MARK 6 - DVRWQ PVVB (BSI)

Najaretho Jisun Haqpaqnum

¹ Jisu hoq nyookam apaq peekul mwwg atwg nampamb mwwg buu tulungam boolayil wkur kunum.

² Doonu dvk aalho mwv Sinagog nam uraho tomswr swrabnum. Hoqho nyiv vigo doonum, bulv mwwg tomswrnam mam tatwl mwlwngv lomnum. Bulv benum, “Mwv hogloqgv soq mwlw sam naapan? Hognvk nyijwq-nyegam gamlaqkam mwam jipan? Mwv hognvk nyimanam swrdorxeq nyis tulungam nyidwn yv?

³ Mwv svvtaq jem mvnbo hoo Meeri ko tuup, Jems, Judas hoo Simong vbw ak hvvma i? Mwwg bwrm tulungv so dooma dvn i?” Hoqgab bulv mwam haqpaqnum.

⁴ Jisu bulam benum, “Nyiqry kaanbo akam atwg namlo, nampamho, atwg nyobv ximab haqpaq dvn hvbmabde asaq nyook lo mwlwngv mwam xidwn.”

⁵ Mwv hoq ditaqho swrdorxeq vigo nyimanum hvbmab koi yooma go nyi vcbo vnyi-oum gotwq mwwg alaq idaql mwp twqnum.

⁶ Mwv nyi tulug mwwjw maanam mam kaatwl deedyjaq gokbo mwwnum. Ho Jisu hoq diigarho doonbo nampam tulub wbnv nyi tulungam tomswrl yvnum.

Jisu Buu Wyw leq Vnyiam Kanamnam

⁷ Mwv buu wyw leq vnyiam goqkum banv bulam vnyi-vnyi gogaqb kanam nvmlwqnum. Mwv bulam yal almanam ruqpaq mvdwb ator jilwqnum

⁸ hoo bulam benum, “Beqnyia arongam bwtwl wn, hoq aoho hog gokam bvvmab, wtw baqmab, cuk baqmab, nulug cukho twngk baqmab.

⁹ Samtaqnan luxuqlo gvla hvbmab lvlwq koolynan baqmab.”

¹⁰ Mwv sam kam bulam benum, “Nulam hogloq namho svgagvrwq tayin hoq namho nulv hoq nyook hoqgv wleq maady deedib hoq nam namkinho doota.

¹¹ Nulv nampam golo haaikam nulam svgagvrwq maanbo ho nulug benam mam tama bo ham apaqto ho nulug lvpia hoq diimwram dudinl dupaqto. Hoqhv bulug gab hvvkib nyitayin!”

¹² Kokw so bulv wknv nyi tulungam bulug nyic nyinam hoqgv wkur tukuk hvl pui bekinnum.

¹³ Bulv vigo sony cenam mam, sony-oram mam ruqxanum hoo Olib kuty neebnv nyi vcbo tulungam vigo mwpnum.

Jon Baptistg Sinam

¹⁴ Jisug albo bonam nyinam puiyv gvda mwlwho dupi kunam mam, Herod lvpw atv tapanum. Nyi tulu gon benum, “Jon Baptist lokta turab paku! Hoqgab mwv soq swrdorxeq nyinam ator sam kaapa paku.”

¹⁵ Hvbmabde nyi tuuginv benum, “Mwv Ilija sulak.” Tuugin benum, “Mwv kolwg otuq hoqg nyiqry benbo tulug pengko hoqg akgon sulak.”

¹⁶ Herod tapa tvl, mwv benum, “Mwv Jon Baptist! Ngo mwwg dumpongam pvriql papaq mvtkun, mwv lokta turab pakun!”

¹⁷ Herod mwv atjaqkv Jonnvn nootu mvdwb hoo mwam leetwl pvtwq uraho tumdvb jinum.

¹⁸ Jon Baptist Herodnvn, “No noqg vbwg nywxwngam doognam si alma!” hvl bekin doonum. Hoggab Herod mwv mwwg vbw Pilipg nywxwngam Herodianvn doognum, hoggab Herod Jonnvn mengnum.

