2 Amanyanapụ Sịkị Mịẹaye Ma 18 - Kịrịkẹnị Baịbụl

Ịkịankoro Maịkaya Ḅe Ehab Ḅe Ḅerijinemẹ

¹ Juda Amanyanaḅọ Jẹhoshafat ḅe ḅo pẹrẹ pịkị ẹrẹso sịkị, ori ò furo ḅie gbọrịḅọ na pịkị Izrẹl Amanyanaḅọ Ehab ḅe furo ḅie gbọrịḅọ na ḅo ama na ere na kọnḅịa sime tọnmẹ.

² Tọn-a kụra ḅọrọ so sịkị, Jẹhoshafat ḅe ò so Sameria opuama mị ḅie mun Ehab ḅe la-ẹmunmẹ. Osi se Jẹhoshafat ḅe na ori na mun apụma pịrị gose, Ehab ḅe tọn-a anana na ikpoki nambulo na ọ̀ nwọ ḅaa se igoni se ini kọnmẹ. Ori ọkwẹịn Jẹhoshafat ḅe pịrịmẹ na ori ọ̀ ḅụ sọ se ini owu se Giledị ḅie sime Remọt opuama mị paka.

³ Ori ò gbelamẹ, “Ị́ ị̀ ḅụ sọ se wa mun owu se Remọt mị paka ẹka?” Jẹhoshafat ḅe nwọ pẹkẹrẹmẹ, “À ḅụkarakaramamẹ, ị́ nemikase ḅụkarakaramamẹ nwọ ḅẹḅẹ, anị ị̀ya owunima sọ pịkị sime ọkụ-ẹ. Wa ị́ ḅụsọḅịa.”

⁴ Ọ̀ pịkị nwọḅẹmẹ, “Ọkụma ye wa tatarị Nyanaḅọ Ḅe ḅịpị gbela nemi.”

⁵ Anị Ehab ḅe ḅo ịkịankoroapụma chịn ḅoye-ẹ, ini ine kịnị ẹndẹ laḅịa, se ini gbelamẹ, “À mun owu se Remọt mị paka mọnọ se à mun anị pakama?” “Owu se anị paka,” ini nwọ pẹkẹrẹmẹ. “Tamụnọ Ḅe ori ọmụḅaraiḅi se ị́ pịrịḅịa.”

⁶ Ọkụma Jẹhoshafat ḅe gbelamẹ, “Jịn ịkịankoroḅọ ofori, wa nụḅọ ḅụ ḅọrọ Nyanaḅọ Ḅe ḅịpị gbelaḅịa ḅọ?”

⁷ Ehab ḅe pẹrẹkẹmẹ na, “Gbọrịḅọ kọnmẹ, Maịkaya Imla yaḅe. Ọkụma à taraka se ọ̀ wẹrịmamẹ anịatịḅị ori ngịsị iḅi ịkịankoro ị̀ pịrịpịrịkẹ; sịkịmamgba siye siye-ẹ.” “Ngịsị ọkọ ḍuko ma!” Jẹhoshafat ḅe ọkọ se ọ̀ pẹkẹrẹmẹ.

⁸ Anị Amanyanaḅọ Ehab ḅe ḅẹrẹkọn warị mị ḅie gbọrị fịrịnwẹngịḅọ nwọ chịnḅo se ọ̀ fịrịmaye-ẹ na ò mun fịkịrị Maịkaya ḅe chịnḅo.

⁹ Ini mama amanyanapụma inia amanyanapụ ḅụchụayema chụa se, inia ngada ma ọgọnọ simemẹ, ịpịamgba pịsịrị nyọ mị ḅụ anị Sameria onu ḅọkọ mị ḅụ ḅọrọ paka nyọ mị ḅụ, ịkịankoroapụ mamgba inia tọrọkọ ḅụ ịkịankoroaḅẹ.

¹⁰ Inia ḅụ gbọrịḅọ, Zẹdẹkaya Keneana yaḅe, ikulele oḍu nwọ mịẹmẹ, seni nwọse Ehab ḅe ḅẹmẹ, “Mịn anị Nyanaḅọ Ḅe ḍuko ọkụ-ẹ, ‘Ma ayema anị ị́ se Siria apụma na owu sọ se ini nẹngịmaḅịaye-ẹ.’”

¹¹ Ísí-a ịkịankoroapụ mamgba anị gbọrị ḅara mị ḍukomẹ. “Owu se Remọt mị damamun ọmụḅaraiḅi sime ị́ pịrịḅịa,” ini nwọ ḅẹmẹ. “Nyanaḅọ Ḅe ori ọmụḅaraiḅi se ị́ pịrịḅịa.”

