2 Amanyanapụ Sịkị Mịẹaye Ma 13 - Kịrịkẹnị Baịbụl

Abaịja Ḅe Jeroboam Ḅe Na Gbin Ọmụ Mị

¹ Amanyanaḅọ Jeroboam Izrẹlḅọ ḅe amada maịnfasi karama kụra mị ḅie anị Abaịja ḅe ḅo Juda amanyanaḅọ nwọ sọye-ẹ,

² se tẹrẹ-a kụra ọ̀ nwọse ḅẹrẹtọnmẹ Jerusalẹm ḅie. Nyọngọrọ ma anị Maịkaya ma-ẹ, árị ma Gibia opuamaḅọ Yurịẹl ḅe ḅarọ-ẹ. Ọmụ koromẹ Abaịja ḅe na Jeroboam ḅe na ogboku.

³ Abaịja ḅe, owuni ḅụ poku-a mesi oyi fịnjị ọ̀ nwọ nyanamẹ, se Jeroboam ḅe, owuni ḅụ poku-a sọnọasi nwọ nyana se ori na bịamamẹ.

⁴ Ọmụgbin apụma Ifrem chịngị ọgọnọ sẹ mị ḅieḅụ ini bịamamẹ. Amanyanaḅọ Abaịja ḅe mun Zẹmaraịm Tụndụ mị ọgọnọ ḅụ Jeroboam ḅe na Izrẹlapụma na chịn oloku: Nwọse ini ḅẹmẹ, “Ómine ị̀ poki!”

⁵ “Nyanaḅọ, Izrẹl Tamụnọ Ḅe ngịsị kan ẹka ọḅọkụ ọ̀ nwọse Devid ḅe na fịmẹ nwọḅẹye mị ó nemika, na Izrẹl amanyanakiri mị ò se ori na ọ̀ ḅụpakaḅoḅịa apụma na pịrị gbasomẹ nwọḅẹye mị?

⁶ Jeroboam, Nebal yaḅe ḅarị nyana ḅereni Sọlọmọn oria amanyanaḅọ ḅe pịrịkẹ.

⁷ Ọḅụkọ ò mun papa yeḅụsọka sitịḅịnyana tomoni kpo nwọ koḅirima se ini inia ḅie tọn ọkụ seni Rihoboam, Sọlọmọn yaḅe mịẹmẹ, anị ngịsị ma boka pịkị ineda ini dachịẹmaḅịa ọkụ sọnị ma nwọ nemika ḅọ ḅe.

⁸ Mịọkụ ómine owu karakarama amanyana kụrọ mị pịrịsam, Nyanaḅọ Ḅe seni Devid furo ḅie apụma pịrịye mị. Ọ́ tọn-a ọmụgbin apụ nyanamẹ pịkị Jeroboam ḅe mịẹ ọ́ pịrị goli owoi nambuloma na anị ọ́mịna oru ma-ẹ nwọḅẹ ayema.

⁹ Ọ́ Nyanaḅọ Ḅe oria agbamịẹapụma desinmẹ, Erọn furo ḅie apụma, ọ́ pịkị Livaị apụma desinmẹ. Jịn sẹma mịẹ ọkụ mị anị ómine sọnị agbamịẹapụ tọn seni inia kiri ḍinma ọkụ mị-ẹ. Gbọrị owoi nambulo anịkanịka sọnọma anana seni ḅo ḅọ goyegoye ineda nụḅọ ḅụ mịẹfịafịama agbamịẹḅọ sọ àrị ọ́mịna tamụnọ-ẹ nwọḅẹ ayema pịrịḅịa.

¹⁰ “Ọkụma wa pa fịrịnwẹngị mịna Tamụnọ Ḅe pịrịaḅẹ se ma wa ọ̀ sịkịkẹ. Erọn furo ḅie pakaḅo agbamịẹapụma inia fịrịma ini nwẹngịaḅẹ, Livaị apụma pịkị ḅarachụa ini pịrịaḅẹ.

