2 Amanyanapụ Sịkị Mịẹaye Ma 10 - Kịrịkẹnị Baịbụl

Ọgọnọju Sẹ Ma Àrị Nyana Ḅerenikẹ

¹ Rihoboam ḅe ò so Shẹkẹm mun mẹ, anị bebe ọgọnọ ọrụ da Izrẹlapụ mamgba koḅirima sime se ò se amanyanaḅọ kunḅịa nyọ mị.

² Jeroboam, Nebal ya, anị Amanyanaḅọ Sọlọmọn ḅe ḅarapẹlẹma so Ijipt munḅọ ḅe, mị ḅẹrẹ mị naa sịkị, ò vinpịkị ama ḅomẹ.

³ Ọgọnọ ọrụ da sẹma ọ̀ fịrịma ḅomẹ, se inimgba gboloma so Rihoboam ḅe damamunmẹ, se nwọse ọ̀ ḅẹmẹ,

⁴ “Ị́ ḍaḅe iku wa pụnụmaye ọ̀ nwọse mịna ọgọnọ gbana gbanamẹ, ị́ nemikase ma ikuaye ma mịẹsarasarama wa pịrị pịkị ḅụḅalaḅala ofori ḍumo nwọse mine na kọnḅịa ḅẹḅẹ wa nyanaḅereni ị́ pịrị apụ sọḅịa.”

⁵ Rihoboam ḅe nwọse ini pẹkẹrẹmẹ, “Ọ́ tẹrẹ-a ḍin seni ị̀ pịrị, à seni koroma kọn mị ḅẹrẹ mị pịrị. Anịsịkị ọ́ pịkịmaḅo.” Anị tomonima ini soye-ẹ.

⁶ Amanyanaḅọ Rihoboam ḅe tetema seni ḍawu Sọlọmọn ḅe pịrịpịrị sẹnịapụma gbelamẹ, “Cheye à nwọse mịna apụma pẹkẹrẹ ọ́ nwọḅẹ?”

⁷ Ini nwọse ọ̀ pẹkẹrẹmẹ, “Ị́ nemikase iḅi ama anga ḅara se mịna apụma na ama anga se ḅụkụrọma inia ḅụḅẹlẹḅịa ye nwọ mịẹ, pịkị dein ḅịpị se ini pẹkẹrẹmẹ ḅẹḅẹ ini nyanaḅereni ḅara nwọ seni fịrịnwẹngị ị́ pịrịḅịa sịkịmamgba.”

⁸ Ọkụma sẹnịapụma seni ọ̀ pịrị tetema mị ori anị sịkịmẹ, anịnakaraka ò so asẹmẹnị ma anị ori na posipaka apụma damamunmẹ anị mịọkụ tetema seni ọ̀ pịrịarịapụ ma.

⁹ “À mịẹḅịaye ḅụ che tetema ọ́ nwọse ị̀ pịrịḅe?” ọ̀ nwọ gbelamẹ. “Nde à seni ini pẹkẹrẹḅịa ye, inia ọgọnọ ḅụ ikuaye ma mịẹsarasarama ini pịrị, ị̀ ḅara nwọ ḅiarịapụ ma?”

¹⁰ Ini nwọ pẹkẹrẹmẹ, “Mị ị́ ḍuko ini pịrịḅịaye mị-ẹ: ‘Ị̀ ḅara ịkalịḅe tụmgbalị mị kpokorotẹịn ị̀ ḍaḅe konju nẹngịmẹ.’

¹¹ Nwọse ini ḅẹ na, ‘Ị̀ ḍaḅe ikuaye ọ̀ nwọse ómine pụnụma pụnụmamẹ; ọkụma ị̀rị̀ à mịẹse àrị ikutẹịnḅịa. Fomuye anị ò se ó fomufomuye-ẹ, ọkụma ị̀rị̀ asụn fomuye anị à se ó fomufomuḅịaye-ẹ!’”

¹² Tẹrẹ-a ḍin ma lasịkị Jeroboam ḅe na tomoni mamgba na vinpịkị so Amanyanaḅọ Rihoboam ḅe damamunmẹ, anị ori ini ḅẹ ḅaraḅụ.

¹³ Amanyanaḅọ ḅe sẹnịapụma se ọ̀ pịrị tetema ma ọkịka ḅaraḅụ, kụrọ ḅịpị seni ọkwẹịn kọn tomonima pịrịmẹ,

¹⁴ anị asẹmẹnị ma seni ọ̀ pịrị tetema mị ḅụ. Ọ̀ nwọ ḅẹmẹ, “Ị̀ ḍaḅe ori ikuaye seni ómine pụnụma pụnụmamẹ; ọkụma ị̀rị̀ à mịẹse àrị ikutẹịnḅịa. Fomuye anị ò se ó fomufomuye-ẹ; ọkụma ị̀rị̀ asụn fomuye anị à se ó fomufomuḅịaye-ẹ!”

¹⁵ Anị Tamụnọ Nyanaḅọ Ḅe ḅi ḅara-ẹ na, ịkịankoro Ahaịja, Shịloḅọ ḅe ḅụ ọ̀ ḅọrọ kọn Jeroboam, Nebal yaḅe pịrị ọkwẹịn ma ḅo mịẹḅịa ẹrẹchị. Mịn mị ẹrẹchị anị amanyanaḅọ ḅe gose ngịsị tomonima tọrụḍikikaye-ẹ.

¹⁶ Tomonima ngịsị amanyanaḅọ ḅe ori ini poki ḍụkụ ẹka ọkụ ini nwọ ọrị sịkị, ini olokumẹ, “Ya Devid na ò furo na ómine ọ́ daḅịa ju da! Nde jịn sịkị ini kele mịẹ wa pịrịsaye? Izrẹlapụ ó ye wa so warị mun. Ye Rihoboam ḅe ḅarana ngẹrị ngẹrị ọ̀ ḅụ ḍikiḍiki.” Anịẹrẹchị Izrẹlapụma ini nyanaḅereni ọ̀ pịrịka ḅaraḅụ,

¹⁷ Rihoboam ḅe ḅụ pu somẹ se ori amanyanaḅọ sọ Juda pẹkẹrẹ mị ḅụ anga apụma kẹngẹ nwọ pịrịmẹ.

¹⁸ Se Amanyanaḅọ Rihoboam ḅe, ini kụrọḅara se kun fịrịḅie chu apụma ḅụ tịḅịdaḅọ, Adonaịram ḅe ḅẹmẹ na ori Izrẹlapụma damamun, ọkụma ò mun sịkị ini imgbele se ò gbin ḅaamẹ. Mịn mị ḅụ Rihoboam ḅe, be oria owuni kporokporo mị ḅụkụlọ se inia ḅara pẹlẹma mangịso Jerusalẹm mun mẹ.

¹⁹ Anịsịkị ngịsị sakị, ọgọnọ ọrụ da Izrẹl amanyanakiri mị anị ḅarị ḅereni nyana Devid ama nyana furo mị pịrịkẹ.