Luke 1 - Yinzebi NT Kiwoyeti

^1-2 A wɛyi Tɔfile, baate mvuabɔvɛ bàmɔne maambe ma Nzɛmbi àsade gu mboge a bése a béne. Bɔ nibàbàbade na butome bua itɔse mabige ma Nzɛmbi. Bɔ bàyole musame a maambe muɛne, baate mvuabɔvɛ nibàbande maambe muɛne kome.

³ Avanekaniva mɛ nɛme mɛ sàde lembande layabe bumbise bua maambe muɛne. Nimulɔ mɛ nɛme mɛ komele wɛ maambe muɛne Tɔfile muti wɛ lidi mutu wa buyimbe,

⁴ mu mé, wɛ nawɛ wɛ yabe wo maambe mabalɔngese wɛ, mɔ maambe mambuli.

Tome a Nzɛmbi wa gu yulu alébele lebote la Sa Mbatise

⁵ Va lekɛse le Irodi cha ivonde àbade kumu a tsɛnge a Sudé, niguàbade na muvédi mabage, wubàtɛdenge Sakari wuwàbade mutu wa itsuku cha Abia bavédi ba malage. Mukɛdi a ndɛ Lesabéti mutégede a Aron àbade.

⁶ Bɔ botchi baate babayɛbene bàbade va busu bua Nzɛmbi. Bɔ bàyimbesenge mangidi na migage mia Malumbi miotchi.

⁷ Tɔ bɔ bàsàbote baane vɛ, muti Lesabéti ingumu àbade. Bɔ botchi bàbade bamanune gua lotele.

⁸ Letsuge lemochi Sakari nàyɛnde gu vɛde malage va busu bua Nzɛmbi, muti lɔ àbade ka lekɛse la itsuku chɛndi.

⁹ Ngane a bu bavédi ba malage bàsadenge nabukale, bɔ nibàsɔle Sakari mu ningele gu itini cha nzɔ Malumbi cha buyimbe gu tsoge lelage la tsule muyɔmbe.

¹⁰ Piti a baate mvuayɔvɛ niyàbɔndenge Nzɛmbi gutsɔ itini cha nzɔ cha inéni va lekɛse lebàtsogenge lelage la bikumbe bia tsule yiyibuɛ.

¹¹ Avanekaniva tome a Nzɛmbi wa gu yulu àyade va Sakari àbade. Ndɛ nàtɛmene va itchige chibàtsogenge lelage la bikumbe bia tsule yiyibuɛ ngule a mbagele.

¹² Sakari àmɔne tome a Nzɛmbi wa gu yulu, bɔɔme na lekambe nibiàkuate ndɛ.

¹³ Tɔ tome a Nzɛmbi wa gu yulu nàlɛle Sakari ndé: «Niage bɔɔme mɔne. Nzɛmbi ayugi lebɔnde lawɛ. Mukɛdi a wɛ Lesabéti nábote wɛ muane wa lebagele. Ndoge yi wɛ káloge ndɛ Sa.»

¹⁴ Wɛ nitsákene na ngɔmbe mu muane muɛne. Baate mvuabɔvɛ nibákuade na ngɔmbe va bákábote ndɛ.

¹⁵ Ndɛ mutu wa buyimbe ákábade va busu bua Malumbi. Ndɛ ásákaniɔde malame mama langese vɛ. Lenioni Labuyimbe nilekogele mu niute a ndɛ, ndɛ kibasabote vɛ.

¹⁶ Ndɛ nágɛle mitéme mia baate ba itsuke cha Ichirayɛle mvuabɔvɛ.

¹⁷ Ndɛ nábade na bungudi na Lenioni ngane a Eli mubigi a maambe ma Nzɛmbi, mu nɔngese batɛyi na baane na mu gɛle mitéme mia baate ba ngua muvɔnge mu ndé bɔ bayabe maambe ma baate babasongene na mu ndé bɔ babade baate babakoge va busu bua Malumbi.

¹⁸ Tɔ Sakari nàlɛle tome a Nzɛmbi wa gu yulu ndé: «Mɛ tchambe muɛne buni mɛ káyabe?» Mɛ ka inune, mukɛdi a mɛ na ndɛ amalotele nune.

