụma. Fụḅara iḅi se ị̀ pịrị se mịẹ Amanyanaḅọ ḅe ḍikitịḅịfoin nyana ị̀ pịrị.” Àrị enema ḅie ị̀rị̀ amanyanaḅọ ḅe oria iru ḅie koruḅọ-ẹ.