¹² Anịsịkị mị ḅụ, Maịkaya ḅe chịn-ẹmun fịrịnwẹngịḅọ ḅe nwọ seni Maịkaya ḅe ḅẹmẹ, “Ísí-a ịkịankoroapụ mamgba ini ọmụḅaraiḅi ịkịankoro amanyanaḅọ ḅe pịrịsam, ị́rị́ sọnị anị gbọrị ḅara ye-o.”

¹³ Ọkụma Maịkaya ḅe pẹkẹrẹ se nwọ ḅẹmẹ, “Ḍumo gbamaso Nyanaḅọ Ḅe ẹrẹ ḅụ ị̀ Tamụnọ Ḅe ị̀ ḅe na à ḍuko-ẹ nwọḅẹye anị à ḍukoḅịaye-ẹ!”

¹⁴ Ò ḅo Amanyanaḅọ Ehab ḅe tọrọkọ lasịkị, amanyanaḅọ ḅe ò gbelamẹ, “Maịkaya, Amanyanaḅọ Jẹhoshafat ḅe na ị̀rị̀ na wa mun owu se Remọt ama mị paka mị iḅi mọnọ iḅika?” “Owu se ini paka!” Maịkaya ḅe nwọ pẹkẹrẹmẹ. “Anị sime ḅara ọkụma ọmụ ị́ ḅara iḅiḅịa. Nyanaḅọ Ḅe ori ọmụḅaraiḅi seni ị́ pịrịḅịa.”

¹⁵ Ọkụma Ehab ḅe pẹkẹrẹ se nwọ ḅẹmẹ, “Nyanaḅọ Ḅe ẹrẹ ḅụ ị́ ọkwẹịn ị̀ pịrịarị sịkị goyegoye mamgba, karakaraye mị nwọ ḍuko! Nda sịkị à nwọ se anị mị ḍuko ị́ pịrịḅe?”

¹⁶ Maịkaya ḅe pẹkẹrẹ se nwọ ḅẹmẹ, “Àrị Izrẹl owunima ọrịmẹ, ḍikiḍikiḅọ nyanaka anana galagala ọkụ anị ini galagala ọkụ-ẹ chịngịma ọgọnọ. Anịsịkị Nyanaḅọ Ḅe nwọ ḅẹmẹ, ‘Mịnapụ ma ini tịḅịdaḅọ nyanakẹ; ye ini deinma so warị mun.’”

¹⁷ Ehab ḅe nwọ seni Jẹhoshafat ḅe ḅẹmẹ, “À ḍuko ị́ pịrịmẹ na ori iḅi ịkịankoro ị̀ pịrịpịrị sịkị ofori-ẹ; sịkịmamgba siyesiye kẹngẹ-ẹ!”

¹⁸ Maịkaya ḅe pa nwọ ḅẹaḅẹ: “Mịọkụ Nyanaḅọ Ḅe ḍukoarịye poki! À Nyanaḅọ Ḅe ọrịmẹ oria amanyanaḅọ ngada ọgọnọ soḅie ò sime waraḅẹ, oria enjẹlapụ mamgba oria angasịkị chịẹ waraḅẹ.

¹⁹ Nyanaḅọ Ḅe nwọ gbelamẹ, ‘Tụḅọ mun Ehab ḅe dairima ḅe mịẹso sịkị ò mun se ini ọ̀ ḅaaḅịa ọkụ Remọt ḅie?’ Enjẹlapụma ḅie tọn apụ gbọrịye nwọ ḍukomẹ, ísíapụma jịn aye nwọ ḍukomẹ,

²⁰ anịḅe kuluma gbọrị tẹmẹ, Nyanaḅọ Ḅe tọrọkọ mun se nwọ ḅẹmẹ, ‘À mun ọ̀ dairimaḅịa.’ ‘Nde ị́ yeḅịa ọkụ?’ Nyanaḅọ Ḅe nwọse ò gbelamẹ.

²¹ Tẹmẹ ḅe pẹkẹrẹ se nwọ ḅẹmẹ, ‘À mun mịẹḅịa Ehab ḅe oria ịkịankoro apụ mamgba iruo kọnḅịa.’ Nyanaḅọ Ḅe nwọ ḅẹmẹ, ‘Mun ọ̀ dairima. Ị́ ineda mịẹḅịa.’”

²² Maịkaya ḅe kuluma mị ḅụ nwọ ḅẹmẹ: “Mị anị mịọkụ pakasaye-ẹ. Nyanaḅọ Ḅe ọ̀ mịẹmẹ mà ị́ya ịkịankoroapụma iruo kọn ị́ pịrị. Ọkụma ori na mịnaḅụ na ọ̀ tọn wẹrịsam na ị́ fa ḅie sọḅịa!”

