2 Amanyanapụ Sịkị Mịẹaye Ma 1 - Kịrịkẹnị Baịbụl

Amanyanaḅọ Sọlọmọn Ḅe Tẹkẹ Ḅụ Nemi Ḅimẹ

¹ Sọlọmọn, Amanyanaḅọ Devid yaḅe, kụrọma Izrẹl amanyanakiri mị ọlọchịẹmamẹ, se Nyanaḅọ ọ̀ Tamụnọ Ḅe pịkị ọ̀ ḅẹlẹma se ọ̀ mịẹse ò ḅo opuma kụrọnyanaḅọ sọmẹ.

² Anị gose Amanyanaḅọ Sọlọmọn ḅe kụrọ seni kpokpo ma ḅụ tịḅịdapụ ma pịrịmẹ anị kịnị-a mẹndẹ oyiasi fịnjị fịnjị na pịkị kịnị-a sọnọasi sọnọasi ḍikiḍikiarị apụma na sẹkẹnị kiri ḅie ḅẹrẹtọn apụ mamgba na furo furoma ḅie tịḅịnị mamgba na pịkị bebe ísí kirikọn apụ mamgba na.

³ Anị ḅọrọso ọ̀ tọn ini pịrịmẹ na ini ori na so tẹkẹ nyọ mị mun Gibiọn ḅie. Ini gose anịju munye anịatịḅị, Nyanaḅọ Ḅe pakaḅoḅo Ikowarị mị anịju anị simemẹ, anị Moziz, Nyanaḅọ Ḅe fịrịnwẹngịḅọ ḅe, piri ele ḅieḅụ namaye mị.

⁴ (Mị sịkị ḅụ, Ọḅọkụ Igbe mị, Amanyanaḅọ Devid ḅe Kiriat Jearim ḅie anị ọkịḅo sịkị, Jerusalẹm ḅie ọ̀ pike chịẹma gbọrị ikowarị ḅie anị simemẹ.)

⁵ Yuraị ya Họ ḅe oria owutọkụ Bẹzalẹl ḅe tẹmẹ alapẹlẹka agbamịẹ ẹbẹ mị sọnị Gibiọn ḅie Nyanaḅọ Ḅe pakaḅoḅo Ikowarị mị tọrọkọ ḅụ anị simemẹ. Amanyanaḅọ Sọlọmọn ḅe na pịkị bebe tomoni mamgba na anịju ḅụ ye se Nyanaḅọ Ḅe gbelagbelamẹ.

⁶ Ikowarị mị tọrọkọ ḅụ amanyanaḅọ ḅe ọ̀ Nyanaḅọ Ḅe tẹkẹtẹkẹmẹ, ọ̀ pịkị alapẹlẹka agbamịẹ ẹbẹ mị ọgọnọ agbamịẹmẹ; nama mẹndẹ oyiasi fịnjị ọ̀ nwọ ḅaamẹ se ori arịmgba seni agbamịẹ ẹbẹ mị ọgọnọ bebema dọkịma agba nwọ mịẹmẹ.

⁷ Anị ḍin mị ḅie Tamụnọ Ḅe ọḅụ ḍiepakụma Sọlọmọn ḅe pịrị se ò gbelamẹ, “Nde à se ị́ pịrị se ị́ ḅụḅẹlẹḅịa ye?”

⁸ Anị Sọlọmọn ḅe nwọse ọ̀ pẹkẹrẹmẹ, “Ị̀ ḍa Devid ḅe sịkịmamgba ị́ opuma ọ̀ ḅẹlẹmamẹ, se mịọkụ ị́ pịkị ḅereni ị̀ pịrị se ị̀rị̀ amanyanaḅọ ḅaraḅụ oria kiri mị ḍinmasam.

⁹ Mịọkụ Nyanaḅọ Tamụnọ, ị́ ḅereni ị̀ ḍaḅe pịrịsa ye mị mịẹḅeinma. Ị́ ị̀ seni amanyanaḅọ mịẹ seni ineda kịẹnḅịa ọkụ ofori tọn-a tomoni nwọ pịrịsam,

¹⁰ anịẹrẹchị à seni ḅẹrẹtọn ini pịrịḅịa nemi mị na yekaịnḅo mị na nwọse ị̀ pịrị. Anị oforiọkụma nde àrị ineda ḅẹrẹtọn ị́ya tomoni, nwọ sime opu ḅaka apụma pịrịḅịa ọkụ?”

¹¹ Anị ḅụ Tamụnọ Ḅe nwọse Sọlọmọn ḅe pẹkẹrẹmẹ, “Karakaraye mị ị́ nwọ sẹlẹọkịsam. Pẹrẹ anịkanịka ngọ anịkanịka ẹrẹso anịkanịka ị́rị́ na tarakapụma inia fị anịkanịka nangwọ ḍumo ị́ nwọ ḅi ị́ ḅụ pịrị nakaraka, nemi na yekaịnḅo na anị ị́ ḅiye-ẹ, mịẹse ị́ ineda ḅẹrẹtọn ị̀ya tomonima pịrịḅịa ọkụ, anị àrị ị́ seni amanyanaḅọ mịẹ pịrịsa apụma.

¹² Nemi na pịkị yekaịnḅo na à seni ị́ pịrịḅịa. À pịkị pẹrẹ na ngọ na pịkị ẹrẹso na seni ị́ pịrịtẹịn ị́ tọrọkọ anịkanịka ị́ ọḅụju ḅoḅịa amanyanaḅọ goyegoye nwọ nẹngịḅịa.”

Amanyanaḅọ Sọlọmọn Ḅe Oria Kụrọ Na Pẹrẹ Na

¹³ Sọlọmọn ḅe, ọ̀ Nyanaḅọ Ḅe pakaḅoḅo Ikowarị mị sime ama Gibiọn mị wẹrịso se vinpịkị Jerusalẹm ḅomẹ. Ori anịju ḅụ sime ḅẹrẹtọn Izrẹl mị pịrịmẹ.

¹⁴ Kporokporo ọmụarụ ma ḅụ tẹrẹ ẹndẹ oyiasi fịnjị ọ̀ nwọ koḅirimamẹ pịkị ọmụgbin asụnma ḅụ poku na oyi ẹndẹ na nwọ nyanamẹ. Arịa ḅụ daye ọ̀ nwọse Jerusalẹm ḅie koromamẹ, se kirikọn ayema ori àrị ḍie ísí opuamama ḅie àrị sime sime nyọma ḅụ wẹrịmẹ.

¹⁵ Ori amadarị sịkị mị ḅụ seleḅa na goli na Jerusalẹm ḅie ḍụparị ḅaka ọkụ anị àrị ḅaka ọkụ-ẹ, awụ chịn mị sọ sikamọ ejema ḅaka ọkụ ḅakamẹ.

¹⁶ Amanyanaḅọ ḅe ye fẹḅo ọ̀ pịrịpịrị apụma iderima ḅịpị se Ijipt ḅie na Silisia ḅie na asụnma fẹ ḅoḅomẹ,

¹⁷ Ijipt ḅie mị ini kporokporo ọmụarụ ma fẹ ḅoḅoye-ẹ, se àrị se Hitaị amanyanaḅọ ḅe na Siria amanyanaḅọ ḅe na dẹrịdẹrịye-ẹ. Ini se gbọrị kporokporo ọmụarụ dẹrịdẹrịye anị seleḅa pẹkẹrẹ ẹndẹ na oyiasi fịnjị-ẹ, anịsịkị gbọrị asụn laye anị seleḅa pẹkẹrẹ sọnọmasi oyi fịnjị-ẹ.