¹⁹ Tome a Nzɛmbi wa gu yulu nàkale ndɛ ndé: «Ndoge a mɛ Ngabriyɛle. Mɛ niwuwatɛmene va busu bua Nzɛmbi mu salele ndɛ. Ndɛ niwutchindigi mɛ gu yambele na wɛ na gu tɔse wɛ tsaange muɛne yiyibuɛ.»

²⁰ Mu wɛ bichi chilele maambe ma mɛ léli wɛ, wɛ báde ka imɛme, nachi maambe muɛne mákásopege.

²¹ Baate bàbàtalenge Sakari nibàmɔne ka page mu ndɛ dinge gu itini cha nzɔ Malumbi cha buyimbe.

²² Sakari àpole, àsàbàtoge yambele na baate vɛ. Avanekaniva bɔ bàyabe bo ndɛ ka imuile amoni gu itini cha nzɔ Malumbi cha buyimbe. Sakari nàsàdenge bɔ ndile ka bilémbe na miɔge ndage batsoge vɛ.

²³ Tsuge a ndɛ ya sale ifuade, Sakari nàgabege gu bole buɛndi.

²⁴ Lekɛse leviɔge, mukɛdi a ndɛ Lesabéti nàmɛne dimi. Batsungi batane ndɛ ndile àsuɛme nàlɛlenge ndé:

²⁵ «A lineli ni tchambe lelebuɛ le Nzɛmbi achidili mɛ. Ndɛ védi mɛ misaange mu mase mɛ tsoni va mise ma baate.»

Tome a Nzɛmbi wa gu yulu alɛle lekɛse lebákábote Sése

²⁶ Batsungi batane bàviɔge, mu wa musame, Nzɛmbi nàtchindege Ngabriyɛle tome a ndɛ wa gu yulu gu musɛnge a Ngalilé wa va kɛse a Nasarɛte,

²⁷ gu mboge a nombe mukaase wu sasade makuɛle na babagele vɛ, wu Suséfe wa itsuku cha Davide àbade avɛde mudile. Ndoge a nombe mukaase muɛne Mari.

²⁸ Tome a Nzɛmbi wa gu yulu aningele gu nzɔ Mari, nàlɛle ndɛ ndé: «Tsakene na ngɔmbe, Nzɛmbi amamuɛse wɛ letɔnde lɛndi, ndɛ na wɛ alidi.»

²⁹ Mari ayoge maambe muɛne, àmɔne page yalotele, nàlɛle ndé ayineyi sugi kabuni yayɛndegele.

³⁰ Tome a Nzɛmbi wa gu yulu nàlɛle ndɛ ndé: «Mari niage bɔɔme mɔne. Nzɛmbi amuéchi wɛ letɔnde lɛndi.»

³¹ Wɛ mɛne dimi. Wɛ nibote muane lebagele. Ndoge yi wɛ káloge ndɛ Sése.

³² Muane muɛne mutu a mbuli ákábade. Nibátɛdenge ndɛ bo muane a Nzɛmbi wulidi gu yulu. Malumbi Nzɛmbi návɛde ndɛ buyumune bua kage a ndɛ Davide.

³³ Ndɛ niwukábade Kumu a itsuku cha Sakɔbe mubunamubu. Buyumune buɛndi busákáfuade vɛ.

³⁴ Mari nàfule tome a Nzɛmbi wa gu yulu ndé: «Tchambe muɛne buni lekábade, mɛ ki mɛ sasade makuɛle na babagele vɛ?»

³⁵ Tome a Nzɛmbi wa gu yulu nàkale ndɛ ndé: «Lenioni Labuyimbe nileyade gulidi wɛ. Bungudi bua Nzɛmbi nibudibe wɛ. Nimulɔ muane wu wɛ kábote bákatɛdenge ndɛ bo, muane a Nzɛmbi wulidi wuwatɛndege.»

