Jerimaya 1 - Kịrịkẹnị Baịbụl

Tamụnọ Ḅe Chịnḅịpị Se Jerimaya Ḅe Pịrịmẹ Ò Ḅo Ịkịankoro

¹ Mịn ḍiri mị anị ini Jerimaya se chịn gbọrịḅọ ḍukoayema-ẹ. Jerimaya ḅe anị Hilkaya tọkụ-ẹ, Anatọt ḅie sime ịkịankoroapụma ḅụ gbọrịḅọ-ẹ, anị Bẹnjamin pẹkẹrẹ ḅụ sime ama mị.

² Nyanaḅọ Ḅe ọkwẹịn Jerimaya ḅe pịrịmẹ, Josaya, Amọn tọkụ ḅe Juda sẹ mị da ḅe oyitẹrẹ-a-kụra fịnjị karama kụra mị ḅie,

³ ọ̀ pịkị ọkwẹịn ọ̀ pịrịmẹ Josaya tọkụ Jẹhoịakim ḅe amada sịkị. Anịsịkị ḅọrọ Nyanaḅọ Ḅe, ọ̀ tọn-a sịkị se ọkwẹịn ọ̀ pịrịmẹ, ọkịmun Zẹdẹkaya Josaya tọkụ ḅe amada mun oyigbọrị kụra fịnjị karama kụra lamẹ. Anị kụra mị ḅie sọnọ karama akalụ mị ḅie anị Jerusalẹm-a tomonima ini nwọ desinye-ẹ.

Jerimaya Ini Nwọse Chịn Ịkịankoroḅọ Ḅe Ḅụa Ḅẹrẹ

⁴ Nyanaḅọ Ḅe nwọse ị̀ ḅẹmẹ,

⁵ “Tẹrẹmẹ ị́ nyengima ḅụlọ ḅie ị́ ḅo tomoniḅọ sọ àrị ị́ nemimẹ, pịkị ma ini ị́ yika simeogbo mịn àrị ị́ sẹlẹye-ẹ ị́ ḅo ịkịankoro sẹma pịrịḅịa gose.”

⁶ Ịyi-a! À pẹkẹrẹ se nwọ ḅẹmẹ, “Kụrọmamgba Nyanaḅọ, àrị ọkwẹịn ọkụ nemikẹ; anịatịḅị ị̀rị̀ kala tọkụ-ẹ.”

⁷ Ọkụma Nyanaḅọ Ḅe nwọse ị̀ ḅẹmẹ, “Ḅẹma na ị́rị́ kala tọkụ-ẹ, ọkụma àrị ị́ fịrịma-sẹịn-tomoni ma damamun, se à tọn ị́ pịrịye goyegoye ị́ nwọ ḍuko ini pịrịḅịa.

⁸ Ini ḍikiḅalafama, anịatịḅị àrị ị́rị́ na sime pịkị ị́ ḍikiḍikiḅịa. Mị anị Ị̀rị̀, Nyanaḅọ Ḅe, ḍukosaye-ẹ!”

⁹ Anị Nyanaḅọ Ḅe ọ̀ ḅara ịsụn pakụma, se ị̀ ḅịpị pẹkẹrẹ ma lama se ị̀ ḅẹye-ẹ, “Poki, àrị ị́ kọnḅịa ọkwẹịn ma se ị́ pịrịaḅẹ.

¹⁰ Mịmgba à kụrọ se ị́ pịrịmẹ, sẹma na amanyanakiri ma na ḅie ḅụ, àrị sokupakụma se àrị sumagbin, àrị kan se àrị tangbin, àrị nama se pịkị ḍipi.”

Jerimaya Ḅe Mama Elekima Ọrịmẹ

¹¹ Nyanaḅọ Ḅe ị̀ gbelamẹ, “Jerimaya, ị́ che ọrị?” Àrị ọ̀ pẹkẹrẹ se nwọ ḅẹmẹ, “Ịmụnụmụnụ chịn ịkpangị-ẹ.”

¹² “Ị́ ọrị ḅomẹ,” Nyanaḅọ Ḅe ọkọ ḅẹmẹ, “à pịkị koruaḅẹ ḍọkịḅo ọrị na ị̀ya ọkwẹịn ma ḅo kọkọmaye sọmẹ.”

¹³ Anị Nyanaḅọ Ḅe pịkị ọkwẹịn ị̀ pịrịye-ẹ. “Ị́ pịkị cheye ọrị?” ọ̀ nwọse ị̀ gbelamẹ. Àrị ọ̀ pẹkẹrẹ se nwọ ḅẹmẹ, “À gbọrị ḅẹlẹ ọrịmẹ ọgọnọju daọrụ ḅụ, anị ḍarịaḅẹ, se anị pịkị tumgbo se mịanga da-ẹtọn-aḅẹ.”

¹⁴ Ọ̀ nwọse ị̀ ḅẹmẹ, “Fịfa sime ọgọnọju daọrụ ḅụ angapụ mamgba pịrịmẹ,

¹⁵ anịatịḅị àrị ọgọnọju daọrụ sime sẹ mamgba chịn-aḅẹ ini ḅo. Inia amanyanapụma, Jerusalẹm onu ḅọkọ ma ḅụ ini inia amanyana emine ma pike ama mị onu mamgba kelemaḅịa, pịkị inia Juda opuamama onu ma na kelemaḅịa.

¹⁶ À fomuḅara se ị̀ya tomonima pịrịḅịa, anịatịḅị ini si mịẹsam; ini ị̀ sarakoromasam, se agbamịẹ jịn-a oru ma pịrịsam, pịkị oru kara se àrị tẹkẹsam.

¹⁷ Mịọkụ ị́ ḅụ karakarama, Jerimaya; mun à tọn ị́ pịrịaye mamgba ḍuko ini pịrị. Ini ḍikiḅalafama, anịka àrị ị́ ḅalafamatẹịnḅịaye se ị́ ḍieḅịa, ị́ nemikase inia ḅụ sọmẹ ḅẹḅẹ.

^18-19 Poki, Jerimaya! Mị ama sime apụ mamgba, Juda amanyanapụma na, fịrịtịḅịnị ma na, agbamịẹapụma na, tomonima na ini ị́rị́ na tụḅụrụḅịa. Ọkụma mịmgba àrị ịnyọ se ị́ pịrịaḅẹ se ini dachịẹma; ini mịẹkụrọma opuama sime ọkụ ị́ nwọ simeḅịa, ikulele ogbochịn, pịkịna alapẹlẹka warị agbagba sime ọkụ. Ini ineda ị́ inuma ẹkẹ, anịatịḅị àrị ị́rị́ na sime se ị́ ḍikiḍikiḅịa. Mị anị Ị̀rị̀, Nyanaḅọ Ḅe, ḍukosaye-ẹ.”