Maịka 1 - Kịrịkẹnị Baịbụl

¹ Jotam ḅe na Ehaz ḅe na Hẹzekaya ḅe na Juda sẹ mị da sịkị, Nyanaḅọ Ḅe mị oku mị se Maịka ḅe fịrịmamẹ, anị Morẹshẹt ama ḅie ḅoḅọ ḅe. Nyanaḅọ Ḅe ma Sameria na Jerusalẹm na gbolomaye mamgba, mịẹḅelema Maịka ḅe ḍiemẹ.

Ịkịankoro Maịka Ḅe Sameria Na Jerusalẹm Na Gose Kururu

² Mịn mị naa, ómine sẹ mamgba; mịn mị poki, ómine tomonikiri ḅie anga apụ mamgba! Kụrọmamgba Nyanaḅọ Ḅe ori ọ́mịna ḅụaye ḍukoḅịa. Poki! Oria soḅie tẹkẹwarị mị ḅie ọ̀ wẹrị ọkwẹịn pakụma aḅẹ.

³ Nyanaḅọ Ḅe oria fịafịa nyọ ḅụ ọ̀ wẹrị pakaḅo aḅẹ; ò koroḅo se gele nyọma ḅụ nwẹngịḅịa.

⁴ Anịsịkị tụndụma ò chuku ḅie sanịḅịa agba fịnị ḅie sanị ọkụ; àrị pẹsị nyọma ḅie sara koroḅịa mengi chịngị ọgọnọ ideri koro ọkụ.

⁵ Ma mamgba pakaḅịa anịatịḅị Izrẹlapụma ini si mịẹsam pịkị Tamụnọ Ḅe dapakasam. Izrẹl mị ḅe nyanaḅerenika mị ini se tụḅọ ọlọḅe? Sameria tịḅịda ama mị na-mịnaḅụ-na mọnọ! Juda ḅie tụḅọ orutẹkẹ ḅẹrẹḅara si nyana? Jerusalẹm na-mịnaḅụ-na mọnọ!

⁶ Mị Nyanaḅọ Ḅe ḅẹ ọkụ-ẹ, “À ḅelema Sameria mị se si aye sara mịẹḅịa, se irumịẹ chịnmgbọlụ ozu ḍipiḅịa nyọ. Opuama mị anịa ḍụparị-a pẹkẹrẹ ma, à nwọse pẹsịkiri ma ḅie saraḅịa se opuama mị chuku se papaḅụsinḅịa.

⁷ Anịa yela oru mamgba ini àrị kọsịma dẹkịdẹkịmaḅịa, ini se inia oru tẹkẹwarịma ḅie sẹfịarịapụ ma pịrịye goyegoye ini fịnị se anị dọkịmaḅịa, pịkị ini tẹmẹchịẹmaye mamgba àrị kpọngọlọma sime sarasọḅịa. Sameria gose mayema nyanaye anị, fịaye pakụma agba mịẹ àrị pịrị-ẹ mịọkụ, ini na tarakapụma àrị deki so mun jịn anga oru tẹkẹwarịma ḅie sẹfịarịapụ ma pịrịḅịa.”

⁸ Mị Maịka ḅe nwọ ḅẹye-ẹ, “Mịn mị gose à kururu se owuḅịa. Ị̀ya ngịrị ḍiepakụma ḅụ, à papaḅụsin se papa ḅụọ se nwẹngị kelemaḅịa. À piri obiri oloku ọkụ se olokuḅịa pịkị ọjụ feni ḅara se paịnḅịa.

⁹ Sameria ịnọ ma ini ineda gwọ ḅịama ẹkẹ, Juda sọ anị ḅara se tọrụsiọrị-ẹtọn-aḅẹ; yesima mị anị Jerusalẹm onu-a ḅọkọ ma lasam, anị ị̀ya tomonima anga nyọ mị.”

Tarakaḅọ Ḅe Ò Jerusalẹm Kpekimaḅẹ

¹⁰ Mịna ọmụ ḅara si mị ò ḅẹlẹma Gat ḅie mine-na-tarakapụ ma pịrị ma. Ò ḅerenima ini ọrị na ómine owuaḅẹ. Ómine Bẹt Liafra apụ ómine ọ́mịna kuḅie lọkọ ọkụ ḍiepakụma fọn ḅie kpeleki ḅụ!

¹¹ Ómine Shefa apụ, ó mun jịn ama ḅiesọ fa papa ḅụ na ḅụgerere ḅụ na. Ini Zeanan ḅie anga apụma, inia opuama ḅie ini pakaḅo ḍọkịma. Ọ́ naa na Bẹtizẹl apụma ini kururumẹ nwọ ḅẹḅẹ, anị ó nemiḅịa na anị nyọ tịḅị-se-chuḅịa nyọ ofori-ẹ.

¹² Merọt apụma kuḅie chịẹ-chịẹ-chịẹ ḅara ḅụ ini sinḅịapụ koruaḅẹ, anịatịḅị Nyanaḅọ Ḅe ọ̀ ḅụfụka se ḅo Jerusalẹm kpekimasam.

¹³ Ómine Lekish ḅie anga apụma, ómine asụnma se owuni arụ ma ḅụ kpọ. Ómine anị Izrẹl-a sima ḍa se Jerusalẹm mịẹse anị ḅo si mịẹye-ẹ.

¹⁴ Se mịọkụ, Juda tomoni, ọ́ ḅaḅa se Morẹshẹt Gat ama mị ḅẹ. Izrẹl amanyanapụma Akzib ama mị ḅie nyanaḅịa ḅarachụa ofori-ẹ.

¹⁵ Marẹsha-a tomoni, Nyanaḅọ Ḅe ori ọ́ ḅọrọma tarakaḅọ ḅe pịrịḅịa, anị kụrọ ḅara se ọ́mịna ama mị ọkịḅịaḅọ ḅe. Izrẹl tịḅịdapụ ma, ini mun Adulam ama ḅie sime pokolo ma ḅie ḅọị ḅịa.

¹⁶ Juda-a tomoni, ómine ọ́mịna tịḅị-inime ma sẹịnsin se kururu ọ́ ḅẹlẹma awọmẹnịma tịḅịgose, ẹdẹlẹ tịḅị firi ḅara ọ́ nwọse ọ́mịna tịḅị sẹịn, anịatịḅị ini kụrọ ḅara se ọ́mịna ḅara ọ́mịna awọma ọkị so jịn ama ḅie mun faḅịa.