³⁶ Lesabéti wa ngage a wɛ na ndɛ amamɛne dimi gutsɔ bunune buɛndi. Ndɛ nábote muane wa lebagele. Chi ndɛ mɛne dimi, batsungi ka basamene. Ndɛ niwubapàlɛnge bo ingumu.

³⁷ Nzɛmbi asakɔnde tchambe vɛ.

³⁸ Mari nàkale ndɛ ndé: «Mɛ muséli a Nzɛmbi, buédi ti maambe motchi ma wɛ léli mu mbate mɛ, masopege.» Tome a Nzɛmbi wa gu yulu àtɛmene, nàgabege gu yulu.

Mari ayɛnde gu imɔne Lesabéti

³⁹ Tsuge iviɔge, Mari àtɛmene nàyɛnde va kɛse musɛnge a Sudé wulidi gu yulu a mikɔnge.

⁴⁰ Ndɛ sote, àningele gu nzɔ Sakari, nàsole Lesabéti.

⁴¹ Lesabéti àyoge sugi a Mari, muane wuwàbade gutsɔ moyi a ndɛ, nàpope. Avanekaniva Lenioni Labuyimbe làkogele Lesabéti mu niute.

⁴² Lesabéti àbuamege, nàlɛle Mari ndé: «Misaange mi Nzɛmbi avédi wɛ milutili mia bakaase botchi. Muane wu wɛ kábote na ndɛ nábade na misaange muɛne.

⁴³ Tchambe le ngua Malumbi ayidi gu mboge a mɛ buni lebéndi?

⁴⁴ Vakɛtiava wɛ suli mɛ, muane wulidi gutsɔ moyi a mɛ atsékini na ngɔmbe.

⁴⁵ Bubuɛ gulidi wɛ mu wɛ chilili wo maambe motchi ma Malumbi aléli wɛ másopege.»

Mari akakese Nzɛmbi

⁴⁶ Mari nàlɛle ndé: «Mɛ Malumbi mɛ kakase.

⁴⁷ Mɛ ka na ngɔmbe mɛ tsakene muti Nzɛmbi alidi Mupotili a mɛ.

⁴⁸ Ndɛ moni tinge a muséli a ndɛ wuwulidi na mutéme wuwakɔɔle. Bande lɔlɔ, na gu busu a muénde, bimbise bia baate nibilɛlenge mɛ bo, misaange na mukuge na ndɛ biàbade.

⁴⁹ Muti Nzɛmbi ngua bungudi achidili mɛ maambe mamabuɛ. Ndɛ Nzɛmbi wuwavɛsade mabi.

⁵⁰ Letɔnde la Nzɛmbi mubunamubu lelidi gulidi baate babayimbese ndɛ.

⁵¹ Va Nzɛmbi amuɛse bungudi buɛndi, ndɛ tsamenenge baate ba ngua muvɔnge.

⁵² Ndɛ mase binɔne gu yulu makuange ma bɔ ma buyumune. Ndɛ yimbese baate ba ngua mitéme mia kɔle.

⁵³ Ndɛ vɛde baate babakuade na nzale biéle mvuabiɔvɛ bibiafuise bɔ moyi. Ndɛ gabese bichine miɔge na miɔge.

⁵⁴ Ndɛ náyade gu pɔtele baate ba itsuku cha Ichirayɛle na mu bangele pɛngini yi ndɛ sàde gulidi bɔ.

⁵⁵ Ngane a bu ndɛ lɛle gulidi Barame na batégede bɛndi.»

⁵⁶ Mari nàtsagele gu mboge Lesabéti ndile batsungi batate. Tsɔvane ndɛ nàgabege gu bole buɛndi.

Lebote la Sa Mbatise

⁵⁷ Lekɛse labote letɔde, Lesabéti nàbote muane a ndɛ lebagele.

⁵⁸ Bambɛgi bɛndi na ngage a ndɛ bàyoge tchambe lelebuɛ le Malumbi àsadele ndɛ, bɔ botchi nibàtsakene na ngɔmbe.

⁵⁹ Tsuge tsaambe iviɔge, mu la pɔɔmbe, bɔ nibàyɛnde na muane gu sade ndɛ chake. Bɔ nibàtɔnde loge muane muɛne ndoge a taate a ndɛ Sakari.