²³ Anị ịkịankoro Zẹdẹkaya ḅe kpekima Maịkaya ḅe damamun se, ọ̀ tọrụ ḅụrọ se ò gbelamẹ, “Nde sịkị ngịsị Nyanaḅọ Ḅe ọ̀ tẹmẹ mị ị̀ wẹrịso se ḅo ọkwẹịn ị́ pịrị?”

²⁴ Maịkaya ḅe nwọse ọ̀ pẹkẹrẹmẹ, “Ị́ mun ọḅụju gbọrị jukuru ḅie ḅọị simeḅịa nyọ ḅụ ị́ anị ọrịḅịa.”

²⁵ Anị Amanyanaḅọ Ehab ḅe kụrọ se oria fịrịnwẹngịapụma ḅie gbọrịḅọ pịrịye-ẹ, “Maịkaya ḅe kun, ò se opuama mị ḍikiḍikiarị gọvịna Amọn ḅe na amanyanaḅọ ḅe oria tatarị owutọkụ Joash ḅe na pịrị.

²⁶ Ḍuko ini pịrị na ini ò se ikoli warị ḅie gbin chu, se fịturu na mengi na kẹngẹ nwọse ọ̀ pịrị ọkịmun gbọrịye sọ ị̀ laka ḅaraḅụ à pịkịma ḅo sịkị la.”

²⁷ Maịkaya ḅe oloku pụkọ ḅụ nwọ ḅẹmẹ, “Nemikase gbọrịye sọ ị́ laka ḅaraḅụ ị́ pịkịma ḅo mẹ ḅẹḅẹ, anị Nyanaḅọ Ḅe ọ̀ ḅarị ị̀ ḅụ ḅọrọ ọkwẹịnkẹ!” Ọ̀ pịkịna nwọ ḅẹmẹ, “Tomoniḅọ goyegoye à ḍukoarịye mị poki!”

Ehab Ḅe Fị Mị

²⁸ Anị Izrẹl Amanyanaḅọ Ehab ḅe na Juda Amanyanaḅọ Jẹhoshafat ḅe na mun owu se Remọt opuama ḅie Giledị mị pakaye-ẹ.

²⁹ Ehab ḅe Jẹhoshafat ḅe ḅẹmẹ, “Wa nwọ ọmụ mun-arị sịkị, ị́rị́ amanyanaḅọ ḅụchụaye chụa, ọkụma ị̀rị̀ àrị ị̀ ḅụ ḍinmaḅịa.” Anị ḅụ, Izrẹl amanyanaḅọ ḅe ọ̀ ḅụ ḍin ọmụ mun mẹ.

³⁰ Siria amanyanaḅọ ḅe, ọ̀ kụrọ pịrịsam na oria kporokporo ọmụarụ tịḅịnịma ini owuse jụmḅọ pakama Izrẹl amanyanaḅọ ḅe sikima.

³¹ Anị ḅụ ini Amanyanaḅọ Jẹhoshafat ḅe ọrị sịkị, inimgba nwọ chịnmẹ na ori anị Izrẹl amanyanaḅọ ḅe-ẹ, mị ini pịkị ọ̀ daye-ẹ. Ọkụma Jẹhoshafat ḅe gele pụkọ se olokumẹ, anị Nyanaḅọ, Tamụnọ Ḅe ọ̀ ḍụa se ọ̀ ḅụ owu kụlọ mị pịkịsinye-ẹ.

³² Kporokporo ọmụarụ tịḅịnịma ọrịmẹ na Izrẹl amanyanaḅọ ḅe ọrịkẹ, mị ò ḍuko ḅụ ini dachịẹye-ẹ.

³³ Bẹkẹma ḅaraḅụ, anịsọ, gbọrị Siria owuniḅọ lubu tẹịnmẹ se anị mun Amanyanaḅọ Ehab ḅe ọ̀ chụa owuniayema ḅụ ẹmbẹ ḅụ tolu mun ò temimẹ. “Ye ị̀ lasam!” ọ̀ nwọ oloku oria kporokporo ọmụarụ dọkụḅọ ḅe pịrịmẹ: “Pịkị, owu ḅie dọkụ paka!”

³⁴ Owu mị guma àrị sịkị, Amanyanaḅọ Ehab ḅe, oria kporokporo ọmụarụ ḅie sime tọrụ se Siriapụ ma daḅẹ. Ịrụasọ sịkị mị ọ̀ fịye-ẹ.