Jud Ḅe Ḅaraḅo Fịrịfịrịmaḍiri Mị 1 - Kịrịkẹnị Baịbụl

¹ Mịn fịrịfịrịmaḍiri mị, Jud, anị Jizọs Kraịst fịrịnwẹngịḅọ pịkị Jems numbireowu ḅe ḅara anị ḅomẹ— Ori anị seni Tamụnọ Ḍaḅọ Ḅe ḅẹlẹma, pịkị chịn ọkịsa apụma anị Jizọs Kraịst Ḅe ḍikiḍikisa apụma sẹịnmamẹ:

² Ye ḍikitịḅịfoin na, deinma na, pịkị ḅẹlẹma na, ḅakama sime ọ́ pịrị.

Iruo Yeḍieapụ Ma Gbolomaye

³ Ị̀ ḅụ yela ikiapụ, à ḅimẹ mine mgba ḍiaọkịsa ḍụaḅọrọma mị gose ḍiri gịẹịn ọ́ sẹịnma; à koromamẹ na anị opuma ḅụpalịmaye sọmẹ, ḍiri gịẹịn se ó ḅo owusọ Tamụnọ Ḅe gbọrị sịkị ḅụ, seni oria tomonima pịrị gbamasosa ḅereni mị pịrị.

⁴ Anịatịḅị wa nemika ḅara ḅụ tọn-a Tamụnọ nemikapụ epele ḅara se mịna ḅie sọ ḅosam. Ḅọlọ sịkị ngịsị ḅẹrẹ ḅarasi elekima ini nwọse inia ḅụ chụasa apụma, anịẹrẹchị Tamụnọ Ḅe se papa wa pịrị ḍikiḅụgerere oku mị ini nwọ pịkị se sẹfị ḍumo kọn aḅẹ, se ori kẹngẹ mịna yeḍieḅọ pịkị wa Nyanaḅọ Jizọs Kraịst Ḅe sịkịmẹ.

⁵ Anịatịḅị mayema ó nemi ḅọrọsam nwọ ḅẹ sọnị, à ḅimẹ à se ó ḅiekoroma; Nyanaḅọ Ḅe wẹrị gbọrị sịkị Ijipt sẹ mị ḅie Izrẹlapụma ḍụaḅọrọma ọkụ mị na, ọ̀ pịkị ọḅụkọ ò ḅerenikapụ ma fama ọkụ mị na.

⁶ Ọ́ mịn mị se ḅiekoroma! Inia fịrị kirima wẹrịso enjẹlapụma; simegbamaso ikoli ini nwọse ini ịkasịmẹ, se ini seni tomonikiri chuku kanakana mị ḅie gbin koromasam anịanga ḅụ, Tamụnọ Ḅe ori ini koko koroma anị opu Ene mị wẹrịmaḅẹ, ini ḅẹrẹḅarasi pẹlẹ ini pịrịḅịa sịkị mị.

⁷ Sọdọm na Gomọra na pịkị àrị na kpeki amama na ọ́ nwọse ḅiekoroma, anị inia enjẹlapụma sẹfị ọkụ mị se sẹfị pịkị kuraka ḍumokọn apụma: ḅene-ḅene ḅe fịnị ini nwọse fomuḅara se ini pịrịmẹ, mịẹse anị ḅelema ḅerijineye sọ nweni mamgba pịrịḅịa ẹrẹchị.

⁸ Anị gbọrị ḅara ḅụ, mịna apụma sọnị ini ọrị elekimama mịẹse ini inia ḅụ pụlamamẹ; ini Tamụnọ Ḅe kụrọ mị ḍikisima, pịkị soḅie sime boma nyanapụ ma wọlọmẹ.

⁹ Maịkịẹl, Tịḅịnị enjẹlḅọ ḅe pembe sọnị ò ḅụosọ ọkwẹịn kọn Oru ḅe pịrịkẹ. Anị tụḅọ inia ḅụ Moziz ḅe oju mị ọkịḅịa nọ nwọ ḅẹ kamụ ori Oru ḅe na nwọ sọ sịkị mị, ọ̀ ḅẹrẹḅarasi pẹlẹ Oru ḅe pịrịkẹ, ọkụma ọ̀ nwọ ḅẹmẹ, “Nyanaḅọ Ḅe ị́ ḍiki ịganị!”

¹⁰ Ọkụma, mịna apụma ini kaịnḅokaye goyegoye ini wọlọ ọkwẹịn se anịa ḅie chuchumẹ. Ọkụma piri ḅie-a namama ḅara mị, ọwụma ḅara ḅụ ini nemi ayema, anị pịkị ini ḅaa àrịye ma-ẹ.

¹¹ Anị ḅalafamaye sọ ini pịrị ọkụ ḍiki! Ini Ken ḅe ateli mị ḍukonwẹngịsam. Igbiki gose ini inia ḅụ ma se gbin koroma Belam ḅe mịẹ si mị pịrịsam. Kora ḅe ininachịn ọkụ ini nwọse ininachịnmẹ, ini pịkị ọ̀ ḅaa ọkụ se ini ḅaamẹ.