⁶⁰ Tɔ nguɛndi Lesabéti nàlɛle bɔ ndé: «Mɛ bichi. Ndoge yibàkatɛdenge ndɛ, Sa.»

⁶¹ Bɔ nibàkale ndɛ bo: «Gu yimbise cha wɛ gusalidi na mutu wu batɛde Sa vɛ.»

⁶² Bɔ nibàsade taate a ndɛ bilémbe na miɔge mu yabe ndoge yi ndɛ tɔnde ndé baloge muane muɛne.

⁶³ Avanekaniva Sakari àvɔnde ipɛchi cha lemani nàkome ndé: «Ndoge a ndɛ Sa.» Baate botchi nibàgémbe.

⁶⁴ Vakɛtiavane, Nzɛmbi àgabese Sakari ndage, ndɛ nàkakese Nzɛmbi.

⁶⁵ Bɔɔme bukuate baate botchi, bɔ nibàyolenge musame a maambe muɛne motchi gu yulu mikɔnge mia va kɛse a Sudé.

⁶⁶ Baate botchi bàbàyogenge maambe muɛne, nibàkɛlenge mɔ gutsɔ mitéme mia bɔ, nàlɛle bo: «Muane muɛne gu busu a muénde buni ákábade?» Bungudi bua Malumbi na ndɛ bulidi.

Sakari akakese Nzɛmbi

⁶⁷ Lenioni Labuyimbe lekogele Sakari taate a muane muɛne mu niute, ndɛ nàbége maambe maneme ndé:

⁶⁸ «Bubuɛ gulidi Malumbi Nzɛmbi wa itsuku cha Ichirayɛle, muti ndɛ mayade gu pose baate bɛndi gutsɔ buvége.

⁶⁹ Vatsɔ batégede ba muséli a ndɛ Davide, Nzɛmbi amavɛde bése a béne Mupotili ngua Bungudi.

⁷⁰ Ndɛ makuanise pɛngini yi ndɛ sàde gulidi bése a béne va ndɛ tchindegenge bése a béne babigi bɛndi ba maambe.

⁷¹ Mupotili muɛne niwu ndɛ sade pɛngini mu pɔtele bése a béne mu makake ma bambɛne na mu makake ma baate botchi bababɛle bése a béne.

⁷² Nzɛmbi nàmuɛse letɔnde lɛndi gulidi bakage ba bése a béne, mu bangele ndɛgi ndɛ yi ndɛ gade na bɔ.

⁷³ Nzɛmbi àgade pɛngini va busu bua kage a bése a béne Barame ndé,

⁷⁴ ndɛ nápɔtele bése a béne mu miɔge mia bambɛne. Mu ndé leyimbesengani ndɛ bɔɔme mɔne vɛ.

⁷⁵ Mu ndé bése a béne lebade baate babatɛndege babalidi na maambe mamayɛbene va busu buɛndi tsuge yotchi.

⁷⁶ Wɛ muane a mɛ, nibátɛdenge wɛ bo, wɛ mubigi a maambe ma Nzɛmbi wulidi gu yulu. Muti wɛ nitsuáme gu lébele baate leyade la Kumu.

⁷⁷ Na gu lage bɔ lesoge lafuade moyi na buni bakitoge chindele bɔ maambe mamabi ma bɔ basade.

⁷⁸ Nzɛmbi a bése a béne alidi na letɔnde na lengɛbe. Ndɛ nátchindege bése a béne iyalele chichikámate gu yulu ngane a va letɛdi lapole.

⁷⁹ Mu tɛndele ndjile gulidi baate babalidi gutsɔ ifunde na gutsɔ lebéle la leku. Iyalele muɛne nichichikálage bése a béne ndjile yiyibuɛ.»

⁸⁰ Sa Mbatise nàbogenge na bungudi na buyédi bua Lenioni Labuyimbe. Ndɛ nàtsalenge ndile gu bitchige bia legɛngi nachi ndɛ bande lɔngese mabige ma Nzɛmbi gulidi itsuku cha Ichirayɛle.