Aịzaya 1 - Kịrịkẹnị Baịbụl

¹ Mị ḍiri mị Juda na Jerusalẹm na gboloma oku mị anịa ḅie omiye-ẹ, anị Tamụnọ Ḅe ḍuko finji Emọs tọkụ Aịzaya ḅe pịrị oku, anị Ọzaya ḅe na Jotam ḅe na Ehaz ḅe na Hẹzekaya ḅe na Juda amanyanapụ sọ sịkị ḅụ.

Tamụnọ Ḅe Oria Tomoni Ma Ḍiki Ịganịmẹ

² Nyanaḅọ Ḅe nwọ ḅẹmẹ, “Sẹkiri na so na, à ḍukoarịye mị ọ́ nwọ poki! À ḍikiḍiki pakụmaḅo awọmẹnịma ini tụḅụrụ ị̀ dasam.

³ Nambulo ma, àrị àrị nyanaḅọ nemimẹ, yepụra asụn ma sọnị, àrị nyanaḅọ ḅe fịaye se àrị pịrị fịfị nyọ nemimẹ, ọkụma anị mị, anị ị̀ya tomoni Izrẹlapụma nemi mị nẹngịmẹ. Ngịsị ini kaịnḅokẹ.”

⁴ Ọ́ fasam ómine, siaye mịẹmịẹ sẹ, ómine siaye mịẹmịẹ sitịḅịnyana apụ. Ọ́mịna sima àrị ó jine kiripịrịsam! Ọ́ Nyanaḅọ Ḅe sịkịsam, Izrẹl fịafịa Tamụnọ Ḅe, se ómine ọḅụ pịkị ò gbinsam.

⁵ Yei Izrẹlapụ! Cheye gose ọ́ pa ọ́mịna mịẹmịẹyema ḅụ tụḅụrụ-ao? Ị́ pịkịna jịn fomuḅara da ḅi-ao? Izrẹl, ị́ la ayema àrị gbọtụma ị́ tịḅị gbẹịnsam, pịkịna ị́ kuḅie na, ị́ tẹmẹ na obiaḅẹ.

⁶ Ị́ tịḅị ḅụ ọkịmun ị́ ḅụọma la, ị́ya oju ḅụ gbọrị kpụrụkpụrụ nyọ sọnị ofori-ẹ. Ị́rị́ mgba pẹlẹ kọsị, opu ịnọ ma na ị́ gbẹịn waraḅẹ. Ị́ laye ma, ma ini sịkịrị se ịnọ fịna ḅịtẹ seni àrị fịnakẹ. Ḅụ-gwọ-ḍiri sọnị ma pịkị àrị lakẹ.

⁷ Ị́ya sẹ mị ini kansam, pịkịna ị́ya opuamama sọnị ini dọkịma kiri sarasam. Ị́ ḅarana ḍikiarịogbo igoniapụ ị́ya ama mị ọkị se yemamgba simamẹ.

⁸ Jerusalẹm mị ngẹrị anị ḅaralaka ḅaraḅụ omiye-ẹ, owuni anị gbẹịnmachịẹ waraḅẹ, ozu ḅie sime ḅarachụa pịrịḅọ ofori nyọ ḍikiḍikiḅọ warị anị nwọ kịkẹmẹ anịkanịka kukumba ozu ḅie sime soro warị anị nwọ kịkẹmẹ.

⁹ Kụrọmamgba Nyanaḅọ Ḅe, ḅọrọ fị ḅie dapụ sinka ọkụma, mgbọkụ Jerusalẹm mgba gbọtụma kansosam, anị Sọdọm na Gomọra na ḅara mị.

Tamụnọ Ḅe Ò Ḅimẹ Oria Tomoni Ma Karakaraye Mịẹ

¹⁰ Jerusalẹm, ị́ya ḅẹrẹtọn apụma na ị́ya tomonima na ini Sọdọm na Gomọra tomonima kịkẹmẹ. Nyanaḅọ Ḅe kọn ị́ pịrịarị ọkwẹịnma poki. Ḅeri tokoloma mịna Tamụnọ Ḅe seni ị́ telimaye ma poki.

