2 Amanyanapụ Sịkị Mịẹaye Ma 17 - Kịrịkẹnị Baịbụl

Jẹhoshafat Ḅe Ḅo Amanyanaḅọ Sọmẹ

¹ Jẹhoshafat ḅe ḍawu Esa ḅe kiri ḍinmamẹ amanyanaḅọ ḅaraḅụ se anị kiri mị ḅụ ọ̀ kụrọmachịẹ Izrẹl mị na tụḅụrụmẹ.

² Ori owuni se ini onu se kelema kụrọ opuamama ḅie koromamẹ, Juda sẹ mị eke ma ḅụ, pịkịna Esa ḅe ọmụ ḅie Ifrem mị ḅara ọkị opuamama sọnị.

³ Nyanaḅọ Ḅe Jẹhoshafat ḅe ḅẹlẹmamẹ anịatịḅị ḍawu ḅe oria boka sịkị ḅụ kọn Beal oru ma tẹkẹka ḍumo mị ọ̀ nwọ ḍikinwẹngịye gose-ẹ.

⁴ Ḍawu Tamụnọ Ḅe anị ọ̀ tẹkẹtẹkẹye-ẹ, ọ̀ Tamụnọ Ḅe olokoma kokomẹ ọ̀ pịkị Izrẹl amanyanapụma kọnkọn ḍumo ma kọnkẹ.

⁵ Nyanaḅọ Ḅe seni ḅẹrẹtọn Juda amanyanakiri mị pịrịḅịa kụrọ ọ̀ nwọse Jẹhoshafat ḅe pịrịmẹ, tomoni mamgba ḍiepịrịaye se ḅo ọ̀ pịrịpịrịmẹ, anịẹrẹchị ò ḅo opuma pẹrẹmẹ. Se ọ̀ pịkị opu osi nyanamẹ.

⁶ Nyanaḅọ Ḅe tẹkẹ mị ò se mịẹmịẹye chịẹmamẹ, ọ̀ pịkị oruḅẹrẹ nemiapụ ma ini tẹkẹtẹkẹ-a nyọma kansinmẹ, Juda ḅie ini tẹmẹ koroma se tẹkẹtẹkẹ Ashera eremeni oru mị sọnị ọ̀ pẹlẹgbinmẹ.

⁷ Ori amada tẹrẹ karama kụra mị ḅie ọ̀ Bẹnheil ḅe na, Obadaya ḅe na, Zẹkaraya ḅe na, Netanẹl ḅe na, pịkị Maịkaya ḅe na fịrịmamẹ na ini mun Juda opuamama ḅie yeseni ini telima.

⁸ Esenia-a Livaị apụ na mama agbamịẹapụ na iniaḅụ sọ mun mẹ. Livaị apụma anị Shẹmaịya ḅe na, Netanaya ḅe na, Zẹbadaya ḅe na, Asahẹl ḅe na, Shẹmiramọt ḅe na, Jihonatan ḅe na, Adonaịja ḅe na, Tobaịja ḅe na, pịkị Tọb Adonaịja ḅe na; anịsịkị mịnapụma anị agbamịẹapụ ma-ẹ, Ẹlishama ḅe na, pịkị Jẹhoram ḅe na.

⁹ Ini Nyanaḅọ Ḅe oria oloko ḍiri mị dekimẹ, se anị se nwẹngị Juda ama mamgba ḅie mun yeseni tomonima telimamẹ.

Jẹhoshafat Ḅe Oria Opu Mị

¹⁰ Nyanaḅọ Ḅe mịẹse Amanyanaḅọ Jẹhoshafat ḅe na kpeki sẹ mamgba ḅalafamẹ owu se ọ̀ paka mị ḅụ.

¹¹ Filistia apụma ḅụ tọn apụ ḅaka ḅaraḅụ seleḅa na jịn-a ḍiepịrịaye na se ḅo Jẹhoshafat ḅe pịrịpịrịmẹ, da Arab apụ pịkị anana ẹndẹ ofori gbọrị poku na anana sọnọasi na pịkị oḅori ẹndẹ ofori gbọrị poku na oḅori-a sọnọasi na nwọse ḅo ọ̀ pịrịmẹ.

¹² Anị mị ḅụ Jẹhoshafat ḅe oria kụrọ mị ḅụ sịkịmamgba ye sọmẹ. Juda mị kelema ḅụ ọ̀ kụrọ owuni-a warị na opuama na namamẹ,

¹³ anị ini ḅakama fịaye na ngọ na koko-a nyọ-ẹ. Jerusalẹm ḅie opu fịrịtịḅịnị ọ̀ nwọse koromamẹ,

¹⁴ ini sẹsẹ ḅụ sime ḅaraḅụ. Juda sẹ mị ḅie Adna ḅe owuni tịḅịdaḅọ-ẹ, owuni ḅụ sọnọ-a ẹndẹ ofori poku soi ò chuku ḅie omi-ẹ.

¹⁵ Ọ̀ ḍaḅọ anị Jẹhohanan ḅe-ẹ, ori owuni-a poku soi sọnọ-a poku fịnjị mị ò chuku ḅie omi-ẹ,

¹⁶ tẹrẹ karama ḅọ anị Amasaịya Zikraị yaḅe-ẹ, ori sisọnọ-a poku fịnjị ò chuku ḅie omi-ẹ. (Amasaịya ḅe ori ọ̀ ḅụ ḅerenimẹ na ọ̀ fịrịnwẹngị Nyanaḅọ Ḅe pịrịḅịa)

¹⁷ Bẹnjamin sẹ mị ḅie ọmụkụlọdaḅọ anị Ẹlaịada ḅe-ẹ, ori anị jokoma ẹrẹso owuniḅọ-ẹ, ori ọmụkụlọda sisọnọ-a poku fịnjị pịrịmẹ, ini ma anị angwa na lubu na owuni-ẹ.

¹⁸ Maịn-karama ọ̀ daḅọ anị Jẹhozabad ḅe-ẹ, ori owuni simaịn poku fịnjị na oyi ẹndẹ ò chuku ḅie omi-ẹ, inimgba ḅụkarakarama owu pịrị apụ-ẹ.

¹⁹ Mịnapụ ma anị fịrịnwẹngị amanyanaḅọ ḅe pịrịarịapụ-ẹ Jerusalẹm ḅie, ọ̀ pịkị jịn owuni se Juda ḅie ori ọmụaye se koroma kụrọ opuamama ḅie koromamẹ.