Juuta 1 - Nyakyusa Ngonde New Testament (Ulwitikano Ulupya)

Uluponio

¹ Yuda untumwa gwa Yesu Kristi, kangi ugwamyabo gwa Yakobu, kubabilikiligwa abaganigwa ba Kyala uGwise, aba

² abubatile Yesu Kristi. Ikisa, ulutengano, nulugano, fyo fibalege mmyinu.

Isya kubasoka nsya bamanyisi ba lusyobo, nisya kugomokela nkayilo akakulu

³ Mwe baganigwa, bo nikwiyula fiyo ukubasimbila isya bupoki ubu bo bwitu twesa, po ndinkwaga kumbagile ukubasimbila isya kubasukania, ukuti mululwilege ulwitiko ulu

⁴ bapegigwe kamokene itolo abikemo; namanga bamo abandu biyingisye mbutitu itolo, aba basimbiligwe ngani ukuya ba kuyobigwa ububibi, bila-Kyala; abene ilipyana lya Kyala balipindwile ukuya lya kubombelamo ubulogwe, bikunkana Umwenefyosa uyu ali yumoywene itolo, nuNtwa gwitu Yesu Kristi.

⁵ Loli nikulonda ukubakumbusya napapo linga musimanyile ngani syosa, ukuti uNtwa abasosisye abandu bake nkisu kya mwʼEgipti, loli ulwa nyuma alinkubapyuta abasitakwitika;

⁶ bope nabandumi aba bakapalindilile bununu pabulagili bwabo, loli balinkubuleka ubuyo bwabo, bo alinkubabika mbupinyigwa bwa bwilabwila nkati mungisi, ukwisakufika

⁷ pisiku ilikulumba ilya bulongelo. Bunobuno bope aba mu-Sodomu na Gomora, naba ntwaya utu twabasyungutile, ukufwana na balabala, balinkubomba isya buhahani, balinkunyonywa ukulogwa nimibili igingi itolo; abene bipelile ukuya ka kuketelamo, bo bikukubilwa ndufundo lwa moto gwa bwila.

⁸ Bunobuno bope na bababa, mbugogwanjosi bwabo, bikuginyasya imibili, bikubusyokela ubulagili nukubahelula aba

⁹ mbukulumba. Umwene loli Mikaeli ugwandumi unkulumba, apa akanikanaga nagwe umohesi, apa bagulwilaga umbili gwa Mose, alinkutila ukundongela mmahelu, himma, loli alinkuti:

¹⁰ UNtwa yo akukemelege. Abene loli bababa bikusituka amahelu nisi bakasimanya; loli nkupeligwa kwabo, basilingenie bo fi finyamana ifisitamahala, syo bikonangikila sisyo.

¹¹ Hitata kuli babo! buno bendile munjila ya Kaini, bitagile itolo mbusobi bwa Baalamu panongwa ya fihombigwa; bapyutiligwe lumo nagwe Kora nkusambuka kwake.

¹² Abene mibabye itolo pafindu fya palusekelo lwa bumanyani bwinu, apa bikulya nanumwe kisitalutende; bikwitima bene, mabingu amasita misi aga gikukagigwa numbelo, mipiki itolo igi gilagesye amani imisita seke, igi gifwile kabili, igi giku-

¹³ pwike nimisi. Go mayiga ga munyanja aga gasambwike, aga gikusosya untotofula gwa nyisusyantu syabo; syo ndondwa isi sisobile injila yabo, bo aba babikiligwe ingisi inditu fiyo isitakumalika siku.

¹⁴ Bo aba Enoki, ugwa buhano na bubili ukufuma pa Adamu, akungulukaga atigi: Keta, uNtwa isile nifilundilo fya bikemo

¹⁵ bake fi fingi itolo, kukubalonga bosa, nukubatobesya bosa abila-Kyala panongwa ya mbombo syabo isi babombile, isya bwila-Kyala napanongwa ya masyu gosa amakali aga banjobile

¹⁶ umwene abatulanongwa abasitakuntila Kyala. Abene bo ba lwibunesyo, kangi ba lwililisyo, bikukonga mu mfinyonyo fyabo; undomo gwabo gukuyoba isya lwiyumbiko; bikubimikila abandu mbundu, ukuti bakabege fimo.

¹⁷ Umwe loli mwe baganigwa, mugakumbukege amasyu aga gayobigwe iyolo nabatumigwa ba Ntwa gwitu Yesu Kristi;

¹⁸ apa bababulege ukuti: Nkabalilo ka kusulo, bisakuyangako abobeli aba bisakufikongaga ifinyonyo fyabo fya bwila-Kyala.

¹⁹ Bo aba bikupela indapukano, aba bikwinogona si sya nkisu

²⁰ itolo, bakaya nagwe Mbepo. Loli umwe mwe baganigwa, bo mukwiyenga palwitiko lwinu ulwikemo, kangi bo mukwi-

²¹ putila mwa Mbepo Mwikemo, mwibikege ndugano lwa Kyala, bo mukukigulila ikisa kya Ntwa gwitu Yesu Kristi, ukwakufika

²² kubumi bwa bwila. Bamo aba bikwilamwa bo mubapaki-

²³ syege, amubapokege bamo bo mukubanyaka itolo mmoto; abangi bo mubapakisyege ndutende, bo mukugubenga gope numwenda ugu gunyasigwe numbili.

Ulusayo

²⁴ Umwene loli uyu amenye ukububatila ukuti mungagwaga, uyu amenye nukubabika nkyeni mbukulumba bwake mwe

²⁵ basitamababye, kangi mwe muli ndusekelo, kwa Kyala uyu ali mwene itolo, uMpoki gwitu, mwa Yesu Kristi uNtwa gwitu; yo ubukulumba, ubusisya, amaka, nubulagili fiyeko kumyake, ukufuma bo kikali ukuyako ikisu, nalilino, nukwakufika nakubusitakumalika siku na siku. Amen.