MARK 3 - DVRWQ PVVB (BSI)

Nyi Alaq Laqyabo Ak Mwpnam

¹ Kokw so Sinagog nam urab lokta hookurnum ho mwv nyi akwg alaq laqgin sengbnv laqyal doonbo nyi ak uraho kaapanum.

² Ho nyi tuugin Jisug nyixiaqnam mam kaal nootu dvb ho yolu bedwb ho mwv doonu dvk aalam hoq vcboam mwpnam mam kaaya dvb kvsil doonum.

³ Jisu nyi akam benum, “No mwlwg pengko so daqrabto.”

⁴ Hoq kokwb mwv nyi tulungam toxnum, “Ngulug pvvbv Doonu dvk aalam hognvkam nyingam dvn? Svka dvb yv ma almanam nyidwb nyidwn? Nyi akwg swwgam ywwdwb nyid nvi yv ma ham twrdwb nyidwn?” Hvbmabde bulv agam gamgkam goomanum.

⁵ Jisu bulam hang lengb nv kvvyiq-taxeql kaanum, hvbmabde bulug hang vdwnam mam hoo nyimurnam mam kaatwl mwv hang biinum. Kokw so nyi akam mwv benum, “Noqg alaqngam ijinto.” Mwv alaqngam irab banv ijinum hoo mwwg alaqngv otuq hvb al kunum.

⁶ Parisi tulungv Sinagog hoqgv agab lenglayil olumgob hwwkum banv Herodg dvpar lvgab goobnv bulv Jisun mengdwb ywrbwqnum.

Jisug Kokwb Nyiv Vigo Wmin Gvnum

⁷ Kokw so Jisu la mwwg buu tulungv Galili swnyiq bviywrb wnum, ho mwwg kokwb nyiv mvqlw twwt jaqgo wmin gvnum. Bulv Galili, Judiya,

⁸ Jerusalem, Idumiya ho Jordon pobu lvqbwq taqc ho doonbo gvda hoqgv hoo Taiyar la Sidon nampam hoqgv haanum. Soq nyi tulu si Jisug nyinam-wnam puiyam tapa tvl bulv mwlwngv mwwg dookub haanum.

⁹ Nyiv mvqlwko gab Jisu mwwg buu tulungam swplo ak naatwk hvl benum, hoggab nyi tulungam mwwg ogumho ciqkum-ciqlum mwam mvm maadwb benum.

¹⁰ Mwv nyi vcboam vigo mwpnum, hoqgab nyi vcbo nyi tulungv mwlwngv mwwg dookub ciqkum-ciqluml ciqlwql mwam alaq idaq koodwb mwwl ceqal haanum.

¹¹ Hoo hogloq hoojaqkam almanbo yalv nootunam nyi tulungv mwam kaapa yukam, bulv mwwg lvpiangv kumbwl sogoq kiir nool benum, “No Pwnbog Ko Tuup jaqkv!”

¹² Jisu almanbo yalam vcjaqb gaml jil hiyv nvkam mwwg pagoqkam bema bvk hvl yvtw panum.

Jisu Wyw leq Vnyiam Xuqnam

¹³ Kokw so Jisu yorn ao golo caalayil mwwg naadynam nyi tulungam mwwg dookub goqanum. Bulv mwwg dookub haanum.

¹⁴ Ho mwv wyw leq vnyi go xuqbnv hvvky hvl eminum. “Ngo nulam ngoqg lvgab dooba mvdwb xuqpa kun” hvl mwv benum. “Ngo nulam kanam tvl pui bekar mvtayin,

¹⁵ hoo nulv uiyam kam ruqxa dvb atoram kaapa tayin.?

¹⁶ Soq wyw leq vnyi si mwwg xuqnam nyi tulungv, simon (Jisug Pitor hvk eminam,)

¹⁷ Jems la mwwg bor Jon, Jebedig ko tuup tulu (Jisu bulam Boanarges hvl eminum, hvgdvn hv Doogumg nyi tulu.)

¹⁸ Andriyo, Pilip Bortolomiyu. Metiyu, Tomas, Alpiyus ko tuup Jems, Taddayus, Kananwg Simon,

¹⁹ hoo Jisun nyepinbo Judas Iskeriot.

Jisu la Beljebul

²⁰ Jisu nam golo haanum. Hoqho kam hvraqb vigo nyiv mvqlwgo hookumnum ho Jisu la mwwg buu tulungv vcin dvdwb mood kaapa maanum.

²¹ Mwwg atwg nyi tulungv mwam nootul bootakub wnum, hoggab nyi tulungv mwam rugaq pakuk hvl benyanum.

²² Jerusalem hoqgv haanbo Pvvb tomswrbo nyi tulu go ho yvnum. Bulv benum, “Mwwg uraho Beljebul doopa! Hoqhv Ui tulug at jaqkv, hoqgab mwam bulam ruqxa mvdwb ator jipa.”

²³ Kokw so Jisu bulam mwwg dookub goqa banv bulam doocil agam goonum. “Uiyv hoggub nyil ui kalam mam ruqpaq nyotayin?

²⁴ Hiyvg gvdag lvpwngv hang pwnyi gob mwwdwn ho paiyaq mins dvn hoq gvdag lvpwngv dooyuram.

²⁵ Hogloq imiqngv hang pwnyi gob hang baqdwn ho akwn akwn paiyaq mins dvn hoq imiqkv swwiyuram.

²⁶ Hoqhvb kalam uiyig lvpwngv hang pwnyi gob mwwb nyiloqkam hv dooyuram, hvbmabde lvpw asaqb nyil yuupaq tayin hoo twrgumv.

²⁷ “Hiyvg nyiv kam atorbo akwg namho haal mwlwngam pwbw yaanbo akam nootul leedaql ap coomalo hoq nyi akwg namho dvrab pam huul baql wg nyoram.

²⁸ “Ngo nulam jvqtw jaqb bekin dvn, nyi tulug nyic nyinam mwlwngam ho bimur benam mam apaq jitayin.

²⁹ Hvbmabde hiyv nyiv Dvrwqbo Yalwg ceebiob benam mam nywywngam apaq jidwb nyiram, hoggab mwv nwrba cwtam gob nyic nyipa ku.”

³⁰ (Jisu soq sam benam siloqkam nyi tulungv mwam benum, “Mwwg uraho almanbo yalam mwv doog gvdo.”)

Jisug Annv la Bor Tulu

³¹ Kokw so Jisug annv la bor tulungv hoqho hvvcnum. Bulv nam agaho daqtwl mwam lengtwk hvl goqnum.

³² Hoqho nyi tulungv hwwbum tvl Jisun doognum. Bulv mwam benum, “Kaato, noqg annv la bwrm-bor tulungv aga vv nam kaatab haado.”

³³ Jisu bulam birwqnum, “Hiyv ngoqg annv? Hiyv ngoqg borv?”

³⁴ Ho mwv nyi tulungam kaagab banv mwam hwwywql doon boam kaal benum, “Kaato, soq tulu si ngoqg annv hoo borv!

³⁵ Hiyv nyiv Pwnbog mwam nyim dvb jinam bonam nyidwn hoq ak hv ngoqg borv, bwrmv hoo ngoqg ann.”