¹¹ Nyanaḅọ Ḅe nwọ gbelaḅẹ, “Ọ́ nwọ mịẹ ị̀ pịrịarị agba mamgba ị̀ ḅụḅẹlẹmẹ ọ́ nwọ chịn? Ó seni agbamịẹ ḅaraḅụ dọkịma ị̀ pịrịarị ananama, àrị ḅakama ị̀ pụkọtan ḅọrọsam, pịkịna ọ́mịna iḅi-a namama ḅẹlẹkị ma sọnị. Nambulo ma na, ananama na, oḅorima na pulo ma àrị ị̀ ḅụ ịnyọ famasam.

¹² Tụḅọ ọ́ ḅẹ na ó ḅo ị̀ tẹkẹḅịa sịkị ọ́ maye mamgba seni ḅo ị̀ pịrị-ẹ? Tụḅọ ọ́ ḅẹ na ọ́ kụrọma ḅụọ seni kiri nanga ị̀ya Oputẹkẹwarị mị ḅie kelema-ẹ.

¹³ Ọ́mịna ḍiepịrịaye agbama àrị tịḅị nyanakẹ. Ọ́ dọkịmarị insẹnsị mị anịa onu ị̀ ḅụngụngụmamẹ. Àrị ineda tọrụ se ọ́mịna Ịwọ-Akalụ-Alalị ma na, Saḅaḅọrọ Alalị ma na, pịkị ọ́mịna Tẹmẹ anga Alalị ma na ḍiki ẹkẹ, ọ́ mịẹasi ma arịmgba pụlamasam.

¹⁴ À ḍikiḅụnwọnwọ nyana ọ́mịna Ịwọ-Akalụ-Alalị ma na fịafịa enema na pịrịmẹ, àrị ị̀ pụnụma ẹrẹchị ị̀ ḅụ ịnyọ famẹ, à ḅarị ineda àrị dekikẹ.

¹⁵ “Tẹkẹḅụ ómine ọ́mịna ḅarama dekichịẹma sịkị, àrị ómine ḍiki ẹkẹ. Ọ́ tẹkẹ laḅara laḅara sọnị àrị ó poki-ẹkẹ, anịatịḅị ọ́ ḅakama ḅẹrẹnemika tomoni ḅaasam.

¹⁶ Ómine ọ́mịna ḅụ ma sịkịrị fịafịama. Ọ́ mịẹse àrị ọrịarị siaye mamgba ḅụ ọ́ dachịẹ. Iin, ọ́ ḅarị siaye mịẹma

¹⁷ se karakaraye mịẹ mị ọ́ nwọ ḍawọ. Ọ́ ḍọkịḅo ọrị na karakaraye mị ọ́ nwọ mịẹmẹ—ọ́ ḅarachụa ini yeseni pụnụma apụma pịrị, ḍapụ na nyengiapụ na oforika awọma ini la gbẹịnye ọ́ nwọse ini pịrị, ọ́ pịkịna deapụ koroma fịsa eremeni ma ḍụa.”

Nyanaḅọ Ḅe Tomoni Ma Chịn Mẹ Ini Vinpịkị Ọ̀ Damaḅo

¹⁸ Nyanaḅọ Ḅe nwọ ḅẹmẹ, “Mịọkụ ó ye wa ḅo ḅẹrẹ mị fama. Ọ́mịna sima ọ́mịna ḅụ pulo ọnwẹịn ọkụ ọnwẹịnmẹ nwọ ḅe sọnị, àrị ọ́ sịkịrị se ómine ene okpokpo fịafịa ọkụ fịafịaḅịa. Ọ́mịna ḅụ ọnwẹịn pulo ma opuma kpo mẹ nwọḅẹ sọnị, ó wulu ḅịaọkụ ḅịaḅịa.

¹⁹ Ó nemikase ị̀ ḅịpị poki ọkụma, kiri mị ḅie pakaḅoḅịa iḅi ayema ọ́ fịḅịa.