¹⁹ Hoqgab Herodia Jonnvn hang baqgabl doonum hoo mwam mengdwb mwwnum, hvbmabde mwv Herodnvn hingkur banv mvnyi maanum.

²⁰ Herod Jonnvn bosnum, hoggab Jon albo nyiv hoo dvrwqbo nyiv hvl Herod cengnum. Hoqgab mwv Jonnvn hog mvmab apnum. Herod Jonwg benam mam tvnwnum, hvbsujaqkam mwv tvcw tatam mwwg hangam mwwdwq saqk tapa dvb benum.

²¹ Kokw so Herodia mwwg pagoq ak kaapa kunum. Herodnvn ko bwwd aal golo mwv sorkari saab tulungam, sipai saab tulungam ho Galili hoqg nyi tulungam durum dvgnum.

²² Herodiag ko nyem akv durumko uraho noso soonv Herodnvn la mwwg nyiin tulungam hang xumtvl kvvlwq jaqb noso soojnum. Hoqgab lvpw atv nyem ko akam benum, “No hognvkv nvvnw do? Ngo noqg konam gotwq bolo jitayin.?

²³ Mwv vigo dingbnv nyem ko akam benum, “Ngo dingl bedwn, no hognvkam kotayin ham ngo nam jitayin, ngoqg lvpw pac gonkam nam jitayin.”

²⁴ Kokw so nyem ko akv agab lengb nv mwnwg annam toxnum, “Ngo hognvkam kotayin.” Annv birwqnum, “Jon Baptistg dumpongam kota.”

²⁵ Nyem ko ak nyiory alwb lvpw at dookub haabnv ko-gabnum, “Nam ngo Jon Baptistg dumpongam beta golo sija joal ngam jitbvk hvl ko-gab dvn!”

²⁶ Sam tatwl lvpw atv vigo muur alnum, hvbmabde mwv ham jiram hvl bedwb nyik maanum, hoggab mwv nyiin mwlw jaqg tagaho dingbnv bei jipa ku.

²⁷ Hoqgab mwv rvkybo sipai akgon nyebia alwb kanam tvl Jonwg dumpongam bvatak hvl gaml jinum. Rvkybo sipai akv nyiory alwb pvtwqb wbnv Jonwg dumpongam pvriqlayil;

²⁸ ho beta golo joabanv nyem ko ham jinum hoo nyem ko akv ham mwwg annam jinum.

²⁹ Jonwg buu tulungv ham tapa tvl, bulv haabnv mwwg svmangam jooknv nyubu golo svma liiknum.

Jisu Nyi Lwwyw Angngam Hoonam

³⁰ Xuql kanam nam buu tulungv hookur kunv Jisug dookub haabnv mwam bulv hognvkv nyiknum hoo tomswr kunum hoq mwlwngam bekinnum.

³¹ Nyi tulu haanbov la wnbov naleq nyigam gab Jisu la mwwg buu tulungv doonul dvdbvkam mood kaapa kumanum. Hoqgab mwv bulam benum, “Kuj ngulv atv wggin gvdwl cumciq golo vpwb dootaju hoo nulvkam anyogo doonu to.”

³² Hoqgab bulv swp golo cao banv nyi cumciq golo atv wknum.

³³ Hvbsujaqkam, nyi tulungv vigo bulug wnam mam kaapa tvl ho bulv hiyv ham cengnum, ho kokw so vijaqg bulv nampam hoqgv kedwb wbnv Jisu la mwwg buu tulungv wc maadab wggol doonum.

³⁴ Kokw so Jisu swp hoqgv ipoqkunv agab lengdwk ho mwv soq nyi acam sam kaapa tvl bul gab hangv biil bulam aya mwwpanum, hoggab bulv rvkybo doomabo sviya hvb nyinum. Hoggab mwv bulam vigo tomswrnum.

³⁵ Mwwg buu tulungv mwwg dookub haabnv mwam benum, “Doonyiv wiyum paku ho soq nyook so hog gokam kaapa sv dooma.