¹² Inia ḅụgerere nemika iruḅu mị mịẹse ini ịlọlị sọ ọ́mịna yefị gboloma mị pịrịmẹ. Inia ḅụ kẹngẹ anị ini sịkị nyana pịrịye-ẹ. Fọrụ deki nwẹngịarị enekoromaka soḅuno simeọkụ mị ini simeọkụ-ẹ; mgbọlụ chụaka chịn simeọkụ mị ini simeọkụ-ẹ; ini kunoma burasinsa chịn simeọkụ, ini pịkị gbọtụḅara fịsam.

¹³ Tọrụogbo owoi ambura simeọkụ mị ini simeọkụ-ẹ, inia ḅụgererema mịẹmịẹaye ma ọkọkọ foin ọkụ mị àrị foin ọkụ-ẹ, gbọrị kiri chịẹka loliama simeọkụ anị ini simeọkụ-ẹ, anị Tamụnọ Ḅe gbuntẹịn kanakana mị ḅie ḅene-ḅene kiri telima wẹrịmasa apụma.

¹⁴ Enọk, anị Adam ḅe ḅụ sọnọmẹ karama ḅụọ ḅọ ḅe, ḅọlọ sịkị ngịsị ini gboloma ịkịankoromẹ na, “Nyanaḅọ Ḅe oria fịafịa enjẹlapụma ḅụ kịnị-a mẹndẹ oyiasi fịnjị fịnjị na koroḅoḅịa

¹⁵ se ḅẹrẹkọn inimgba pịrị, ini kọnsa Tamụnọ nemika ḍumo ma gose ḅẹrẹḅarasi pẹlẹ inimgba pịrị, pịkị Tamụnọ nemika simịẹapụma kọn se ò ḍukosimasa ḅalafama si ọkwẹịnma gose!”

¹⁶ Mịna apụma ini sịkịmamgba mbụrụmbụrụ, se ḅẹrẹ se jịn apụ ọlọlọmẹ, ini inia si-a koromama ḍukonwẹngị nwẹngịmẹ; ini inia ḅụ ma boma se ḅịpịḅẹlẹ nyana jịn apụ pịrịpịrịmẹ, mịẹse inia kuḅie simeayema inia ḅara laḅịa ḅara.

Ḅerijine Na Tetema Na Ọkwẹịn

¹⁷ Ọkụma ị̀ya ikiapụ, Jizọs Kraịst Ḅe okunwẹngịapụ ma ḅọrọsa sịkị ḅụ ḍuko ọ́ pịrịye ma ọ́ nwọse ḅiekoroma.

¹⁸ Ini nwọse ọ́ ḅẹmẹ: “Kuluma enema laḅịa sịkị, tomoni pakaḅo ómine komboḅịa, anị inia si-a koromama ḍukonwẹngị nwẹngịapụma.”

¹⁹ Mịna apụma anị pua dekiḅoḅoye-ẹ, ini tomonikiri ḅie apụ-ẹ, Tamụnọ Tẹmẹ Ḅe pịkị inia ḅie ofori-ẹ.

²⁰ Ọkụma, ómine ị̀ya ikiapụ ma, ye ọ́mịna ḅereni mị ọ́ nwọ mịẹ kụrọmamamun. Tamụnọ Tẹmẹ Ḅe kụrọ ḅụ ọ́ tẹkẹ,

²¹ se Tamụnọ Ḅe ḅẹlẹma mị ḅie ó sime, ọ́ nwọ wa Nyanaḅọ Jizọs Kraịst Ḅe koruarị sịkị, mịẹse oria ḍikitịḅịfoin ḅụ ò simegbamaso ḍumo se ọ́ pịrịḅịa ọkụ.

²² Ó ḍikitịḅịfoin nyana ḅereni kpọka apụma pịrị;

²³ ọ́ dapụ ḍụapakụmaḅo, anị fịnị mị ḅie ini jine pakụmaḅo mị ḅụ: anịsịkị dapụ ọ́ ḅalafa nyana se ḍikitịḅịfoin nyana ini pịrị, ọkụma ḍikiḅụnwọnwọ ọ́ nwọ nyana se inia sẹfị si mị ḅụ pịanịsa ḅụchụayema pịrị.

Tokoni Tẹkẹḅịpị Iḅi Ọkwẹịn

²⁴ Ye ori, ineda ḅịkị ḅụ ọ́ dachịẹmaḅịa ḅọ ḅe, pịkị si ḅụ ofori na ḅieḅẹlẹ na ḅụ, ómine se oria boma nyana tọrụkuḅu ḅoḅịa ḅọ ḅe—

²⁵ ori ngẹrị Tamụnọ Ḅe mịna Ḍụaḅọrọmaḅọ Jizọs Kraịst wa Nyanaḅọ Ḅe ḅụ boma na osi na, opu na, pịkị ḅẹrẹtọn kụrọ na sime ọ̀ pịrị, ḅọrọsa sịkị na, mịọkụ na pịkị ḅẹsịkị ḅẹsịkị la! Amẹn.