2 Amanyanapụ Sịkị Mịẹaye Ma 12 - Kịrịkẹnị Baịbụl

Ijipt Apụ Juda Mị Gbẹịnmachịẹmẹ

¹ Rihoboam ḅe amanyanaḅọ ḅara nwọseni oria kụrọ mị ḍiepakụma kirikiri, ori na oria tomoni mamgba na Nyanaḅọ Ḅe oria Olokoma ini wẹrịsomẹ.

² Rihoboam ḅe amada sọnọ karama kụra mị ḅie, ini nyana ḅereni Nyanaḅọ Ḅe pịrịkaye mị anịa fomuḅara ini nwọ damẹ. Amanyanaḅọ Shaịshak Ijiptḅọ ḅe owuse Jerusalẹm mị pakamẹ

³ ọmụgbin kporokporo, tẹrẹ ẹndẹ, asụn ọgọnọ owuni, sọnọma poku oyi ẹndẹ fịnjị. Libya owuni na, Sọkịm owuni na, pịkị Sudan owuni mamgba na, inimgba ineda kịẹnḅịa ọkụ ofori owuni ori na mun owu se Jerusalẹm pakamẹ.

⁴ Juda mị nyana ọmụaye koko warịma sime opuamama ọ̀ nwọ ọkịso sịkị, ọ̀ pịkị nwẹngị sọma mun Jerusalẹm lamẹ.

⁵ Shẹmaịya, ịkịankoroḅọ ḅe so Amanyanaḅọ Rihoboam ḅe na pịkị Juda tịḅịnịma na damamunmẹ anị Jerusalẹm ḅie ḅụ koḅiria se Shaịshak ḅe ḅarapẹlẹma soḅịa ọkụ ḍọkịarị apụma. Ọ̀ nwọse ini ḅẹmẹ, “Mị Nyanaḅọ Ḅe seni ọ́ fịrịma oku mị-ẹ: ‘Ómine ị̀ wẹrịsosam, anịẹrẹchị mịọkụ àrị ọ́ wẹrịso Shaịshak ḅe pịrịsam.’”

⁶ Amanyanaḅọ ḅe na ini tịḅịnịma na ḅerenimẹ na ini simịẹsam, se ini nwọ ḅẹmẹ, “Nyanaḅọ Ḅe karakaraye anị ọ̀ mịẹarịye-ẹ.”

⁷ Nyanaḅọ Ḅe mịn mị ọrị sịkị, ọ̀ pịkịna ọkwẹịn kọn Shẹmaịya ḅe pịrịse nwọse ọ̀ ḅẹmẹ, “Inia sima ini nwọ ḅerenimẹ nwọḅẹye ẹrẹchị, à ḅarị ini fama ẹkẹ. Ọkụma Shaịshak ḅe owuse ini pakaḅịa sịkị ini pa kele kọnḅịa. Ị̀ya kụrọ ịganị mị mgba ḅarị mun Jerusalẹm mị ọgọnọ gbana ẹkẹ,

⁸ ọkụma Shaịshak ḅe ori ini nẹngịmaḅịa, se fịrịnwẹngị ị̀ pịrị mị na fịrịnwẹngị sẹkiri mị ḅie ḅẹrẹtọn apụma pịrị mị na ḅụ kịrịye ini nwọ ḍawọ nemiḅịa.”

⁹ Amanyanaḅọ Shaịshak ḅe Jerusalẹm ḅie sọḅo se Oputẹkẹwarị mị na, amanyanaḅọ warị mị na ḅieḅụ ngọma tan ọkịmẹ. Yegoyegoye ọ̀ tan ọkịmẹ, pịkị Amanyanaḅọ Sọlọmọn ḅe mịẹ koroma goli-goli agbọ ma na.

¹⁰ Seni arịa kiriḍinma ḅụ, Rihoboam ḅe alapẹlẹka agbọ ma mịẹse àrị seni amanyanaḅọ odo ḅọkọ ma koru fịrị mị sime pịrị apụma ḅara chụamẹ.

¹¹ Amanyanaḅọ ḅe ori Oputẹkẹwarị mun sịkị goyegoye nyọ koruapụma ini agbọ ma deki mun pịkị àrị dekiḅo nyọ koruapụ warị ḅie koroma-koromamẹ.

¹² Ọ̀ ḅịkịkoro Nyanaḅọ Ḅe pịrịmẹ nwọḅẹ ẹrẹchị, Nyanaḅọ Ḅe ịganị mị ḅarị okorona okorona ọ̀ famakẹ, se ye pịkị Juda mị na iḅimẹ.

Rihoboam Amada Mị Mgba Tangboloma

¹³ Rihoboam ḅe Jerusalẹm mị ḅie ò sime ḅẹrẹtọnmẹ se oria kụrọ mị mịẹ sumamẹ amanyanaḅọ ḅaraḅụ. Ò ḅo amanyanaḅọ sọ sịkị kụra mesi gbọrị kụra fịnjị ọ̀ nwọ lasam. Jerusalẹm mị ḅieḅụ tẹrẹfa si kụra ọ̀ nwọse ḅẹrẹtọnmẹ, anị Nyanaḅọ Ḅe sẹlẹọkị na bebe Izrẹl pẹkẹrẹ mị mgba ḅụ ini ọ̀ tẹkẹḅịa nwọḅẹ opuama mị-ẹ. Rihoboam nyengima anị Neama ma-ẹ, Amọn ama ḅọ-ẹ.

¹⁴ Ò siyemịẹmẹ, anịatịḅị ọ̀ ḅụkụrọma Nyanaḅọ Ḅe tọn ayema nwọ ḍiki mịẹkẹ.

¹⁵ Rihoboam ḅe mịẹaye ma, sakị ḅụ ọkịmun anị ḅe kuluma mị la pịkị ò furo mị ḅụ gịẹịn ayema na Shẹmaịya, Ịkịankoroḅọ ḅe Ḅụḅẹrẹ ḍiri mị ḅie na pịkị Ido, Ịkịankoroḅọ ḅe Ḅụḅẹrẹ ḍiri mị na ḅieḅụ àrị omi-ẹ. Rihoboam ḅe na Jeroboam ḅe na sịkịna sịkịna ḅụ ini jịnḅọ jịnḅọ na owu sọsọmẹ.

¹⁶ Rihoboam ḅe ọ̀ fịmẹ se Devid opuama ḅie, amanyanapụ furo iḍupuma ḅie ini ò ḍipimẹ, oria tọkụ Abaịja ḅe amanyanaḅọ ḅaraḅụ ọ̀ tịḅị ḍinmamẹ.