³⁶ Nyi tulungam wwm tuku hoo bulv ogum so doonbo rongob la nampamb wgdvl bulam dvslo atam rvm nyiato.”

³⁷ Jisu bulam birwqnum, “Nulv bulam hog dvslo ak jito. Bulv birwqnum, “No ngulam wgdvl wtw lo rup twngk lwnyi gob rvgdvl bulam dvdwb jitwk hvl bedwn i?”

³⁸ Jisu bulam toxnum, “Nulug dookho hog hwdgo wtwngv doodo? Naaka tvna.” Kokw so bulv kvvdy kaaka tvl mwam bekinnum, “Wtw taqang gola ngui cinyi go doodo.”

³⁹ Kokw so Jisu mwwg buu tulungam nyi tulu mwlwngam hib-hibib mvtwl bulam ww aoho doa mvtwk hvl benum.

⁴⁰ Hoqgab nyi tulungv hib-hibib lwwg, lwwgwb hoo camng camng gogaqb ww aoho doanum.

⁴¹ Kokw so Jisu wtw taqangam la ngui cinyiam bvvtwl ao gvdab koodul, Pwnboam paqnum. Mwv wtwngam pindub banv buu tulungam jitwl nyi tulungam hormnum. Mwv ngui cinyiam kam pingmwql bulug pengko lo mwlwngam hormnum.

⁴² Nyi vxiv ayeq dvdeq dvb dvtar nagub dvnum.

⁴³ Kokw so buu tulungv huc cwyw leq cinyi go wtwngv la ngui dvleqkam dorkum kunum.

⁴⁴ Hoqho dvnbov nyeganga hvnam mam xikanamv lwwyw ang gob nyinum.

Jisu Iss Aob Wnam

⁴⁵ Jisu nyi tulungam wwmdvb jixo tvl mwwg buu tulungam nyiory alwb swp urab cao mvtwl swnyiq kvtin gonwb vnwqb mwwg wmadab Betsaida nampamb wiyanvk hvl roolwqnum.

⁴⁶ Nyi tulungam alwb wnkuk hvl bexo kokw so mwv yorda golo xumtab wnum.

⁴⁷ Ariyum dukho swpv swnyiq nyiqra lvpaho doonum, hvbmab Jisu vp-cwkwb mwv diipho doonum.

⁴⁸ Mwwg buu tulungv swp kool wnum; ho arkomc huudar-huumar ditaqho, mwv iss aob bulug dookub haanum. Mwv bulam wleqdvb nyitanum,

⁴⁹ hvbmabde bulv mwam iss aoho wnam mam kaapa tvl bos soma vrram sonum. “Iss oram go!” hvbnv bulv sogoq kiir noonum.

⁵⁰ Bulv mwam lomtwr twryangam lomnum. Ho Jisu bulam benum, “Haakam to!” “Ngo sulak. Bos maabv,” hvl benum.

⁵¹ Kokw so mwv bulug dookub swp urab caonum hoo dooikam yingin kunum. Buu tulungv hog mwwbwq nyomab lomnum.

⁵² Hoggab bulv lwwyw ang nyiam dvdwb jinam hoqg bvrwq niqtuqngam cengmab; bulug hangv mwar nyomab doonum.

Jisu Genesaretho Vcboam Mwpnam

⁵³ Kokw so bulv swnyiqngam rabknum hoo Genesaret gvdaho wc kunv swpam ruutul apnam.

⁵⁴ Bulv swpam apaqpel wdu dukho nyi tulungv Jisun kaacinum.

⁵⁵ Hoqgab bulv gutu-gora hoq vcbo nyi tulungam mwwg dookub; bulug kartaq upiqho karm tvl bulv hogloqho Jisu dootayin hoqb joa jinum.

⁵⁶ Kokw so hogloq ho Jisu wtayin, hoq nampamho, rongo ho, gvdaho nyi tulungv bulug vcbo nyi tulungam kwm-kor haty ho boal haagnum ho vcboam mwwg vj niqtuqngam jaqkam mvdaq mvdwb jitbvk hvl mwam xumnum, ho gvbwbo mwlwngam al dukub mwpnum.