²⁰ Ọkụma ómine ị̀rị̀na-tụḅụrụ mẹ ḅẹḅẹ, fịfa sime ọ́ pịrịmẹ. Ị̀rị̀, Nyanaḅọ Ḅe, à ḍukosam.”

Jerusalẹm Tomoni Ma Si Inia Ḅie Ḅeinmẹ

²¹ Ḍiki-o, gbọrị sịkị ḅụ kuḅie-se-ḅụgbana gbẹịn opuama mị anịḅo mịọkụ sẹfị si ḍumo kọn aḅẹ! Gbọrị sịkị ḅụ karakaraye mịẹmịẹapụ anịa ḅie ḅeinmẹ, ọkụma mịọkụ niniapụ kẹngẹ mị kọnye-ẹ.

²² Ị́rị́ Jerusalẹm, gbọrị sịkị ị́ seleḅa kịkẹmẹ, ọkụma mịọkụ ị́ ḅarị yeḅụ ofori-ẹ; ị́ iḅi iru kịkẹmẹ, ọkụma mịọkụ ị́ papa mengi sọsam.

²³ Ọ́mịna tịḅịda apụma oloko kan apụ-ẹ, pịkịna furuapụ ikiapụ-ẹ; sịkịmamgba ini ḍiepịrịye ọkị pịkịna ọḅụfịfịmẹ. Ini ngịsị ḅarachụa ḍapụ na nyengiapụ na fịsa awọmẹnịma pịrịpịrịkẹ, ḅẹrẹkọn warịma ḅie; pịkịna deapụ koroma fịsa eremeni ma ḅẹrẹ seni inia tọrọkọḅo sịkị layelaye ini pokipokikẹ.

²⁴ Anịẹrẹchị, Kụrọmamgba Nyana Izrẹl Kụrọ Tamụnọ Ḅe, ḍukoarịye mị ọ́ nwọ poki: Ẹ-ẹẹn! “Àrị ọ́ ḅụ sowu ḅiḅịa, ị̀rị̀na-tarakapụ ma na ómine na, ó seni ị̀ ḅụfụkamaḅịaye ḅarị ofori-ẹ.

²⁵ Àrị ị́ ḅụ fịrịnwẹngịḅịa. Ikulele mịẹfịafịama ọkụ à nwọ seni ị́ mịẹfịafịamaḅịa, se àrị ị́ ḅụ sime ḅụrụaye mamgba sinḅịa.

²⁶ Ḅọlọsa sịkị ḅụ ị́ nyana ḅọrọsa tịḅịnịma na pịkịna yetetema tetema apụma na sime ọkụ sime apụ à nwọ seni ị́ pịrịḅịa. Anịsịkị ini nwọ seni Jerusalẹm mị chịnḅịa karakaraye mịẹmịẹ, pịkịna kuḅie-se-ḅụgbana gbẹịn iḅi ama.”

²⁷ Anịatịḅị Nyanaḅọ Ḅe karakaraye mịẹmịẹḅọ-ẹ, Jerusalẹm ḅie siḅụ pịkịḅọ goyegoye, ọ̀ nụḅọ ḍụaḅịa.

²⁸ Ọkụma simịẹ pịkị kụrọtịḅịḅie chụa tụḅụrụ ọ̀ daḅọ goyegoye ọ̀ nụḅọ famaḅịa; ọ̀ sịkịḅọ goyegoye ọ̀ ḅaaḅịa.

²⁹ Ómine ngịrịḅịa, na ómine eje tẹkẹtẹkẹmẹ ọ́ pịkị onu nama se arịa ḅie ye ḍipi pịkị osi seni àrị pịrịpịrịmẹ.

³⁰ Ịnyọfa se fịarị kuru eje sime ọkụ anị ó simeḅịa ọkụ-ẹ, ngịsị ini ḅarị mengi seni saraka ozu ọ́ nwọ kịkẹmẹ.

³¹ Fịnị anana osirosiroḅa ḅụ fịnị pakụma ọkụ, anị kụrọ apụma inia si-a mịẹmịẹaye ma ḅụ fịḅịa ọkụ-ẹ, siḅịaye mị ineda anị kikiḅịaḅọ ngịsị ofori-ẹ.