Ndanịelị 1 - Biblia Umwikemo 1996

Abāndu abatụbwa pabulōngelo bwa Nebukatịnesa

¹ Nkyinja kya butatu ikya bulagilị bwa Jehojakịmụ umalafyale gwa jụ̄ta, Nebukatịnesa umalafyale gwa Babelị ālịsịle ku Jelụsalemụ, akakomịle akāja ako.

² UNTWA alinkwenda nukumbīka Jehojakịmụ umalafyale gwa jụ̄ta nkiboko kyake pamopēne nutōmbo tumo utwa nnyụ̄mba ja Kyala. Alinkubēga abapịnyịgwa bamo alinkubūka nabo kukị̄su kya Syanalị (ko kuti Babelị), nnyụ̄mba ja gyabakyala gyake, alinkutubīka utōmbo nnyụ̄mba ja kulindililamo ikyuma kya gyabakyala gyake.

³ Umalafyale alinkunndagila Asịpenasị unkulūmba gwa bāndu bāke abafụle, ukuti abasalege bamo abany'Ịsịlaelị, abāna ba banyafyale nabāna ba bīmikịgwa.

⁴ Abatụbwa aba bakaja nakababye nakamo, abanoge ububūmbe, abamang'anyị ba mahala gōsa, aba bali nubumanyị kangi aba bagị̄le ukusyaganịa isi bịkumanyịla, kangi aba babagị̄le ukubōmba nnyụ̄mba ja malafyale, kangi aba babagị̄le ukumanyịsịgwa amaletelị ga njobelo ja Bakalịtaja ukuti basị̄mbege nukwimba.

⁵ Umalafyale alinkulagila alinkuti: Kukuti ịsịku bapēgịgwege ikijabo kya fị̄ndu ifịnụnụ, bo ifị umalafyale ālyaga, pamopēne nubwalwa bwa māfị̄lụ bo ubu ānwaga. Ātịle bamanyịsịgwege kukabalilo ka fyinja fịtatu, kubumalikilo bwa kabalilo ako po ābēndege nukwịsa nkyenị mmalafyale.

⁶ Nkibụgụtila kya bala bāsalị̄gwe, bālimo ba Ndanịelị, Hananịja, Mịsyaelị, na Asalịja, bāfụmịle nkikolo kya Jūta.

⁷ Unkulūmba gwa bafụle alinkubapa īngamụ isị̄ngị, Ndanịelị alinkumpa īngamụ Belịtịsyasa, Hananịja alinkumpa īngamụ ja Salilaka, Mịsyaelị alinkumpa īngamu ja Mesaka, Asalịja alinkumpa īngamụ ja Abetịnego.

⁸ Ndanịelị alinkutụmụla nkati mmojo gwake ukuti, atịkulyaga ifị̄ndu ifịnụnụ bo ifị ālyaga umalafyale kangi atịkunwaga ubwalwa bwa māfị̄lu bo ubu ānwaga umalafyale ukuti angịnyasyaga; po papo alinkwenda nukunsūma unkulūmba gwa bafụle, Asipenasị alimmwịtikị̄sye ukuti angịnyasyaga.

⁹ Mwịpyana lya Kyala Ndanịelị alinkulwaga ulupākisyo kumāso ga nkulūmba gwa bafụle.

¹⁰ Unkulūmba gwa bafụle alinkujoba kwa Ndanịelị alinkuti: Une nguntị̄la untwa gwangu, umalafyale, papo jo uju alagị̄le ukuti mụlyege ifị̄ndu ifị, kangi mụnwege, papo bo ikubakēta ịsakwagaga mụgāndịle mụkatụpa ukufwana nabatumwa abị̄nīnụ aba mụfwene nabo ifyinja, linga une mbōmbịle isị umalafyale abagị̄le ukūngōga.

¹¹ Po papo Ndanịelị alinkummbūla unndindililị, uju Asipenasị unkulūmba gwa bafụle alimmbīkịle ukuti abalindililege ba Ndanịelị, Hananịja, Mịsyaelị, na Asalịja, alinkuti:

¹² Nāpela, utugele twe babōmbị bako kukabalilo ka masịku kalōngo ịtolo, utupege lyene ilịsēke lya nyụ̄ngụ ukuti lyo tulyege, kangi gēne namīsi ga kunwa.

¹³ Po lelo ugwe gwịse utukētege utufwanịkisyege nabị̄nītu abatụbwa, aba bịkulya ifị̄ndu fya malafyale ifịnụnụ, bo utwenēsịsye ākutụmụlaga ukukōnga mụmo utubonị̄le twe babōmbị bāko.

¹⁴ Alinkupilika, alinkubịtikisya ukuti bagelịgwege kukabalilo ka masịku kalōngo.

¹⁵ Kubumalikisyo bwa masịku kalōngo, balinkuboneka ukuja banụnụ kumāso kangi balinkuja batụpe imịbili gyabo ukubakīnda abị̄nābo bōsa abatụbwa bala bālyaga ifị̄ndu fya malafyale ifịnụnụ.

¹⁶ Po papo unndindililị gwabo, alinkusōsyapo ifị̄ndu fyabo ifịnụnụ nubwalwa bwabo bwa māfị̄lu ubu bwali bwa kunwa abēne, alinkubapa lyene liịsēke lya nyụ̄ngu.

¹⁷ Abatụbwa bana aba, Kyala ābapēle ubumanyị, ubumang'anyi bwa maletelị gōsa, kangi namahala. Ukōngelapo, Ndanịelị alinkuja nikikūngilwa kya busetulị bōsa, kangi nikya kusanụsya īnjosị.

¹⁸ Kubumalikisyo bwa kabalilo aka umalafyale ālagị̄le ukuti ābịkutwalịgwaga, unkulūmba gwa bafụle alinkubatwala nkyenị mwa Nebukatinesa.

¹⁹ Umalafyale alinkujoba nabo, nkibụgụtila kyabo kyosa akalyagịgwemo ujūngi uju afwene na ba Ndanịelị, Hananịja, Misayelị, na Asalịja. Po papo balinkujamo ndi bala bị̄maga nkyenị mmalafyale.

²⁰ Kukuti mahala nubumanyị ubu umalafyale abalālūsyaga, alinkwaga abēne babagị̄le fị̄jo bābakīndịle kalongo, abagānga bōsa, nabalosị bōsa aba bālịmo mbutwa bwake bōsa.

²¹ Ndanịelị āsyele pāpabulōngelo bwa malafyale ukwịsakufịka nkyinja kya kwanda ikya malafyale Sịlasị ugwa Bājemị iki ālintolịle Babelị.