¹¹ Dede na saso na goyegoye ḅụ ini insẹnsị na bebe ma dọkịma nama na nwọse agbamịẹ ọ̀ pịrịpịrịmẹ. Ini fịturu agbamịẹ ḍiepịrịayema seni fịafịa dẹbụl ọgọnọ gbana gbanamẹ, se saso sọ sịkị goyegoye ini goli goli tọnjie gbanaye ma ọgọnọ ḅụ sime tọnjie ma chụachụamẹ. Nyanaḅọ Ḅe tọnye anị wa mịẹmịẹye, ọkụma ómine ma ómine ọ̀ sịkịsam.

¹² Tamụnọ Ḅe na mịnaḅụ na anị mịna tịḅịdaḅọ-ẹ, se oria agbamịẹapụma pịkị mịanga ḅụ omi-ẹ oḍu ma na, ini ḅụkarakarama waraḅẹ àrị ofuro seni wa chịn ómine na owusọḅịa ẹrẹchị. Izrẹlapụ ọ́ Nyanaḅọ, ọ́mịna ḍapụma Tamụnọ Ḅe na owusọ ma! Ọmụ ineda ọ́mịna ḅara iḅi ẹkẹ!”

¹³ Mịsịkị mị ḅụ, Jeroboam ḅe, ori ọḅụ owu se Juda apụma pakaḅịaye gose, oria owunima ḅụ ḍapụ ọ̀ nwọse Juda owunima ọḅụju ḅọị wẹrịmẹ, se ísí apụma tọrụ se ini na dama se bịamaḅịa.

¹⁴ Juda apụma nyọ ḍiki kelema se ọrịmẹ na ini ini ḍẹkị kelema waraḅẹ. Ini Nyanaḅọ Ḅe chịn owumẹ ḅarachụa ini pịrịḅịa ẹrẹchị, se agbamịẹapụma pịkị oḍu ma ofuromẹ.

¹⁵ Juda apụma gelema olokumẹ, se Abaịja ḅe ọmụkụlọda ini pịrị seni ini owu mị pakamẹ; Tamụnọ Ḅe Jeroboam ḅe na Izrẹl ọmụogbo mị na nẹngịmamẹ.

¹⁶ Izrẹlapụma mangị Juda apụma pịrịmẹ, se Tamụnọ Ḅe ọmụkụlọda Juda apụma pịrị seni ini iniaḅụ kụrọkọnmẹ.

¹⁷ Abaịja ḅe na oria ọmụogbo mị na ḅakama Izrẹlapụma ḅaakọsịma se ini nẹngịmamẹ—Izrẹl owunima ḅie owusọtẹịn owunima ḅụ poku-a tesi ma poku fịnjị na oyi ẹndẹ na fịmẹ.

¹⁸ Anịẹrẹchị Juda apụma ọmụḅaraiḅi nyanamẹ Izrẹlapụma ḅụ, anịatịḅị ini Nyanaḅọ Ḅe ḅụ sẹrẹrẹmẹ, inia olomuḍapụ ma Tamụnọ Ḅe.

¹⁹ Abaịja ḅe Jeroboam ọmụogbo mị ḍuko mun pịkị oria opuamama ḅụ daye nwọ ọkị angamẹ: Bẹtẹl mị na, Jẹshana mị na, pịkị Ifrọn mị na, pịkị ma opuamama nyana àrị na kpeki kala amama na.

²⁰ Jeroboam ḅe oria kụrọ mị ọ̀ ḅarị kpoto anị nyanakẹ, Abaịja ḅe amadarị sịkị mị ḅụ. Anịḅe kuluma Nyanaḅọ Ḅe ò fomugbin se ọ̀ fịmẹ.

²¹ Abaịja ḅe, anị sime ḅaraḅụ, pa pịkị kụrọ kọnma mun mẹ. Oyi inein-a ere fịnjị ọ̀ nwọ simemẹ pịkị ḍaḅọsọ simaịn owuapụ awọ fịnjị na pịkị ineinfasi eremeni awọ na pịrịmẹ.

²² Kirikọn Abaịja ḅe ḅụḅẹrẹ na ò ḍuko aye na pịkị ọ̀ mịẹaye na Ido Ịkịankoroḅọ ḅe Ḅụḅẹrẹ ḍiri mị ḅieḅụ gịẹịn waraḅẹ.